San Juan 12 - Q'eqchi Bible

Li Jesus kiyule'k rik'in sununkil b'an

¹ Sa' waqib'aq kutan li Paswa naq koho li Jesus Betania b'arwi' wank laj Lázaro, a' li kiwaklesiik chi yo'yo sa' xyanqeb' li kamenaq xb'aan li Jesus.

² Aran ewu ke'xk'e chi tzekank; lix Marta yo chi k'anjelak ut laj Lázaro a'an jun reheb' li yookeb' chi hilank sa' meex.

³ Toja' naq lix María kixk'am chaq jun liib'r chi sununkil b'an, tz'aqal naard ut q'axal terto xtz'aq; kixyul chiruheb' li roq li Jesus ut kixchaqihob'resiheb' rik'in rismal xjolom. Ut kinujak xsa' li kab'l rik'in xb'ook li sununkil b'an.

⁴ A'ut laj Judas Iskariote, jun reheb' li xtzolom, a' li taaq'axtesinq re, kixye:

⁵ —K'a' naq ink'a' xk'ayimank li sununkil b'an a'in chi o'lajuk'aal (300) tumin plaat ut xk'eemank raj reheb' li neb'a'?

⁶ Kixye a'in moko xb'aan ta naq naxraheb' li neb'a', rik'in b'an naq aj elq': rik'in wank li k'uuleb'aal tumin, ut narelq'a jo'nimal li nak'eemank chisa'.

⁷ Li Jesus kixye re: —Kanab', xb'aan naq re inmuqb'al naq kixk'uula li sununkil b'an a'in.

⁸ Xb'aan naq eb' li neb'a' junelik wanqeb' eerik'in, a'ut laa'in moko junelik ta wanqin eerik'in.

⁹ Naab'aleb' laj Judiiy ke'nawok re naq li Jesus wank aran ut koheb' rik'in, moko ka'aj ta wi' sa' xk'ab'a' li Jesus, re aj b'an wi' rilb'al laj Lázaro li kiwaklesiik chi yo'yo sa' xyanqeb' li kamenaq.

¹⁰ Ut eb' li xb'eenil aj tij ke'xk'uub' ajwi' xkamsinkil laj Lázaro,

¹¹ xb'aan naq xmaak a'an naab'aleb' laj Judiiy yookeb' chi elk sa' xyanqeb' ut a' chik li Jesus neke'xpaab'.

Rokik li Jesus Jerusalén

¹² Sa' li kutan jun chik, eb' li k'iila tenamit li ke'wulak sa' li Ninq'e ke'rab'i resil naq li Jesus chalk re Jerusalén;

¹³ jo'kan naq ke'xchap xxaq mokooch ut ke'elk chi xk'ulb'al, japjookeb' re chi xyeeb'al: —Chinimaaq xloq'al li Yos! Usilaatinanb'il taxaq li yo chi chalk sa' xk'ab'a' li Qaawa', a' li xreyeb' laj Israel!

¹⁴ Naq li Jesus koxtaw jun ch'ina b'uur, kik'ojlaak sa' xb'een jo' tz'iib'anb'il reetalil:

¹⁵ “Matxiwak, at xrab'in Sión. Il, we' chaq laaRey k'ojk'o chaq chirix ral jun li b'uur”.

¹⁶ Eb' li xtzolom ink'a' ke'xtaw ru a'in sa' xtiklajik; ab'anan, naq kinimaak xloq'al li Jesus, ke'naqk sa' xch'ool naq a'in tz'iib'anb'il chaq chirix ut a'an ajwi' li ke'xb'aanu re.

¹⁷ Li tenamit li wankeb' chaq rochb'een li Jesus naq kixb'oq laj Lázaro sa' li muqleb'aal ut kixwaklesi chi yo'yo sa' xyanqeb' li kamenaq, yookeb' chi xch'olob'ankil li ke'ril.

¹⁸ Jo'kan naq naab'aleb' ke'elk chaq chi xk'ulb'al, xb'aan naq ke'rab'i resil naq kixb'aanu li xnimal eetalil a'an.

¹⁹ Toja' naq eb' laj Pariseey ke'xye chirib'ileb' rib': —Ma nekek'e reetal naq maak'a' nekera? Ilomaq, chixjunileb' xkoheb' chirix.

Li Jesus kixye chi junxilaj naq taanimaaq xloq'al rik'in li xkamik

²⁰ Wankeb' aj griego sa' xyanqeb' li ke'taqe'k aran Jerusalén chi loq'onink sa' li Ninq'e.

²¹ Ut eb' a'in ke'jilok chi xk'atq laj Felipe, a' laj Betsaida re Galilea, ut ke'relaji ru: —Wa', tqaj rilb'al ru li Jesus, chankeb'.

²² Laj Felipe koho chi xyeeb'al re laj Andrés; laj Andrés ut laj Felipe koheb' chi xyeeb'al re li Jesus.

²³ Li Jesus kixsumeheb' ut kixye: —Xwulak xhonal naq taanimaaq xloq'al li K'ajolb'ej.

²⁴ Relik chi yaal ninye eere: wi li jun t'orol chi triiw nat'ane'k sa' ch'och', ab'an ink'a' nakamk, jun ajwi' chirib'il nakanaak; ab'anan, wi nakamk, naab'al li ru tixk'e.

²⁵ Ani naxra li xyu'am xjunes rib', taasachq chiru; a'ut li tixtz'eq chirix xch'ool li xyu'am sa' li ruuchich'och' a'in, tixk'uula a'an cho'q re li junelik yu'am.

²⁶ Wi ani naraj k'anjelak chiwu, chinxtaaqehaq, ut b'ar wanqin laa'in, aran ajwi' wanq laj k'anjel chiwu. Wi ani taak'anjelaq chiwu, taak'ehe'q xloq'al xb'aan li Yuwa'b'ej.

²⁷ “Anaqwan nayot'nak li waanm. Ut k'aru tinye: «At inYuwa', chinaakol chiru li honal a'in»? Ab'an a'an aj e naq xinchalk: re li honal a'in!

²⁸ At inYuwa', chanima xloq'al laak'ab'a'”. Toja' naq kichalk jun xyaab' kuxej sa' choxa: “Ak xinnima xloq'al ut tinnima wi' chik”, chan.

²⁹ Eb' li tenamit li wankeb' aran, naq ke'rab'i a'an, ke'xye naq kaaq li x'eek'ank. Junch'oleb' chik ke'xye: “Jun ánjel x'aatinak rik'in”.

³⁰ Kichaq'ok li Jesus ut kixye: —Moko cho'q we ta naq xchalk li xyaab' kuxej a'in, cho'q eere b'an laa'ex.

³¹ Anaqwan taaraqe'q aatin sa' xb'een li ruuchich'och' a'in. Anaqwan laj Taqlanel sa' xb'een li ruuchich'och' a'in taakute'q chi najt.

³² Ut naq laa'in tintaqsiiq sa' xb'een ch'och', teb'ink'am chaq chixjunileb' wik'in.

³³ Kixye a'in re xk'eeb'al chi nawe'k chanru naq taakamq.

³⁴ Kisumeek xb'aaneb' li tenamit: —Laa'o xqab'i sa' li Chaq'rab' naq li Kriist wanq chi junelik. Chan put ru naq nakaye laa'at: «Tento taataqsiiq li K'ajolb'ej»? Ani li K'ajolb'ej a'an? chankeb'.

³⁵ Kixye li Jesus reheb': —Toj jun k'amok chik taawanq li saqenk sa' eeyanq. Chexb'eeq naq toj wanq eesaqenk, re naq ink'a' tolexxtaw li aak'ab': ani nab'eek sa' li aak'ab', ink'a' naxnaw b'ar yo chi xik.

³⁶ Naq toj wank leesaqenk, paab'omaq li saqenk re naq tex'ok cho'q ralal xk'ajol li saqenk. Jo'ka'in ki'aatinak li Jesus; chirix chik a'an ki'elk ut koxmuq rib' chiruheb'.

Eb' laj Judiiy ink'a' ke'xpaab' li Jesus

³⁷ Us ta naab'al li eetalil kixb'aanu li Jesus chiruheb', ab'an ink'a' ke'xpaab',

³⁸ re naq chitz'aqloq ru li aatin kixye li propeet Isaías: “Qaawa', ani xpaab'ank re li qaatin? Ut li xnimal xwankil li Qaawa' ani xk'ute' wi'?”.

³⁹ Ink'a' kiru ke'paab'ank xb'aan naq yeeb'il ajwi' chaq xb'aan laj Isaías:

⁴⁰ “Kixmutz'o'b'resiheb' li ru ut kixkawub'resi xch'ooleb', re naq ink'a' te'iloq rik'ineb' li ru, chi moko te'xtaw ru sa' xch'ooleb', chi moko te'yot'e'q xch'ool ut laa'in teb'ink'irtasi raj”.

⁴¹ A'in kixye laj Isaías xb'aan naq kiril li xnimal xloq'al ut ki'aatinak chirix.

⁴² Wankeb' ajwi' naab'aleb' sa' xyanqeb' li xb'eenil li tenamit ke'xpaab' li Jesus; ab'anan eb' a'an ink'a' neke'xye chi kutankil xb'aaneb' laj Pariseey re naq ink'a' te'isiiq sa' li ch'utleb'aal kab'l:

⁴³ xb'aan naq a' chik li loq'al li neke'xk'e eb' li tenamit ke'xra chiru li loq'al nachalk rik'in li Yos.

⁴⁴ Toja' naq kixye li Jesus chi kaw xyaab' xkux: —Ani napaab'ank we, moko laa'in ta nikinxpaab', a' b'an li kitaqlank chaq we;

⁴⁵ ut li na'ilok wu, a' li kitaqlank chaq we naril ru.

⁴⁶ Laa'in li saqenk ut xinchalk sa' ruuchich'och' re naq chixjunil li taapaab'anq we, ink'a' tkanaaq sa' li aak'ab'.

⁴⁷ Wi ani na'ab'ink reheb' li waatin ut ink'a' naxk'uulaheb' sa' xch'ool, moko laa'in ta ninraqok aatin sa' xb'een: xb'aan naq ink'a' xinchalk chi raqok aatin sa' xb'een li ruuchich'och', xinchalk b'an chi xkolb'al li ruuchich'och'.

⁴⁸ Ani natz'eqtaanank we ut ink'a' naxk'ulub'an eb' li waatin, wank ani taaraqoq aatin sa' xb'een: li Aatin xinye, a'an li taaraqoq aatin sa' xb'een sa' roso'jikeb' li kutan.

⁴⁹ “Xb'aan naq moko xin'aatinak ta injunes wib', a' b'an li Yuwa'b'ej li kitaqlank chaq we xinxchaq'rab'i k'aru tinye ut k'a' chi aj ix tin'aatinaq;

⁵⁰ ut laa'in ninnaw naq li xchaq'rab', a'an junelik yu'am. Jo'kan naq li k'aru ninye, ninye jo' chanru xye chaq we li Yuwa'b'ej”.