San Juan 15 - Q'eqchi Bible

Li tz'aqal xtoonal li uub'

¹ “Laa'in li tz'aqal xtoonal li uub' ut linYuwa' a'an laj saab'esinel.

² Chixjunil li ruq' li ink'a' na'uuchink wik'in, narisi; ut chixjunil li na'uuchink, naxsaab'esi ru re naq numtajenaq chik taaruuchin.

³ Laa'ex ak saab'esinb'ilex xb'aan li aatin xinye eere.

⁴ Kanaaqex wik'in, ut laa'in tinkanaaq eerik'in. Jo' li ruq' che' ink'a' naru na'uuchink xjunes rib' wi ink'a' xtz'ejwalihom rib' rik'in li xtoonal, jo'kan ajwi' laa'ex wi ink'a' nekexkanaak wik'in.

⁵ “Laa'in li xtoonal li uub'; laa'ex li ruq'. Ani nakanaak wik'in ut laa'in rik'in, a'an q'axal na'uuchink, xb'aan naq wi jachjooqex wik'in maak'a' naru teeb'aanu.

⁶ Ani ink'a' nakanaak wik'in taa'isiiq jo' li ruq' che', ut taachaqiq. Ut te'xxok, te'xkut sa' xam ut taak'atmanq.

⁷ “Wi nekexkanaak wik'in ut eb' li waatin neke'kanaak eerik'in, tz'aamahomaq li teeraj ut taak'eemanq eere.

⁸ Rik'in a'in naxk'ul xloq'al linYuwa', naq q'axal chi'uuchinq leepaab'aal ut laa'exaq tz'aqal intzolom.

⁹ Jo' naq xinxra li Yuwa'b'ej, jo'kan ajwi' naq xexinra laa'in. Kanaaqex sa' linrahom.

¹⁰ Wi nekepaab' linchaq'rab', texkanaaq sa' linrahom jo' naq laa'in xinpaab' xchaq'rab' linYuwa' ut ninkanaak sa' li xrahom.

¹¹ “Xinye a'in eere re naq li xsahilal inch'ool chiwanq eerik'in ut li xsahilal eech'ool tz'aqalaq re ru.

¹² A'an a'in linchaq'rab', naq chera eerib' cherib'il eerib' jo' naq xexinra laa'in.

¹³ Maa'ani q'axal narahok jo' li naxq'axtesi li xyu'am sa' xk'ab'a'eb' li ramiiw.

¹⁴ Laa'ex li wamiiw wi nekeb'aanu li nekexintaqla wi'.

¹⁵ Ink'a' chik ninye moosej eere xb'aan naq li moosej ink'a' naxnaw li naxb'aanu laj eechal re; wamiiw b'an chik ninye eere xb'aan naq chixjunil li xwab'i chaq rik'in linYuwa', xlajink'ut cheru.

¹⁶ “Moko laa'ex ta xexsik'ok wu; laa'in b'an xinsik'ok eeru ut xexinxaqab' re texxik ut chi'uuchinq leepaab'aal, ut li taaruuchin leepaab'aal wanq chi junelik. Chi jo'kan chixjunil li teetz'aama chiru li Yuwa'b'ej sa' ink'ab'a', taak'eemanq eere.

¹⁷ A'an a'in li nekexinchaq'rab'i wi', naq chera eerib' cherib'il eerib'.

Eb' li xtzolom li Jesus ut li ruuchich'och'

¹⁸ “Wi xik' nekexril li ruuchich'och', chenawaq naq laa'in xb'enwa xik' xinril cheru laa'ex.

¹⁹ Wi ta rehex li ruuchich'och', texxra raj li ruuchich'och' jo' naq naxra li re. Ab'anan moko rehex ta li ruuchich'och', laa'in b'an xinsik'ok eeru ut xexwisi chisa': jo'kan naq xik' nekexril li ruuchich'och'.

²⁰ Jultikaq eere li aatin xinye eere: «Laj k'anjel moko nim ta xwankil chiru laj eechal re». Wi xine'xrahob'tesi laa'in, jo'kan ajwi' naq texb'aanu eere; wi xe'xk'e xch'ool chirix li waatin, jo'kan ajwi' naq te'xk'e xch'ool chirix leeraatin laa'ex.

²¹ Chixjunil a'in te'xb'aanu eere inb'aan laa'in, xb'aan naq ink'a' neke'xnaw ru li kitaqlank chaq we.

²² “Wi ta ink'a' xink'ulunk ut ink'a' ta xwaatinaheb', maak'a'eb' raj xmaak; a'ut anaqwan maak'a' k'aru te'xkol wi' rib' sa' li xmaakeb'.

²³ Ani xik' na'ilok we, xik' ajwi' naril linYuwa'.

²⁴ Wi ta ink'a' xinb'aanu li xninqal ru b'aanuhom sa' xyanqeb' li maa'ani chik kib'aanunk re, maak'a' raj xmaakeb'; a'ut anaqwan xe'ril ut xik' nikine'ril laa'in ut linYuwa'.

²⁵ Jo'ka'in xk'ulmank re naq chitz'aqloq ru li aatin tz'iib'anb'il sa' li xChaq'rab'eb' a'an: «Xik' xine'ril chi maak'a' inmaak».

²⁶ “Naq taachalq laj K'ojob'anel ch'ool li toxintaqla chaq, a' li Musiq'ej re li yaal li nachalk rik'in li Yuwa'b'ej, a'an taa'aatinaq chiwix.

²⁷ Ut laa'ex ajwi' teeye li yaal chiwix, xb'aan naq wankex wik'in chalen chaq sa' xtiklajik.