Joel 3 - Q'eqchi Bible

Li raqok aatin sa' xb'eeneb' li tenamit

¹ “Naq taawulaq xkutankil ut xq'ehil, tinsutq'isiheb' chaq wi' chik sa' li xna'ajeb' eb' laj Judá ut eb' laj Jerusalén.

² Tinch'utub'eb' chixjunil li tenamit ut tink'ameb' sa' xtaq'ahil Josafat. Aran tinraqoq aatin sa' xb'eeneb' chirix laj Israel, xb'aan naq ke'xcha'cha'i lintenamit ut li weechanihom, sa' chixjunil li ruuchich'och', ut ke'xjek'i linna'aj chirib'ileb' rib'.

³ Ke'xb'uuli rix lintenamit, ke'xk'e li k'uula'al cho'q xtojb'aleb' laj yumb'eet ut ke'xk'ayi li ixqa'al cho'q xtz'aq li b'iin ke'kalaak wi'.

⁴ “K'aru teeraj wik'in laa'ex aj Tiro ut aj Sidón ut chejunilex li wankex sa' xteepal Filistea? Ma teeraj eeqajunk sa' inb'een? Wi wank k'aru nekeraj xpatz'b'al reeqaj we, chi seeb' tink'e leeq'ajkamunkil jo' chanru eek'ulub'!

⁵ Laa'ex xerelq'a linplaat ut lin'oor, ut xek'am linchaq'alil ru eechej sa'eb' leetijob'aal;

⁶ xek'ayi eb' laj Judá ut eb' laj Jerusalén reheb' laj Grecia re risinkileb' sa' li xna'ajeb'.

⁷ A'ut laa'in twisiheb' chaq sa' li na'ajej b'arwi' xoxek'ayiheb', ut tink'e reeqaj eere jo' chanru xeb'aanu.

⁸ Tink'ayi eb' leeralal eek'ajol reheb' laj Judá, ut eb' a'an te'xk'ayi reheb' laj Sabá li najtil tenamit”, chan li Qaawa' Yos.

⁹ Yehomaq resil a'in sa' chixjunileb' li tenamit: Kawresihomaq eerib' chi yalok sa' xk'ab'a' li Qaawa', ch'utub'omaqeb' li jwal kaweb' rib'; chalqeb' chixjunileb' li yo'oon wankeb' chi yalok.

¹⁰ Yiib'omaq cho'q q'esnal ch'iich' leepikleb' ch'och' ut k'ehomaq leesetleb' k'im cho'q jutz' ch'iich'; che'xyehaq eb' li maak'a' xmetz'ew: “Jwal kaw wib' laa'in”.

¹¹ Seeb'omaq eerib' ut kimqex chejunilex li tenamit li nach' wankex, ut ch'utub'omaq eerib' sa' li xtaq'ahil Josafat. At Qaawa', taqlaheb' chaq li jwal kaweb' rib' chi yalok!

¹² Kawresiiq eerib', ex tenamit, ut ayuqex sa' xtaq'ahil Josafat. xb'aan naq aran tink'ojlaaq chi raqok aatin sa' xb'eeneb' chixjunileb' li tenamit li nach' wankeb'.

¹³ Xnumtaak li xmaa'usilaleb'; jo'kan naq setomaqeb' jo' na'uxk re li triiw sa' li q'olok; yatz'omaqeb' jo' na'uxk re li uub', xb'aan naq ak xnujak li yatz'leb'aal.

¹⁴ K'ajo' xk'ihaleb' li tenamit sa' li taq'a b'arwi' twanq li raqok aatin! Xb'aan naq nach' chik wank li xKutankil li Qaawa' sa' xtaq'ahil li raqok aatin.

¹⁵ Li saq'e ut li po taaq'oqyino'q ru ut taa'aak'ab'o'q ruheb' li chahim.

¹⁶ Naq li Qaawa' naxjap chaq re chi aatinak aran Sión ut li xyaab' xkux na'ab'imank Jerusalén, na'eek'ank sa' xna'aj li choxach'och'. A'ut li Qaawa' a'an li xmuheelahom li xtenamit, li neke'xkol wi' rib'eb' laj Israel.

Li xnimal xloq'al laj Judá

¹⁷ “Toja' naq teetaw xyaalal naq laa'in li Qaawa' leeYos ut wankin Sión sa' linloq'laj tzuul. Jerusalén a'anaq li santil tenamit, ut maajun sut chik te'wanq aran eb' li jalaneb' xtenamit.

¹⁸ “Sa' li kutan a'an q'axal chaab'ilaq chik li ch'och', k'ajo' chik naq te'uuchinq li awimq; wanq chik li ha' sa' chixjunileb' li roqha' re Judá ut taayo'laaq jun yu'amha' sa' rochoch li Qaawa' li tixt'aqresi li xtaq'ahil Akasya.

¹⁹ Ejiipt taasache'q chi junajwa ut Edom nakirnak taakanaaq jo' li chaqich'och', xb'aan li rahilal ke'xb'aanu reheb' laj Judá, naq ke'xkamsi li maak'a'eb' xmaak sa' li xtenamiteb'.

²⁰ A'ut Judá k'ojk'ooq chik chi junajwa ut Jerusalén wanq junq'e junq'e kutan.

²¹ Laa'in tin'eeqajunq chirix li xkik'eleb', moko taakanaaq ta yal chi jo'kan. Ut sa' li tzuul Sión tink'ojob' linmuheb'aal chi junajwa”, chan li Qaawa' Yos.