San Juan 11 - Q'eqchi Bible

Li xwaklijik chi yo'yo laj Lázaro

¹ Kiyajerk jun li winq, aj Lázaro xk'ab'a', aj Betania, xk'aleb'aaleb' lix María ut lix Marta li xchaq'na'.

² Lix María a'an li kiyuluk re li Qaawa' rik'in sununkil b'an ut kixmes li roq rik'in rismal xjolom; ut li ras a'an yaj, aj Lázaro xk'ab'a'.

³ Eb' li ranab' ke'xtaqla xyeeb'al re li Jesus: —Qaawa', li nakara laa'at a'an yaj.

⁴ Naq kirab'i a'in, li Jesus kixye: —Li yajel a'in moko re ta kamk, re b'an xnimal xloq'al li Yos, re naq taanimaaq xloq'al li Ralal li Yos xb'aan a'an.

⁵ Li Jesus naxra lix Marta, jo'wi' li riitz'in ut laj Lázaro;

⁶ ab'an, naq kirab'i resil naq yaj laj Lázaro, toj kikanaak wiib' kutan chik sa' li na'ajej a'an.

⁷ Chirix chik a'an kixye reheb' li xtzolom: —Yo'qeb' wi' chik Judea.

⁸ Kiyehe'k ut re xb'aaneb' li xtzolom: —At Tzolonel, toje' xe'raj raj aakamsinkil chi pek eb' laj Judiiy. Ma tatxik wi' chik aran?

⁹ Kichaq'ok li Jesus ut kixye reheb': —Ma ink'a' tab'i' kab'laju honal wank re li kutan? Wi junaq winq nab'eek chi kutan, ink'a' taatichk'oq xb'aan naq naril li xsaqenk li ruuchich'och' a'in;

¹⁰ ab'an wi nab'eek sa' q'oqyink, taatichk'oq xb'aan naq maak'a' xsaqenk rik'in.

¹¹ Chirix chik a'an kixye wi' chik: —Laj Lázaro li qamiiw yo chi wark; ab'anan xik we chi rajsinkil.

¹² Kiyehe'k ut re xb'aaneb' li xtzolom: —Qaawa', wi yo chi wark, taak'iraaq.

¹³ Li Jesus a' li xkamik kixye reheb', a'ut eb' a'an ke'xk'oxla naq a' li hilank li naxk'e li wark kixye.

¹⁴ Toja' naq li Jesus ki'aatinak chi ch'olch'o ru: —Laj Lázaro kamenaq chik,

¹⁵ ut nasaho'k inch'ool eeb'aan laa'ex rik'in naq maa'anihin chaq aran, re naq teepaab'. Ab'anan, yo'qeb' rik'in, chan.

¹⁶ Toja' naq laj Tomás, a' li Lut nayeemank re, kixye reheb' li rech tzolonelil: —Yo'qeb' ajwi' laa'o re naq tookamq qochb'een.

¹⁷ Naq kiwulak li Jesus, ak kaahib'aq kutan chik xmuqb'al laj Lázaro naq koxtaw.

¹⁸ Betania nach' wank rik'in Jerusalén, mero leew tana xnajtil,

¹⁹ ut naab'aleb' laj Judiiy ke'wulak sa' rochoch lix Marta ut lix María re xk'ojob'ankileb' xch'ool chirix xkamik li raseb'.

²⁰ Naq kirab'i lix Marta naq li Jesus yo chi chalk, ki'elk chi xk'ulb'al, ut lix María kikanaak sa' kab'l.

²¹ Kixye lix Marta re li Jesus: —Qaawa', wi ta wankat arin, ink'a' raj xkamk li was.

²² Ab'an, anaqwan ajwi', ninnaw naq chixjunil li taatz'aama chiru li Yos, tixk'e aawe li Yos.

²³ Kixye li Jesus re: —Laawas taawakliiq wi' chik chi yo'yo.

²⁴ Kichaq'ok lix Marta: —Ninnaw naq taawakliiq wi' chik sa' xwaklijikeb' chi yo'yo li kamenaq, sa' roso'jikeb' li kutan, chan.

²⁵ Kixye li Jesus re: —Laa'in li wakliik wi' chik chi yo'yo ut li yu'am. Ani napaab'ank we, us ta taakamq, taawanq xyu'am,

²⁶ ut chixjunil li yo'yo ut nikinxpaab' maajaruj taakamq. Ma nakapaab' a'in?

²⁷ Kichaq'ok a'an ut kixye: —Hehe', Qaawa'. Laa'in ninpaab' naq laa'at li Kriist, li Ralal li Yos, li tento taak'ulunq sa' ruuchich'och'.

²⁸ Naq ak xye a'in, koho chi xb'oqb'al lix María, li riitz'in, ut koxye sa' xxik: —Laj Tzolonel wank le'; yo chab'oqb'al.

²⁹ Lix María, ka'ajwi' kirab'i, kixaqliik sa' junpaat ut koho rik'in.

³⁰ Toj maji' nawulak li Jesus sa' li k'aleb'aal ut toj wank sa' li na'ajej b'arwi' koxk'ule'q xb'aan lix Marta.

³¹ Naq ke'ril naq lix María kixaqliik sa' junpaat ut ki'elk, eb' laj Judiiy li wankeb' chaq sa' kab'l chi xk'ojob'ankil xch'ool ke'xtaaqe: sa' xch'ooleb' naq koho chi yaab'ak wan wi' li muqleb'aal.

³² Lix María kiwulak wan wi' li Jesus, ut naq kiril ru, kixkut rib' chi roq ut kixye re: —Qaawa', wi ta wankat arin, ink'a' raj xkamk li was.

³³ Li Jesus kiril naq yo chi yaab'ak ut te'yaab'aq ajwi' eb' laj Judiiy li ke'chalk chirix; jo'kan naq kixjiq' xch'ool ut sachaamil xna'leb' kikanaak:

³⁴ —B'ar xek'e? chan. Ke'xsume ut ke'xye: —Qaawa', kim ut toxaawil.

³⁵ Li Jesus ki'ok chi yaab'ak.

³⁶ Ut eb' laj Judiiy ke'xye: —Ilomaq k'ajo' naq naxra.

³⁷ Ab'anan wank ke'yehok: —A'an li kitehok xsa' ru li mutz', ma ink'a' raj xru chi xkolb'al laj Lázaro chiru li kamk?

³⁸ Toja' naq li Jesus kixjiq'jiq'i wi' chik xch'ool ut koho wan wi' li muqleb'aal. A'an jun li ochoch pek ut wank jun pek chire.

³⁹ —Isihomaq li pek, chan li Jesus. Kichaq'ok lix Marta, ranab' li kamenaq: —Qaawa', xchuho': ak kaahib' kutan rokik arin, chan re.

⁴⁰ Kixye li Jesus re: —Ma ink'a' xinye aawe: «Wi nakapaab', taawil li xnimal xloq'al li Yos»?

⁴¹ Ke'risi li pek. Toja' naq li Jesus kixtaqsi li rilob'aal sa' choxa ut kixye: —At inYuwa', ninyoxi chawu naq xinaawab'i.

⁴² Ak ninnaw laa'in naq junelik nikinaawab'i, ab'anan xinye a'in xb'aaneb' li tenamit neke'sutuk we, re naq te'xpaab' naq laa'at kattaqlank chaq we.

⁴³ Naq kiraqe'k chi xyeeb'al a'in, kixjap re chi kaw xyaab' xkux: —Lázaro, elen chaq, chan.

⁴⁴ Ut li kamenaq ki'elk chaq, b'ak'b'ookeb' li roq ruq' rik'in li t'ikr ut lanlo li xnaq' ru chi sut. Kixye li Jesus reheb': —Hitomaq ut kanab'omaq chi b'eek.

Eb' laj Judiiy ke'xk'uub' xkamsinkil li Jesus

⁴⁵ Naab'aleb' laj Judiiy li ke'wulak sa' rochoch lix María, ke'xpaab' li Jesus naq ke'ril li kixb'aanu.

⁴⁶ Ab'anan wankeb' ajwi' koxe'xye reheb' laj Pariseey li kixb'aanu li Jesus.

⁴⁷ Toja' naq li Xb'eenileb' aj tij ut eb' laj Pariseey ke'xch'utub' rib' chi k'uub'ank ut ke'xye: —K'aru tqab'aanu? Xb'aan naq li winq a'in naab'al xninqal ru eetalil naxb'aanu.

⁴⁸ Wi taaqakanab' chi jo'kan, chixjunileb' te'paab'anq re, ut te'chalq eb' laj Roma, tole'xjuk' li qaSantil Na'aj jo' ajwi' li qatenamit.

⁴⁹ Jun reheb' a'an, aj Kaifás xk'ab'a', xyuwa'il aj tij sa' li chihab' a'an, kixye reheb': —Laa'ex tik maak'a' nekenaw,

⁵⁰ chi moko nekek'e reetal naq q'axal us cho'q eere naq taakamq jun chi winq sa' xk'ab'a'eb' li tenamit chiru naq taa'oso'q chixjunil li tenamit.

⁵¹ Ut a'in moko yal ta xjunes rib' naq kixye, kixye b'an jo' propeet, naq wan chaq cho'q xyuwa'il aj tij; kixye chi junxilaj naq li Jesus taakamq chirix li tenamit,

⁵² ut moko ka'aj ta wi' chirix li tenamit, re aj b'an wi' xch'utub'ankil sa' junajil eb' li ralal xk'ajol li Yos li neke'cha'chotk.

⁵³ Ut chalen sa' li kutan a'an ke'xk'uub' xkamsinkil.

⁵⁴ Jo'kan naq li Jesus ink'a' chik nab'eek chi kutankil sa' xyanqeb' laj Judiiy, ki'elk b'an aran ut koho sa' li na'ajej nach' rik'in li chaqich'och', sa' li tenamit Efraín xk'ab'a', ut aran kikanaak rochb'eeneb' li xtzolom.

Haye'k re li Paswa

⁵⁵ Taanach'oq chaq li Paswa, xninq'eheb' laj Judiiy, ut naab'aleb' li wankatqeb' sa' li na'ajej a'an ke'taqe'k Jerusalén rub'elaj li Paswa chi xch'ajob'resinkileb' rib'.

⁵⁶ Yookeb' chi xsik'b'al li Jesus ut naq wankeb' sa' rochoch li Yos, neke'xyehatq chirib'ileb' rib': —K'aru nekeye? Ma ink'a' anchal taachalq sa' li ninq'e?

⁵⁷ Li Xb'eenileb' aj tij ut eb' laj Pariseey ak xk'ehomeb' jun li chaq'rab': “Wi ani taanawoq re b'ar wanq, chixyehaq resil re naq taachapmanq”.