Jueces 1 - Q'eqchi Bible

Eb' laj Israel ke'yalok rik'ineb' laj Kanahán

¹ Chirix li xkamik laj Josué, eb' laj Israel ke'xpatz' re li Qaawa': “Ani qe laa'o xb'een taaxik chi yalok rik'ineb' laj Kanahán?”, chankeb'.

² Kichaq'ok li Qaawa' ut kixye: “Eb' laj Judá te'xik xb'enwa. Laa'in xinq'axtesi li na'ajej sa' ruq'eb' a'an”, chan.

³ Toja' naq eb' laj Judá ke'xye reheb' laj Simehón li xkomoneb': “Chooheetenq'a chi reechaninkil li na'ajej li tootz'aq. Wotz tooyaloq rik'ineb' laj Kanahán ut, chirix a'an, tooxik ajwi' chi yalok chirix li na'ajej li textz'aq laa'ex”, chankeb'. Ut eb' laj Simehón koheb' chirixeb' laj Judá.

⁴ Jo'kan naq eb' laj Judá koheb' chi yalok, ut li Qaawa' kixq'axtesi sa' ruq'eb' li xna'ajeb' laj Kanahán ut laj Perés. Sa' li tenamit Bések ke'xq'ax ruheb' oob' xka'k'aal o'q'ob' (10,000) chi winq.

⁵ Aran Bések ke'xtaw laj Adoni-Bések: ke'yalok rik'in ut ke'xsach ruheb' laj Kanahán ut laj Perés.

⁶ Laj Adoni-Bések ki'elelik chiruheb', ab'anan kitaaqeek, koxe'xchap ut ke'xyok' li xna' ru'uj ruq'eb' ut li xna' ru'uj roqeb'.

⁷ Toja' naq laj Adoni-Bések kixye reheb': “Junxil lajeeb' xkaak'aal chi awab'ej neke'xokok chaq xk'aj wa rub'el linmeex, chi yok'b'il li xna' ru'uj ruq'eb' ut li xna' ru'uj roqeb'. Ab'an anaqwan, jo' chanru xinb'aanu, jo'kan ajwi' naq xinxq'ajkamu li Yos”, chan. Ut ke'xk'am Jerusalén, ut aran kikamk.

⁸ Eb' laj Judá ke'yalok rik'ineb' laj Jerusalén, ke'xchap li tenamit, ke'xkamsi chi ch'iich' chixjunileb' li poyanam ut ke'xk'e xxamlel li tenamit.

⁹ Chirix chik a'an eb' laj Judá koheb' chi yalok rik'ineb' laj Kanahán li wankeb' chiru li Tzuul, sa' xteepal Nejeb ut sa' li Ru Taq'a.

¹⁰ Eb' laj Judá koheb' ajwi' chi yalok rik'ineb' laj Kanahán li wankeb' Hebrón (Kiryat-Arbá nayeemank re Hebrón junxil) ut ke'xsach ruheb' laj Sesay, laj Ajimán ut laj Talmay.

¹¹ Moqon chik koheb' chi yalok rik'ineb' laj Debir, li Kiryat-Séper naxk'ab'a'in najter.

¹² Toja' naq kixye laj Kaleb: “Ani taaq'axoq ru li tenamit Kiryat-Séper ut toxchap, laa'in tink'e lix Aksá linrab'in cho'q rixaqil”, chan.

¹³ Laj Otoniel, ralal laj Kenás, riitz'in laj Kaleb, kichapok re li tenamit. Jo'kan naq laj Kaleb kixk'e lix Aksá li xrab'in cho'q rixaqil.

¹⁴ Naq a'in kichalk rik'in li xb'eelom, kirelaji ru naq tixpatz' jun siiraq xch'och' chiru li xyuwa'. Ut naq lix Aksá kikub'eek chirix li xb'uur, laj Kaleb kixpatz' re: “K'aru taawaj?”, chan.

¹⁵ “K'e junaq inmaatan -chan lix Aksá-. Nintz'aama usilal chawu: jo' naq xak'e we li ch'och' li wank sa' xteepal Nejeb, jo'kan ajwi' taak'e inyo'leb'aal ha'”. Ut laj Kaleb kixk'e re eb' li xyo'leb'aal ha' li wankeb' taqe'q ut taq'a.

¹⁶ Eb' li ralal xk'ajol laj Jobab laj Ken, aj hi' re laj Moisés, ke'elk chaq sa' li xTenamitul li kala' ut, rochb'eeneb' laj Judá, koheb' sa' li chaqich'och' re Judá, li wank aran Nejeb re Arad, ut koxe'kanaaq sa' xyanqeb' li wankeb' aran.

¹⁷ Toja' naq eb' laj Judá, rochb'eeneb' laj Simehón, koheb' chi yalok rik'ineb' laj Kanahán li wankeb' Sefat, ke'xq'ax ruheb' ut ke'xq'axtesi li tenamit chi sache'k chi junajwa. Jo'kan naq Jormá kixk'ab'a'in li tenamit.

¹⁸ Eb' laj Judá ke'reechani Gasa ut li xsutam, Askalón ut li xsutam, Ekrón ut li xsutam.

¹⁹ Ab'anan us ta li Qaawa' wank rik'ineb' laj Judá li ke'eechanink re li tzuul, ink'a' ke'ruuk risinkileb' li wankeb' sa' li taq'a ru, xb'aan naq eb' a'in wankeb' xb'eleb'aal ch'iich'.

²⁰ Laj Kaleb kixk'ul Hebrón cho'q reechanihom, jo' chanru li xtaqlahom laj Moisés. Ut laj Kaleb kirisiheb' aran roxichaleb' li ralal laj Anak.

²¹ Ab'anan eb' laj Benjamín ink'a' ke'ruuk risinkileb' laj Jebús li wankeb' chaq Jerusalén. Jo'kan naq chalen toj anaqwan eb' laj Jebús wankeb' Jerusalén rochb'eeneb' li ralal xk'ajol laj Benjamín.

²² Eb' laj José ajwi' koheb' Betel, ut li Qaawa' wank rik'ineb'.

²³ Eb' laj José ke'xtaqlaheb' aj k'ehol eetal sa' li tenamit a'an, li junxil Lus nayeemank re.

²⁴ Eb' laj k'ehol eetal ke'ril jun li winq naq yo chi elk sa' li tenamit, ut ke'xye re: “Wi taak'ut chiqu chanru naq too'ok sa' li tenamit, laa'o taaqab'anyoxi chawu”, chankeb'.

²⁵ Li winq kixk'ut chiruheb' chanru naq te'ok sa' li tenamit. Ut naq ke'ok, ke'xkamsiheb' chi ch'iich' jo'k'ihaleb' wankeb' chisa', ab'anan maak'a' ke'xb'aanu re li winq a'an jo' ajwi' re li xjunkab'al.

²⁶ Toja' naq li winq koho sa' xna'ajeb' laj Hit ut aran kixk'ojob' jun li tenamit, li kixk'e Lus cho'q xk'ab'a'. A'an li xk'ab'a' chalen toj anaqwan.

²⁷ Eb' laj Manasés ink'a' ke'ruuk reechaninkil Betsán ut eb' li xk'aleb'aal, Tanak ut eb' li xk'aleb'aal. Ink'a' ke'raanilasiheb' eb' laj Dor, eb' laj Iblehán, eb' laj Mejido jo' ajwi' li wankeb' sa' xk'aleb'aaleb'. Jo'kan naq eb' laj Kanahán toj ke'kanaak aran.

²⁸ Ab'an naq laj Israel kinimank xwankil, kixk'eheb' laj Kanahán chi xtojb'al rix li xna'ajeb', us ta ink'a' kiruuk risinkileb' sa' li xch'och'eb'.

²⁹ Eb' laj Efraín ajwi' ink'a' ke'risiheb' laj Kanahán li wankeb' Késer. Jo'kan naq eb' laj Kanahán toj ke'kanaak Késer, sa' xyanqeb' laj Israel.

³⁰ Eb' laj Sabulón ajwi' ink'a' ke'risiheb' laj Katat chi moko eb' laj Nahalal. Eb' laj Kanahán ke'kanaak sa' xyanqeb' laj Sabulón, ab'an ke'k'ehe'k chi xtojb'al rix li xna'ajeb'.

³¹ Eb' laj Aser ajwi' ink'a' ke'risiheb' laj Ako, chi moko eb' laj Sidón, eb' laj Majaleb, eb' laj Aksib, eb' laj Jelbá, eb' laj Afek ut eb' laj Rejob.

³² Jo'kan naq eb' laj Aser ke'xtaw xna'ajeb' sa' xyanqeb' laj Kanahán li wankeb' sa' li na'ajej a'an, xb'aan naq ink'a' ke'ruhank chi risinkileb'.

³³ Eb' laj Neftalí ajwi' ink'a' ke'risiheb' laj Bet-Semes, chi moko eb' laj Bet-Anat, ut ke'xtaw xna'ajeb' sa' xyanqeb' laj Kanahán li wankeb' sa' li tenamit. Ab'an eb' laj Bet-Semes ut eb' laj Bet-Anat ke'k'ehe'k chi xtojb'al rix li xna'ajeb'.

³⁴ Eb' laj Amor ke'raanilasiheb' laj Dan toj sa'eb' li tzuul ut ink'a' ke'xkanab'eb' chi kub'eek sa' li taq'a ru.

³⁵ Jo'kan naq eb' laj Amor ke'kanaak aran Har-Jeres, Ayalón ut Sahalbín. Ab'an naq eb' laj José ke'nimank xwankil, ke'k'ehe'k chi xtojb'al rix li xna'ajeb'.

³⁶ Li xnub'ajleb' laj Edom natiklaak wan wi' li Tzuul reheb' laj Xook', ut nawulak wan wi' li Saqoonak, toj taqe'q.