Jueces 10 - Q'eqchi Bible

Laj Tolá

¹ Naq ak xkamk laj Abimélek, jun li winq, xkomoneb' li ralal xk'ajol laj Isakar, kiwakliik chaq re xkolb'aleb' laj Israel. A'an aj Tolá xk'ab'a', ralal laj Puhá, ri xmam laj Dodó, ut Samir li xna'aj, aran sa'eb' li xtzuulul Efraín.

² Laj Tolá kiwank cho'q aj k'amol xb'eheb' laj Israel chiru oxib' xka'k'aal chihab', toj reetal kikamk ut kimuqe'k aran Samir.

Laj Yaír

³ Chirix a'an kiwakliik chaq laj Yaír aj Galahad, li kiwank wiib' xka'k'aal chihab' cho'q aj k'amol xb'eheb' laj Israel.

⁴ Ke'wank lajeeb' xka'k'aal ralal laj Yaír li neke'b'eek chirix lajeeb' xka'k'aal chi kok' b'uur; ut ke'taqlank sa' xb'een lajeeb' xka'k'aal chi tenamit sa' xteepal Galahad, li neke'xk'ab'a'in toj anaqwan “Xk'aleb'aaleb' laj Yaír”.

⁵ Naq kikamk laj Yaír, kimuqe'k aran Kamón.

Eb' laj Amón ke'xrahob'tesi eb' laj Israel

⁶ Ab'anan eb' laj Israel ke'ok wi' chik chi xb'aanunkil li ink'a' nawulak chiru li Qaawa': ke'xloq'oniheb' laj Bahal ut eb' lix Astarté, jo' ajwi' li xyoseb' laj Aram ut Sidón, li xyoseb' laj Mohab, li reheb' laj Amón ut reheb' laj Filistea. Ke'xtz'eqtaana li Qaawa' ut ink'a' chik ke'k'anjelak chiru.

⁷ Jo'kan naq kichalk xjosq'il li Qaawa' sa' xb'eeneb' laj Israel ut kixq'axtesiheb' sa' ruq'eb' laj Filistea ut eb' laj Amón,

⁸ li ke'xch'i'ch'i'i ut ke'xrahob'tesi eb' laj Israel chiru waqxaqlaju chihab', chalen sa' li chihab' a'an. Q'axal ke'rahob'tesiik chixjunileb' laj Israel li wankeb' chaq junpak'al li nima' Jordán, aran Galahad, sa' xsutameb' laj Amor.

⁹ Eb' laj Amón ke'nume'k junpak'al li nima' Jordán re yalok ajwi' rik'ineb' laj Judá, eb' laj Benjamín ut eb' laj Efraín. Ut q'axal ra ke'xk'ul eb' laj Israel.

¹⁰ Toja' naq ke'xyaab'a xk'ab'a' li Qaawa' ut ke'xye re: “At Qaawa', at qaYos, xoomaakob'k chawu, xb'aan naq xatqatz'eqtaana re xloq'oninkileb' laj Bahal”, chankeb'.

¹¹ Kichaq'ok li Qaawa' ut kixye reheb': “Laa'ex kexrahob'tesiik xb'aaneb' laj Ejiipt, eb' laj Amor, eb' laj Amón, eb' laj Filistea,

¹² eb' laj Sidón, eb' laj Amalek ut eb' laj Madián. Ab'an naq laa'ex keyaab'a ink'ab'a', ma ink'a' tab'i' kexinkol?

¹³ A'ut laa'ex xineetz'eqtaana ut xex'ok chi xloq'oninkileb' li jalanil yos. Jo'kan naq ink'a' chik texinkol anaqwan.

¹⁴ Ayuqex ut japomaq eere chiruheb' li yos sik'b'ileb' ru eeb'aan. Chexkolaqeb' a'an sa' xq'ehil leerahilal!”, chan li Yos.

¹⁵ Toja' naq eb' laj Israel ke'xsume li Qaawa': “At Qaawa', xoomaakob'k, b'aanu qe li k'aru taawaj. Ab'anan chakuy qamaak, choohaakol anaqwan!”, chankeb'.

¹⁶ Ke'risi eb' li jalanil yos sa' xyanqeb' ut ke'xtikib' wi' chik xloq'oninkil ru li Qaawa'. Ut li Qaawa' ink'a' chik kixkuy rilb'al li rahilal wankeb' wi'.

¹⁷ Eb' laj Amón ke'xch'utub' rib' ut ke'xyiib' li xmuheb'aaleb' aran Galahad. Ut eb' laj Israel ke'xch'utub' rib' ut ke'xk'ojob' li xmuheb'aaleb' Mispá.

¹⁸ Toja' naq eb' laj Israel li wankeb' sa' xteepal Galahad ut eb' li xjolomileb' ke'xye chirib'ileb' rib': “Ani taak'amoq b'e chiqu re yalok rik'ineb' laj Amón? Li ani taak'amoq b'e chiqu, a'an li taajolominq re chixjunileb' li wankeb' Galahad”, chankeb'.