Joel 2 - Q'eqchi Bible

Chalk re li xKutankil li Qaawa'

¹ Yaab'asihomaq li pur aran Sión, yehomaq li esil a'in sa' linsantil tzuul. Che'xiwaq chixjunileb' li wankeb' Judá, xb'aan naq chalk re li xKutankil li Qaawa', nach' chik wank li kutan a'an:

² a'an xkutankil li aak'ab' ut li q'oqyink, xq'ehil li q'oqyinkil choql ut li mu! Jo' naq nahik'e'k li kutan sa' xb'een li tzuul, jo'kan ajwi' yooqeb' chi chalk eb' laj saak', jo' jun teep chi aj puub' q'axal naab'aleb' ut kaweb' rib': maajun wa ilb'il ru a'in chi moko tox'ilmaq chik moqon sa' xyanqeb' li k'iila teep chi tenamit chaalel.

³ Chanchaneb' li xam li naxk'at chixjunil li k'aru wank chi uub'ej ut chi ixb'ej. Rub'elaj li xnumik jwal chaab'il li ch'och', ab'an naq ak xnume'k, junes joxk' ch'och' aj chik; tik maak'a' nakole'k chiru.

⁴ Eb' laj saak' kama' rilb'aleb' li kawaay neke'ilok, neke'aanilak chi kaw kama' eb' li neke'xik chirix kawaay.

⁵ Tz'aapixik tz'aqal rab'inkileb' naq yookeb' chi aanilak sa' xb'eeneb' li tzuul, kama' xyaab'eb' li k'iila b'eleb'aal ch'iich' re yalok; chanchaneb' li xyaab' li chaqi pim naq yo chi k'atk; jo'eb' laj puub' jwal kaweb' rib' li tzoltzookeb' royb'eninkil li xhonalil li yalok.

⁶ Q'axal neke'siksotk eb' li poyanam chi rilb'aleb', ut chixjunileb' neke'saqo'k xb'aaneb' xxiw.

⁷ Neke'aanilak jo'eb' laj puub' jwal kaweb' rib', neke'taqe'k chiru li xsuttz'akil li tenamit ut tiik neke'xik chi ink'a' nake'xjal li xb'eheb'.

⁸ Ink'a' nake'xtiiki rib' chirib'ileb' rib'; ak sa' xb'e xb'e naxik li junjunq, ut neke'nume'k sa' xyanqeb' li simaj chi ink'a' nake'xcha'cha'i rib'eb'.

⁹ Xe'xkut rib' sa' xb'een li tenamit, xe'taqje'k sa' xb'eeneb' li suttz'ak ut xe'okje'k sa'eb' li b'entaan jo'keb' aj elq', re te'wulaq toj sa'atqeb' li ochoch.

¹⁰ Hich'lotq li ch'och' sa' xna'aj naq yooqeb' chi chalk eb' laj saak'; li choxa taachiq'chiq'iiq, li saq'e ut li po taaq'oqyino'q ru, ut taa'aak'ab'o'q ruheb' li chahim.

¹¹ Li Qaawa' tixjap re chi xtaqlankileb' a'an. K'ajo'aq xk'ihaleb' laj k'anjel chiru ut jwal naab'alaqeb' li neke'paab'ank re. Xiwajelaq li kutan taaraqoq wi' aatin li Qaawa'. Maajun taakuyuq re rilb'al.

Li ruxtaan li Qaawa'

¹² “Ut anaqwan sutq'inqex chaq wik'in chi anchal leech'ool, rik'in ayuunik, yaab'ak ut rik'in tz'uyink”, chan li Qaawa' Yos.

¹³ Meepej chik leeraq' ut tehomaq leech'ool chiwu. Sutq'inqex wi' chik rik'in li Qaawa' leeYos, xb'aan naq A'an aj uxtaan ut q'un xch'ool, ink'a' najosq'o'k chi junpaat ut q'axal narahok; jwal ra nareek'a xb'aanunkil li rahilal.

¹⁴ Mare anchal taaril xtoq'ob'aal eeru ut texrosob'tesi wi' chik: tixtaqla chaq eetriiw ut eeb'iin cho'q eemayej chiru li Qaawa' leeYos.

¹⁵ Yaab'asihomaq li pur aran Sión, ch'utub'omaq li tenamit ut yehomaq resil li ayuunik.

¹⁶ Ch'utub'omaq li xtenamit li Yos ut santob'resihomaq; ch'utub'omaqeb' li cheekel winq ut eb' li kok'al, jo'kaneb' ajwi' li toj neke'tu'uk. Eb' li winq ut ixq li toje' xe'sumlaak xkanab'aqeb' li xwarib'aaleb'.

¹⁷ Sa' xyanq li neb'aal rik'in li artal yaab'aqeb' laj tij li neke'k'anjelak chiru li Yos, ut te'xye: “Kuy xmaakeb' laatenamit, at Qaawa', ut maakanab'eb' chi se'eek xb'aaneb' li xik' neke'ilok re. Ink'a' taxaq te'xye eb' li junch'ol chik: «B'ar wank li xYoseb'?»”.

Li xsumehom li Qaawa'

¹⁸ Toja' naq li Qaawa' kiraho'k xch'ool chirix li xtenamit; kixtoq'ob'a ruheb' li ralal xk'ajol

¹⁹ ut kixye reheb': “Tintaqla chaq eere li triiw, li b'iin ut li aseeyt toj reetal taak'ojlaaq eech'ool, ut maajoq'e chik texink'e chi se'eek xb'aaneb' li tenamit junch'ol.

²⁰ Twaanilasiheb' li neke'chalk chaq sa' xjayal releb'l iq', ut toxinkanab'eb' chaq sa' li chaqich'och', sa' junesal na'ajej. Eb' laj k'amol xb'eheb' tinsub'eb' sa' li Atz'aminb'il Palaw, ut eb' li wankeb' chi ixb'ej tinsub'eb' sa' li palaw jun chik; ut aran te'q'aaq ut te'chuho'q. Relik chi yaal naq xninqal sachb'ach'oolej ok we chi xb'aanunkil!”.

²¹ Matxiwak, at loq'laj ch'och', ut chisaho'q sa' laach'ool xb'aan naq li Qaawa' tixb'aanu xninqal sachb'ach'oolej.

²² Ex k'iche'il xul, mexxiwak, xb'aan naq taawanq wi' chik li raxpim sa' li chaqich'och' ut te'uuchinq wi' chik eb' li che': q'axal naab'alaqeb' li iig ut li uub'.

²³ Ex aj Sión, chisaho'q leech'ool ut sahoqex rik'in li Qaawa' leeYos. Xb'aan naq A'an nak'ehok eere leetzekemq chi tz'aqal rik'in xtaqlankil chaq li hab' sa' xq'ehil, kama' chaq junxil.

²⁴ Taawanq naab'al leetriiw ut k'ajo'aq li b'iin ut li aseeyt.

²⁵ “Laa'in tink'e reeqaj leerawimq li xmaak'a'ok eere chiruheb' li chihab' naq xsache'k xb'aaneb' li k'iila motzo', laj saak', li chili' ut li raxq'een, naq xintaqlaheb' cherahob'tesinkil -chan li Yos-.

²⁶ Textzekanq toj reetal taak'ojlaaq leech'ool ut teek'e xloq'al li Qaawa' leeYos, xb'aan naq xinb'aanu xninqal sachb'ach'oolej cho'q eere. Maajoq'e chik taak'ehe'q chi se'eek lintenamit.

²⁷ Toja' naq laa'ex aj Israel teenaw naq wankin sa' eeyanq; laa'in li Qaawa' leeYos, ut maak'a' chik junaq chiwu laa'in! Ut lintenamit maajoq'e chik taak'ehe'q sa' xutaan”.

Taahoye'q li xMusiq' li Yos

²⁸ “Chirix chik a'in tinhoy linmusiq' sa' xb'eeneb' chixjunil: eb' leeralal ut leerab'in te'aatinaq jo' propeet, eb' leecheekelal te'matk'eq ut eb' leesaaj al te'iloq moy u.

²⁹ Chiruheb' li kutan a'an tinhoy linmusiq' sa' xb'eeneb' li moos winq ut ixq.

³⁰ Tinb'aanu xninqal sachb'ach'oolej sa' li choxa ut sa' ruuchich'och'; ut taawanq kik', raq'xam ut sib'”.

³¹ Taa'aak'ab'o'q ru li saq'e ut li po taakik'o'q ru, rub'elaj xk'ulunik li xKutankil li Qaawa', a' li xnimal ru kutan ut q'axal xiwajel”.

³² Ab'anan chixjunileb' li te'yaab'anq re xk'ab'a' li Qaawa', te'kole'q, xb'aan naq sa' li tzuul Sión ut Jerusalén taawanq li kolb'a ib', jo' kixye li Qaawa'. Jo'k'ihaleb' li sik'b'ileb' ru xb'aan li Qaawa' te'kole'q.