Josué 16 - Q'eqchi Bible

Li xteepal laj Efraín

¹ Li na'ajej li ke'reechani eb' li ralal xk'ajol laj José natiklaak chaq sa' releb'l saq'e wan wi' li nima' Jordán, sa' xjayal Jerikó (a' li xha'il Jerikó), sa' li chaqich'och' nataqe'k Jerikó toj sa' li xtzuulul Betel.

² Chirix chik a'an na'elk Betel ut naxik Lus, nanume'k sa' li xnub'ajleb' laj Arkit toj Atarot;

³ nakub'eek sa' xjayal rokeb'l saq'e wan wi' li xnub'ajleb' laj Jaflet, toj sa' xnub'ajl Bet-Jorón taq'a ut Késer, ut nokox'elq sa' li palaw.

⁴ A'an a'in li reechanihomeb' li ralal xk'ajol laj José, laj Manasés ut laj Efraín.

⁵ A'an a'in li xnub'ajl li xna'ajeb' li ralal xk'ajol laj Efraín, chi ch'uutal: sa' releb'l saq'e, li nub'ajl a'an li tenamit Atrot-Arak toj Bet-Jorón taqe'q,

⁶ ut nokox'elq sa' li palaw. Sa' releb'l iq', li nub'ajl a'an li tenamit Mikmetat; chirix chik a'an naxik sa' releb'l saq'e toj Tahanat Siló, ut nokoxnume'q sa' xjayal releb'l saq'e re Yanóhaj;

⁷ na'elk Yanóhaj, nakub'eek Atarot ut Nahará, nokoxnume'q Jerikó ut nokoxraqe'q sa' li nima' Jordán.

⁸ Chalen Tapúhaj li nub'ajl naxik sa' rokeb'l saq'e wan wi' li nima' re Kaná ut nokoxraqe'q sa' li palaw. A'an a'in li reechanihom li xteepal laj Efraín, chi ch'uutal.

⁹ Wankeb' ajwi' tenamit ut k'aleb'aal, sa' xch'och'eb' laj Efraín, li ke'k'ehe'k reheb' li ralal xk'ajol laj Efraín.

¹⁰ Ab'an eb' laj Efraín ink'a' ke'risiheb' laj Kanahán li wankeb' Késer, ke'xkanab'eb' b'an aran. Chi jo'kan toj wankeb' sa' xyanqeb' laj Efraín toj anaqwan, ab'anan k'eeb'ileb' sa' kawil k'anjel.