Josué 6 - Q'eqchi Bible

Kichape'k li tenamit Jerikó

¹ Maa'ani na'elk chi moko na'ok Jerikó, xb'aan naq tz'aptz'ookeb' chi us li rokeb'aal li tenamit xb'aan xxiweb' chiruheb' laj Israel.

² Ab'an li Qaawa' kixye re laj Josué: “K'e reetal, laa'in tink'e sa' laawuq' li tenamit Jerikó jo'wi' li x'awab'ej.

³ Jo'k'ihalex yo'oon wankex chi yalok, sutumaq rix li tenamit. Jo'ka'in teeb'aanu chiru waqib' kutan.

⁴ Aj k'amolb'ehaqeb' chiru li Loq'laj Kaax wuqub' chi aj tij li te'k'amoq junjunq xxukub'eb' li karneer cho'q tronpeet. Sa' xwuq li kutan teesuti li tenamit wuqub' sut ut eb' laj tij te'xyaab'asiheb' li xtronpeet.

⁵ Naq te'ok chi eek'ank li xukub' ut teerab'i chi eek'ank li tronpeet, chixjunil li tenamit te'xjap reheb' chi kaw, ut li xsuttz'akil Jerikó taat'ane'q. Toja' naq jun xikikaqex chi tiik sa' xb'een Jerikó”, chan.

⁶ Laj Josué, ralal laj Nun, kixb'oqeb' laj tij ut kixye reheb': “Chapomaq li xLoq'laj Kaaxil li Sumwank, ut wuqub' eere te'xk'ameb' li xxukub' karneer chi uub'ej chiru li Loq'laj Kaax”, chan.

⁷ Ut kixye re li tenamit: “Chejunilex texxik chi xsutinkil li tenamit, ut eb' li wankeb' xch'iich' te'xik chi uub'ej chiru li xLoq'laj Kaax li Qaawa'”, chan.

⁸ Chixjunileb' ke'xb'aanu jo' kiyehe'k reheb' xb'aan laj Josué. Li wuqub' chi aj tij aj k'amolb'eheb' chiru li xLoq'laj Kaaxil li Sumwank, yookeb' chi xyaab'asinkil eb' li xtronpeet, ut li Loq'laj Kaax yo chi xik chirixeb'.

⁹ Eb' li wankeb' xch'iich' aj k'amolb'eheb' chiruheb' laj tij li yookeb' chi xyaab'asinkil eb' li xtronpeet; ut li xk'ihaleb' li tenamit yookeb' chi xik chirix li Loq'laj Kaax, yo ajwi' xyaab'eb' li tronpeet chi junelik.

¹⁰ Laj Josué ak xyehom reheb' li tenamit chi jo'ka'in: “Meechaj eere, mi'ab'iik xyaab' leekux. Mi'elk junaq aatin chi xtz'uumal eere toj tinye laa'in: Chajomaq eere. Tojo' naq teechaj eere”, chan laj Josué.

¹¹ Toja' naq li xLoq'laj Kaax li Qaawa' kixsuti li tenamit; chirix chik a'an eb' laj Israel ke'sutq'iik chaq sa' li xmuheb'aaleb' ut aran ke'xnumsi li q'oqyink.

¹² Jo' wulajaq chik, eq'la, kiwakliik laj Josué, ut eb' laj tij ke'xchap li xLoq'laj Kaax li Qaawa'.

¹³ Aj k'amolb'eheb' chiru li Loq'laj Kaax li wuqub'eb' chi aj tij li neke'k'amok re li wuqub' chi xxukub' karneer, yookeb' chi b'eek ut xyaab'asinkil eb' li xtronpeet. Eb' li wankeb' xch'iich' wankeb' chaq chi uub'ej, ut li xk'ihaleb' li tenamit yookeb' chi xik chirix li xLoq'laj Kaax li Qaawa'. Jun sut chik ki'ab'iik xyaab'eb' li tronpeet.

¹⁴ Sa' xkab' li kutan jun sut chik ke'xsuti li tenamit ut ke'sutq'iik chaq wi' chik sa' li xmuheb'aaleb'. Jo'ka'in ke'xb'aanu chiru waqib' kutan.

¹⁵ Sa' xwuq li kutan, naq kihik'e'k, ke'wakliik ut wuqub' sut ke'xsuti li tenamit jo' k'aynaqeb' xb'aanunkil. Ka'ajwi' sa' li kutan a'an ke'xsuti li tenamit wuqub' sut.

¹⁶ Naq eb' laj tij ke'xyaab'asi li tronpeet sa' li xwuq sut, laj Josué kixye re li tenamit: “Chajomaq eere xb'aan naq li Qaawa' xq'axtesi li tenamit sa' leeruq'!

¹⁷ Li tenamit a'in ut chixjunil li k'a'aq re ru wank chisa', sachb'ilaq ru chi junajwa sa' xk'ab'a' li Qaawa'. Ka'ajwi' lix Rajab laj yumb'eet taakanaaq chi yo'yo rochb'eeneb' li wankeb' sa' rochoch, xb'aan naq kixmuqeb' li winq kiqataqlaheb' chaq chi k'ehok eetal.

¹⁸ A'ut laa'ex, chek'e reetal. Maak'a' teexok, chi moko teerahi ru li k'a' re ru ak q'axtesinb'il re sache'k. Wi teeb'aanu a'an, teeb'oq chaq li majewaak ut li rahilal sa' xb'eeneb' chixjunil li xmuheb'aaleb' laj Israel.

¹⁹ Chixjunil li plaat, oor ut jo'nimal yiib'anb'il rik'in q'anch'iich' ut ch'iich', q'axtesinb'ilaq re li Qaawa'. Tento taa'ok sa' li reechanihom”, chan laj Josué.

²⁰ Li tenamit ke'xchaj reheb' ut ke'yaab'asimank li tronpeet. Naq eb' laj Israel ke'rab'i xyaab'eb' li tronpeet, k'ajo' naq ke'xchaj reheb'! Li xsuttz'akil Jerikó ki'uq'je'k ut chixjunileb' ke'xkut rib' chi tiik sa' xb'een li tenamit, ut koxe'reechani.

²¹ Chirix chik a'an ke'xkamsiheb' li winq, li ixq, li saajeb' ut cheekeb'; jo'kan ajwi' eb' li b'ooyx, li karneer ut li b'uur. Chixjunil kisache'k ru chi junajwa.

²² Laj Josué ak xyehom reheb' li wiib' chi winq li ke'k'ehok reetal li tenamit Jerikó: “Okanqex sa' rochoch laj yumb'eet ut isihomaq chaq li ixq a'an rochb'een chixjunileb' li xkomon, jo' eeyehom re sa' jurament”, chan.

²³ Jo'kan naq koheb' li wiib' aj k'ehol eetal ut ke'risi chaq lix Rajab, li xna' xyuwa', eb' li ras riitz'in ut chixjunileb' li xkomon. Ke'risi ajwi' jo'k'ihaleb' li wankeb' sa' xjunkab'al ut ke'xk'ameb' toj chirix li xmuheb'aaleb' laj Israel.

²⁴ Toja' naq ke'xk'e xxamlel li tenamit rochb'een chixjunil li k'aru wank chisa'. Ka'ajwi' li plaat, li oor ut li k'a'aq re ru yiib'anb'il rik'in q'anch'iich' ut ch'iich' ke'xxok ut ke'xk'uula sa' rochoch li Qaawa'.

²⁵ Ab'an lix Rajab laj yumb'eet jo' ajwi' li xjunkab'al li xyuwa' ut chixjunileb' li xkomon ke'kole'k xb'aan laj Josué. Lix Rajab kikanaak sa' xyanqeb' laj Israel chalen anaqwan, xb'aan naq kixmuqeb' laj k'ehol eetal taqlanb'ileb' xb'aan laj Josué re xk'eeb'al reetal Jerikó.

²⁶ Sa' li kutan a'an laj Josué kixye a'in sa' jurament: “Majewanb'ilaq chiru li Qaawa' li winq li taawakliiq ut tixwaklesi wi' chik li tenamit Jerikó! Rik'in xkamik li xb'een ralal tixtoj rix li xk'ojob'ankil li rub'elankil li tenamit, ut rik'in xkamik li xch'iip tixtoj rix li xyiib'ankil li rokeb'aal”, chan.

²⁷ Li Qaawa' kixtenq'a laj Josué, ut yalaq b'ar kiwulak resil li k'aru kixb'aanu.