Josué 4 - Q'eqchi Bible

Eb' li kab'laju chi pek

¹ Naq ak xe'nume'k chixjunil li tenamit junpak'al li nima' Jordán, li Qaawa' kixye re laj Josué:

² “Sik'omaqeb' ru kab'laju chi winq sa' xyanq li tenamit, junjunq re li junq teep,

³ ut taaye reheb': Sa' li nima' Jordán, b'arwi' xe'xaqliik eb' laj tij, xokomaq kab'laju chi pek li teek'am ut toxeek'e sa' li na'ajej b'arwi' texhilanq chiru li q'oqyink a'in”.

⁴ Toja' naq laj Josué kixb'oqeb' li kab'laju chi winq li kixsik'eb' ru sa' xyanqeb' li junq teep aj Israel,

⁵ ut kixye reheb': “Numenqex chiru li xLoq'laj Kaax li Qaawa' leeYos, toj sa' xyi li nima' Jordán, ut chejunjunqal paqomaq junaq pek, a' yaal jarub'eb' li xteepaleb' laj Israel,

⁶ re naq a'anaq jun li loq'laj eetalil sa' eeyanq. Naq wulaj kab'ej leeralal eek'ajol te'xpatz' eere: «K'aru xyaalal eb' li pek a'in?», cha'qeb',

⁷ teeye reheb': «Li xha'ul li nima' Jordán kixjach rib' chiru li xLoq'laj Kaaxil li Sumwank naq kinume'k junpak'al. Eb' li pek a'in a'an reetalil chiruheb' laj Israel, re naq jultikaq reheb' chi junelik li k'aru kixb'aanu li Yos»”.

⁸ Jo'ka'in ke'xb'aanu eb' laj Israel, tz'aqal jo' chanru kixye laj Josué: ke'xxok kab'laju chi pek sa' li nima' Jordán, jo' chanru xk'ihal li xteepaleb' laj Israel, kama' kichaq'rab'iik laj Josué xb'aan li Qaawa'. Ke'xk'am eb' li pek ut ke'xch'utub' sa' li na'ajej b'arwi' tento xnumsinkil li q'oqyink.

⁹ Laj Josué kixxaqab' ajwi' kab'laju chi pek sa' xyi li nima' Jordán, b'arwi' ke'xaqliik laj tij aj k'amoneleb' re li xLoq'laj Kaaxil li Sumwank. Ut eb' li pek a'an toj wankeb' aran anaqwan.

¹⁰ Eb' laj tij aj k'amoneleb' re li Loq'laj Kaax ke'kanaak chi xaqxo sa' xyi li nima' Jordán toj ke'xb'aanu chixjunil li kixye laj Josué re li tenamit sa' xk'ab'a' li Qaawa'. Ut eb' li tenamit ke'xseeb'a rib' chi nume'k.

¹¹ Ka'ajwi' ke'nume'k chixjunil li tenamit, ke'nume'k ajwi' eb' laj tij aj k'amoneleb' re li xLoq'laj Kaax li Qaawa', ut ke'q'axonk chi uub'ej chiruheb' li tenamit.

¹² Eb' laj Rubén, eb' laj Gad ut li xyiijachil xteepaleb' laj Manasés ke'nume'k chi tustu chiruheb' laj Israel, jo' yeeb'il reheb' xb'aan laj Moisés.

¹³ Ke'nume'k tana ka'k'aal mil chi aj puub' ak kawresinb'ileb' chi yalok. Ke'nume'k chiru li Qaawa' ut koheb' sa' xtaq'ahil Jerikó.

¹⁴ Sa' li kutan a'an li Qaawa' kixnimob'resi xloq'al laj Josué chiruheb' chixjunil laj Israel; ut eb' li tenamit ke'x'oxloq'i laj Josué jo' naq ke'x'oxloq'i chaq laj Moisés chiru chixjunil li xyu'am.

¹⁵ Toja' naq li Qaawa' kixye re laj Josué:

¹⁶ “Ye reheb' laj tij aj k'amoneleb' re li xLoq'laj Kaaxil li Sumwank naq te'elq sa' li nima' Jordán”, chan.

¹⁷ Laj Josué kixye a'an reheb' laj tij.

¹⁸ Ut naq eb' laj tij aj k'amoneleb' re li xLoq'laj Kaaxil li Sumwank ke'elk sa' li nima' Jordán, ka'ajwi' ke'xyeq' li ch'och' chire li nima', kixjunaji wi' chik rib' li ha' sa' li xna'aj ut ki'ok chi b'eek chi kaw roq jo' naq xwank.

Eb' laj Israel ke'wulak Kilkal

¹⁹ Li tenamit ke'elk sa' li nima' Jordán sa' li lajeeb' xb'e li xb'een po ut koxe'hilanq Kilkal, sa' releb'l li saq'e sa' xka'yab'aal Jerikó.

²⁰ Sa' ajwi' li na'ajej a'an laj Josué kixxaqab' li kab'laju chi pek isinb'ileb' sa' li nima' Jordán,

²¹ ut kixye reheb' laj Israel: “Naq wulaj kab'ej leeralal eek'ajol te'xpatz' eere: «K'aru xyaalal eb' li pek a'in?», cha'qeb',

²² teech'olob' chiruheb' ut teeye: «Chaqi ru li b'e ke'nume'k wi' eb' laj Israel junpak'al li nima' Jordán», cha'qex.

²³ Xb'aan naq li Qaawa' leeYos kixchaqihob'resi li nima' cheru toj reetal kexnume'k chaq. A'an ajwi' kixb'aanu chaq li Qaawa' leeYos sa' li Kaqipalaw: kixchaqihob'resi toj reetal koonume'k chaq.

²⁴ Chi jo'kan chixjunileb' li tenamit li wankeb' sa' ruuchich'och' te'xk'e reetal li xnimal xwankil li Qaawa', ut laa'ex junelik teeroxloq'i li Qaawa' leeYos”.