Josué 15 - Q'eqchi Bible

Li xteepal laj Judá

¹ A'an a'in li ch'och' kik'ehe'k rik'in b'uulink reheb' li ralal xk'ajol laj Judá, chi ch'uutal. Li na'ajej a'in natiklaak chaq sa' xnub'ajl Edom ut sa' li chaqich'och' re Sin, sa' xjayal rokeb'l iq', ut nawulak toj Kadés, sa' rokeb'l iq'.

² Li xnub'ajlil sa' xjayal rokeb'l iq' na'elk chaq sa' xmaril li Atz'aminb'il Palaw, tz'aqal sa' xtiklajik;

³ chirix a'an naxik sa' li Taqsink reheb' laj Xook', nanume'k toj Sin ut naxik sa' xjayal rokeb'l iq' re Kadés-Barné; nanume'k Jesrón, nataqe'k toj Adar ut nasutq'iik wi' chik Karká;

⁴ nanume'k wan wi' Asmón, naxik sa' xjayal li nima' re Ejiipt toj sa' li palaw. A'anaq a'in leenub'ajl laa'ex sa' rokeb'l iq'.

⁵ Sa' releb'l saq'e li nub'ajl a'an li Atz'aminb'il Palaw toj sa' li rokeb'l li nima' Jordán. Li nub'ajl sa' releb'l iq' natiklaak chaq chire li palaw, chi xk'atq li rokeb'l li ha' li nima' Jordán.

⁶ Li nub'ajl nataqe'k Bet-Joklá, nanume'k sa' xjayal releb'l iq' re Bet-Arabá ut nataqe'k toj sa' xb'een xPekil Tzuul laj Boján, ralal laj Rubén.

⁷ Li nub'ajl nataqe'k chalen chaq sa' xtaq'ahil Akor toj Debir, ut naxik wi' chik sa' releb'l iq' wan wi' xsutam li pek sa' xjayal li taqsink re Adumín, sa' xjayal rokeb'l iq' re li Nima'. Li xnub'ajl nanume'k sa' li ha' re En-Semes ut nokox'elq En-Rokel.

⁸ Chirix chik a'an naxik sa' xtaq'ahil Ben-Hinón, sa' rokeb'l iq', toj sa' xb'een xTel laj Jebús, naraj naxye toj Jerusalén. Sa' rokeb'l saq'e li xnub'ajl nawulak toj sa' xb'een li tzuul li wank sa' xjayal li xTaq'ahil Hinón, tz'aqal sa' releb'l iq' re li xTaq'ahil Refaín.

⁹ Li nub'ajl naxb'ach' chaq rib' sa' xtaqeq'il li tzuul toj sa' li roq nima' Neftohaj ut naxik toj sa'eb' li tenamit re Efrón, re xjalb'al wi' chik xb'e sa' xjayal Bahalá, malaj Kiryat-Yeharín.

¹⁰ Aran Bahalá li nub'ajl naxb'ach' rib' sa' xjayal rokeb'l saq'e toj sa' li tzuul Seír ut nanume'k chiru tzuul sa' xjayal releb'l iq' re Yeharín malaj Kesalón, nakub'eek Bet-Semes, nanume'k Timná,

¹¹ naxik sa' xjayal releb'l iq' re Ekrón, naxb'ach' rib' re xik Sikarón, nanume'k sa' li tzuul Bahalá ut nawulak toj Yabnel. Li nub'ajl nokoxraqe'q sa' li palaw.

¹² Li nub'ajl sa' rokeb'l saq'e a'an li Nimla Palaw. A'an a'in li xnub'ajl li xch'och'eb' li ralal xk'ajol laj Judá, chi ch'uutal.

Laj Kaleb kixchap Hebrón ut Debir

¹³ Laj Josué kixk'e xna'aj laj Kaleb, ralal laj Jefuné, sa' xyanqeb' li ralal xk'ajol laj Judá, jo' kiyehe'k re xb'aan li Qaawa'. Li xna'aj laj Kaleb a'an Kiryat-Arbá malaj Hebrón, a' li xtenamit li xyuwa' laj Anak.

¹⁴ Laj Kaleb kirisiheb' aran li oxib' chi ralal laj Anak: laj Sesay, laj Ajimán ut laj Talmay, ralal xk'ajoleb' laj Anak.

¹⁵ Chirix chik a'an ki'elk aran ut koho wankeb' wi' laj Debir, li Kiryat-Séper naxk'ab'a'in najter.

¹⁶ Toja' naq kixye laj Kaleb: “Ani taaq'axoq ru li tenamit Kiryat-Séper ut toxchap, laa'in tink'e lix Aksá linrab'in cho'q rixaqil”, chan.

¹⁷ Li ki'eechanink re li tenamit, a'an laj Otoniel, ralal laj Kenás, riitz'in laj Kaleb. Jo'kan naq laj Kaleb kixk'e lix Aksá li xrab'in cho'q rixaqil.

¹⁸ Naq xikaq re sa' rochoch laj Otoniel, a'in kixye re lix Aksá naq tixtz'aama chiru li xyuwa' naq tixk'e xch'och' re awk. Toja' naq li ixq kikub'eek chirix li xb'uur ut laj Kaleb kixpatz' re: “K'aru taawaj?”, chan.

¹⁹ Kichaq'ok a'an ut kixye: “Nintz'aama jun xnimal usilal chawu. Laa'at xak'e we li ch'och' li wank sa' xteepal Nejeb. Chak'e ajwi' inyo'leb'aal ha'”, chan. Ut laj Kaleb kixk'e re eb' li xyo'leb'aal ha' li wankeb' taqe'q ut taq'a.

Eb' li tenamit sa' xteepal Judá

²⁰ A'an a'in li reechanihom li xteepal laj Judá, a' yaal chanru xk'ihaleb' li junjunq ch'uutal.

²¹ Eb' li tenamit li ke'tz'aqk eb' li ralal xk'ajol laj Judá sa' rokeb'l iq', toj sa' xnub'ajl Edom, aran Nejeb, a'aneb' a'in: Kabsehel, Éder, Yakur,

²² Kiná, Dimón, Adadá,

²³ Kadés, Jasor, Itnán,

²⁴ Sif, Telen, Behalot,

²⁵ Jasor-Jadatá, Keryot-Jesrón (Jasor neke'xye ajwi' re),

²⁶ Amán, Semá, Moladá,

²⁷ Jasar-Gadá, Jesmón, Bet-Pélet,

²⁸ Jasar-Suhal, Berseba rochb'eeneb' li xk'aleb'aal,

²⁹ Bahalá, Iyín, Esen,

³⁰ Eltolad, Kesil, Jormá,

³¹ Siklak, Madmaná, Sansaná,

³² Lebahot, Siljín, Ayin ut Rimón. B'eleeb' xka'k'aal chi tenamit, rochb'eeneb' xk'aleb'aaleb'.

³³ Chiru taq'a a'aneb' a'in li tenamit li ke'tz'aqk eb' laj Judá: Estahol, Sorá, Asná,

³⁴ Sanóhaj, En-Ganín, Tapúhaj, Enán,

³⁵ Yarmut, Adulán, Sokó, Aseká,

³⁶ Saharáhin, Aditáhin, Hak-Kederá, Kederotáhin. Naraj naxye, kaalaju chi tenamit, rochb'eeneb' xk'aleb'aaleb'.

³⁷ Jo'kan ajwi' eb' li tenamit Senán, Jadasá, Mikdal-Gad,

³⁸ Dilán, Mispá, Yoktehel,

³⁹ Lakix, Boskat, Eklón,

⁴⁰ Kabón, Lajmás, Kitlís,

⁴¹ Kederot, Bet-Dagón, Nahamá ut Makedá. Naraj naxye, waqlaju chi tenamit, rochb'eeneb' xk'aleb'aaleb'.

⁴² Eb' li tenamit Libná, Éter, Asán,

⁴³ Iftaj, Asná, Nesib,

⁴⁴ Kehilá, Aksib ut Maresá. Naraj naxye, b'eleeb' chi tenamit rochb'eeneb' xk'aleb'aaleb'.

⁴⁵ Li tenamit Ekrón rochb'eeneb' xk'aleb'aal;

⁴⁶ chalen chaq Ekrón toj wan wi' li palaw, chixjunil li na'ajej li wank chi xk'atq Asdod, rochb'eeneb' xk'aleb'aal.

⁴⁷ Li tenamit Asdod rochb'eeneb' li xk'aleb'aal, ut li tenamit Gasa rochb'eeneb' li xk'aleb'aal, toj sa' li Nima' re Ejiipt ut nawulak wan wi' li Nimla Palaw.

⁴⁸ Sa' li na'ajej k'iche' ru a'aneb' a'in li tenamit li ke'tz'aqk eb' laj Judá: Samir, Yatir, Sokó,

⁴⁹ Daná, Kiryat-Saná (a'an ajwi' Debir xk'ab'a'),

⁵⁰ Anab, Estemoha, Anín,

⁵¹ Gosen, Jolón ut Kiló. Naraj naxye, junlaju chi tenamit rochb'eeneb' xk'aleb'aaleb'.

⁵² Li tenamit Arab, Dumá, Esán,

⁵³ Janún, Bet-Tapúhaj, Afek,

⁵⁴ Jumtá, Kiryat-Arbá (Hebrón ajwi' naxk'ab'a'in) ut Sijor. Naraj naxye, b'eleeb' chi tenamit rochb'eeneb' xk'aleb'aaleb'.

⁵⁵ Li tenamit Mahón, Karmelo, Sif, Yutá,

⁵⁶ Jisrehel, Yokdehán, Sanóhaj,

⁵⁷ Hakáyin, Kibehá ut Timná. Naraj naxye, lajeeb' chi tenamit rochb'eeneb' xk'aleb'aaleb'.

⁵⁸ Li tenamit Jaljul, Bet-Sur, Kedor,

⁵⁹ Maharat, Bet-Anot ut Eltekón. Naraj naxye, waqib' chi tenamit rochb'eeneb' xk'aleb'aaleb'. Li tenamit Tékoha, Efratá (Belén ajwi' naxk'ab'a'in), Pehor, Etán, Kulón, Tatán, Sores, Karen, Kalín, Béter ut Manaj. Naraj naxye, junlaju chi tenamit rochb'eeneb' xk'aleb'aaleb'.

⁶⁰ Li tenamit Kiryat-Bahal (Kiryat-Yeharín ajwi' naxk'ab'a'in) ut Rabá. Naraj naxye, wiib' chi tenamit rochb'eeneb' xk'aleb'aaleb'.

⁶¹ Sa' li chaqich'och' a'aneb' a'in li tenamit: Bet-Arabá, Midín, Sekaká,

⁶² Nibsán, li xtenamit li Atz'am ut En-gadi. Naraj naxye, waqib' chi tenamit rochb'eeneb' xk'aleb'aaleb'.

⁶³ Ab'anan eb' li ralal xk'ajol laj Judá ink'a' ke'ruhank chi risinkileb' laj Jebús li wankeb' Jerusalén. Jo'kan naq eb' laj Jebús toj wankeb' ajwi' Jerusalén anaqwan, rochb'eeneb' li ralal xk'ajol laj Judá.