San Juan 19 - Q'eqchi Bible

Waye' li winq!

¹ Toja' naq laj Pilaat kixtaqla xchapb'al li Jesus re taarape'q chi tz'uum.

² Eb' laj puub' ke'xtz'ul jun li koroon k'ix ut ke'xk'e sa' xjolom. Ke'xtiqib' li Jesus rik'in jun kaqi aq',

³ ke'jilok chi xk'atq ut ke'xye re: —Sahaq taxaq sa' aach'ool, at xreyeb' laj Judiiy! Ut ke'xtz'aji chi ruq'eb'.

⁴ Ki'elk wi' chik laj Pilaat chirix kab'l ut kixye reheb': —Ilomaq, tink'am chaq chirix kab'l re teenaw naq maajun xmaak nintaw.

⁵ Toja' naq ki'elk li Jesus chirix kab'l, wank li xkoroon k'ix ut li xkaqi aq'. —Waye' li winq! chan laj Pilaat reheb'.

⁶ Naq eb' li xb'eenil aj tij ut eb' laj k'aak'alenel ke'ril li Jesus, ke'xjap re chi xyeeb'al: —K'e chiru krus, k'e chiru krus! Kixye laj Pilaat reheb': —K'amomaq laa'ex ut k'ehomaq chiru krus, xb'aan naq laa'in maajun xmaak nintaw.

⁷ Ke'chaq'ok eb' laj Judiiy ut ke'xye: —Laa'o wank qaChaq'rab' ut jo' naxye li Chaq'rab' a'in, tento taakamq xb'aan naq xk'e rib' cho'q Ralal li Yos.

⁸ Naq kirab'i li aatin a'in, laj Pilaat q'axal chik kixiwak.

⁹ Ki'ok wi' chik sa' li raqleb'aal aatin ut kixye re li Jesus: —B'ar nakatchalk chaq? Ab'an li Jesus ink'a' kichaq'ok chiru.

¹⁰ Toja' naq laj Pilaat kixye re: —Ma ink'a' nikinaachaq'b'e laa'in? Ma ink'a' nakanaw naq wank inwankil chawach'ab'ankil ut wank ajwi' inwankil chak'eeb'al chiru krus?

¹¹ Kichaq'ok li Jesus ut kixye: —Maak'a' raj aawankil sa' inb'een, wi ta ink'a' k'eeb'il chaq aawe taqe'q; jo'kan naq q'axal nim xmaak li xq'axtesink we sa' laawuq'.

Kiteneb'aak li kamk sa' xb'een li Jesus

¹² Chalen utan laj Pilaat yo chi xsik'b'al chan raj ru naq taarach'ab'. A'ut eb' laj Judiiy ke'xjap re chi xyeeb'al: —Wi taawach'ab' a'an, maawa'at ramiiw li awab'ej. Chixjunil li naxk'e rib' cho'q rey, naxtz'eqtaana li awab'ej.

¹³ Naq laj Pilaat kirab'i eb' li aatin a'in, kixk'am li Jesus chirix kab'l ut kixk'e chi k'ojlaak sa' li raqleb'aal aatin, sa' li na'ajej “Pekunb'il Neb'aal” xk'ab'a', Gabatá nayeemank re sa' aatinob'aal hebreo.

¹⁴ A'an xkutankil li Kawunk re li Paswa, ut wa'leb' tana naq kik'ulmank a'an. Kixye laj Pilaat reheb' laj Judiiy: —Waye' leerey!

¹⁵ Ut eb' a'an ke'xjap re: —Isi chiqu, isi chiqu! K'e chiru krus! chankeb'. Kixye laj Pilaat reheb': —Ma a' leerey tink'e chiru krus? Ke'chaq'ok li xb'eenileb' aj tij ut ke'xye: —Maak'a' qarey, ka'ajwi' laj César.

¹⁶ Toja' naq kixq'axtesi sa' ruq'eb' re naq chik'ehe'q chiru krus. Ke'xchap li Jesus;

Rokik li Jesus chiru krus ut xkamik

¹⁷ ut yo chi xpaqonkil li xkrus naq koho sa' li na'ajej xB'aqel-xjolom-kamenaq xk'ab'a' (Gólgota nayeemank re sa' aatinob'aal hebreo).

¹⁸ Aran ke'xk'e chiru krus rochb'een wiib' chik winq, jun sa' xnim uq' ut jun sa' xtz'e uq'; ut li Jesus kikanaak sa' xyiheb'.

¹⁹ Laj Pilaat kixtz'iib'a ajwi' jun eetalil ut kixk'e sa' xjolom li krus. A'an a'in li kixtz'iib'a: “Li Jesus aj Nazaret, xReyeb' laj Judiiy”.

²⁰ Li eetalil a'in naab'aleb' laj Judiiy ke'ilok re, xb'aan naq li na'ajej b'arwi' kik'ehe'k chiru krus li Jesus nach' wank rik'in li tenamit; ut tz'iib'anb'il a'an sa' aatinob'aal hebreo, latín ut griego.

²¹ Jo'kan naq eb' li xb'eenil aj tij aj Judiiy ke'xye re laj Pilaat: —Maatz'iib'a naq «xReyeb' laj Judiiy»; tz'iib'a b'an naq a'an xyehok: «Laa'in xReyeb' laj Judiiy».

²² Kichaq'ok laj Pilaat: —Li xintz'iib'a, xintz'iib'a chik, chan.

²³ Naq ak xe'xk'e chiru krus li Jesus, eb' laj puub' ke'xchap li xt'ikr ut kaahib' jachal ke'risi: jun re li junjunq chi aj puub'. Ke'xchap ajwi' li xjut-aq'. Li jut-aq' maak'a' xb'ojb'al, junaj ru naq kemb'il chalen taq'a toj taqe'q.

²⁴ Jo'kan naq ke'xye chirib'ileb' rib': —Miqajachi, qab'uuliiq b'an rix re rilb'al ani taakanaaq wi'. Chi jo'kan kitz'aqlok ru li tz'iib'anb'il sa' li Santil Hu: “Xe'xjek'i li waq' chirib'ileb' rib', xe'xb'uuli rix lint'ikr”. A'eb' laj puub' ke'b'aanunk re a'an.

Li Jesus ut li xna'

²⁵ Xaqxookeb' chi xk'atq li krus li xna' li Jesus, li xchaq'na' li xna', a' lix María, rixaqil laj Kleopás, ut lix María aj Magdala.

²⁶ Naq li Jesus kiril li xna' aran rochb'een li xtzolom li q'axal raaro xb'aan, kixye re li xna': —At ixq, wa'ran laayum.

²⁷ Toja' naq kixye re li xtzolom: —Wa'ran laana'. Ut chalen sa' li honal a'an li xtzolom kixk'ul sa' rochoch.

Xkamik li Jesus

²⁸ Naxnaw li Jesus naq ak xtz'aqlok ru chixjunil; jo'kan naq kixye: —Taachaqiq we. Kixye a'in re naq chitz'aqloq ru li tz'iib'anb'il sa' li Santil Hu.

²⁹ Wank aran jun li sek' nujenaq chi vinaagr. Ke'xk'e jun xmach palaw tz'ab'il sa' vinaagr sa' ru'uj jun li che', ut ke'xtaqsi sa' re.

³⁰ Naq kiruk' li vinaagr, li Jesus kixye: —Xtz'aqlok ru. Kixxulub' li xjolom ut kixq'axtesi li Musiq'ej.

³¹ Yo li Kawunk re li Paswa naq kik'ulmank a'an; jo'kan naq eb' laj Judiiy ke'xtz'aama chiru laj Pilaat naq che'toqe'q xb'aqeleb' li ra' eb' li winq ut che'isiiq aran, re naq ink'a' te'kanaaq li kamenaq chiru krus sa' sábado, xb'aan naq xnimal kutan li sábado a'an.

³² Koheb' ut laj puub' ut ke'xtoq xb'aqel li ra' li xb'een, jo'kan ajwi' xb'aqel li ra' li jun chik li kik'ehe'k chiru krus rochb'een.

³³ Ab'anan, naq ke'wulak wan wi' li Jesus, ke'ril naq kamenaq chik; jo'kan naq ink'a' ke'xtoq xb'aqel li ra'.

³⁴ Jun reheb' laj puub' kixk'ob' li xk'atq xsa' rik'in jun li jutz' ch'iich', ut tikto ki'elk chaq kik' rik'in ha'.

³⁵ Li ki'ilok re, na'aatinak chirix, ut li naxye, a'an yaal; ut naxnaw naq yaal li naxye, re naq texpaab'anq ajwi' laa'ex.

³⁶ Chixjunil a'in kik'ulmank re naq chitz'aqloq ru li naxye li Santil Hu: “Ink'a' taatoqmanq junaq xb'aqel”.

³⁷ Naxye ajwi' li Santil Hu: “Te'xka'ya li xe'xk'ob' chi ch'iich'”.

Kimuqe'k li Jesus

³⁸ Chirix chik a'in laj José aj Arimatea, xtzolom li Jesus (ab'anan chi muqmu xb'aan xxiw chiruheb' laj Judiiy), koxtz'aama usilal chiru laj Pilaat chi xxokb'al li xtz'ejwal li Jesus. Laj Pilaat kixsume chiru, ut laj José koxxok li xch'och'el xsululel li Jesus.

³⁹ Koho ajwi' laj Nikodemo, a' li kiwulak chi q'eq rik'in li Jesus sa' xtiklajik; ut kixk'am oxib' aroow tana li miir yuub'il rik'in álohe.

⁴⁰ Ke'xxok li xtz'ejwal li Jesus ut ke'xtole sa' b'atleb' t'ikr rik'in sununkil b'an jo' k'aynaqeb' wi' chi muquk eb' laj Judiiy.

⁴¹ Sa' li na'ajej b'arwi' kik'ehe'k chiru krus li Jesus wank jun siir chi awimq ut aran wank jun muqleb'aal toj ak', ut toj maajun muqb'il chisa'.

⁴² Aran ke'xk'e li Jesus, xb'aan naq nach' wank ut ak tiklaak re li hilob'aal kutan.