Jeremías 51 - Q'eqchi Bible

Li Qaawa' tixsach ru Babilonia

¹ Jo'ka'in kixye li Qaawa': “Tintaqla jun kawil kaqsut-iq' chi xsachb'al ru Babilonia jo'wi' eb' laj Kaldeha.

² Tintaqlaheb' li jalan xtenamiteb' re naq eb' laj Babilonia te'chiileeq sa' li iq' ut maajun chik tkanaaq sa' li xna'ajeb'. Xb'aan naq li tenamit taasutmanq rix yalaq b'ar naq taachalq li xnimal rahilal sa' xb'een.

³ Me'xyu' rix li simaj eb' laj puub' chi moko che'xkawu xch'ool rik'ineb' li xkoleb' ch'iich'. Me'ril xtoq'ob'aal ruheb' li saaj winq aj Babilonia ut che'xsach ru chixjunileb' laj puub'.

⁴ T'ant'ooqeb' chiru ch'och' te'kanaaq eb' laj Kaldeha ut sa'atqeb' li b'e te'paynumiiq chi ch'iich'.

⁵ Xb'aan naq chixjunileb' laj Israel ut eb' laj Judá k'ajo' li xmaakeb' chiwu laa'in; xe'xnujob'resi li tenamit rik'in li xmaa'usilaleb', ab'an ink'a' xe'kanab'aak xjuneseb' inb'aan laa'in li Qaawa', li Nimajwal Yos, li xSant laj Israel.

⁶ “Elenqex sa' li tenamit Babilonia ut kolomaq eerib', re naq ink'a' texkamq xb'aan li xmaa'usilal. Ak xkutankil li eeqajunk anaqwan, ut tinq'ajkamu Babilonia jo' chanru li xyehom ut xb'aanuhom.

⁷ Babilonia chanchan jun sek' ooro naq xwank sa' wuq'; a'an xpo'ok re xna'leb' chixjunil li ruuchich'och': eb' li xninqal ru tenamit xe'ruk' li b'iin a'an ut xe'sachk xna'leb'eb'.

⁸ Sachaamil Babilonia ut xjuk'e'k! Yaab'anqex chirix li tenamit a'an ut yulumaq sa' sununkil b'an: mare anchal taak'iraaq”.

⁹ Ak xqab'an Babilonia, ab'an ink'a' xk'iraak. Qakanab'aq ut li junjunq xikaq sa' li xtenamit, xb'aan naq li xmaa'usilal xwulak toj sa' choxa ut xnawmanje'k toj sa' xb'eeneb' li choql.

¹⁰ Li Qaawa' xk'ut naq naraqok aatin sa' tiikilal. Kimqex arin Sión ut qapuktesiiq resil li k'aru xb'aanu li Qaawa' li qaYos.

¹¹ Q'esnaaq ru'uj leesimaj ut kawresihomaq leech'iich' li nekekol wi' re leech'ool. Li Qaawa' xtoch' chaq li xch'ooleb' li awab'ej re Media re naq te'chalq chi xsachb'al ru Babilonia. A'an a'in li reeqaj tixb'aanu li Qaawa' naq ke'xjuk' li xsantil ochoch.

¹² Taqsihomaq li eetalil naq tex'ok chi xjuk'b'al li xsuttz'akil Babilonia. K'ehomaq naab'aleb' laj puub' aran, xaqab'omaqeb' li te'k'aak'alenq ut kawresihomaq eb' li te'ramoq sa'atqeb' li b'e. Xb'aan naq li Qaawa' xk'uub'ank re a'in ut tixb'aanu li kixye chaq junxil chirixeb' laj Babilonia.

¹³ At Babilonia li wankat chire xninqal nima' ut k'ajo' laab'ihomal, ak xwulak xkutankil laasachik; maajoq'e chik tat-elq'aq.

¹⁴ Li Nimajwal Yos xyehom xjurament sa' xk'ab'a' li xloq'al: “Tintaqlaheb' chaq k'iila aj puub' chi yalok aawik'in, jo'kaq xk'ihaleb' laj saak', ut eb' a'an k'ajo' naq te'b'ichanq naq te'xq'ax aawu”.

Xnimankil li xk'ab'a' li Qaawa'

¹⁵ Li Qaawa' kixk'uub' li ruuchich'och' rik'in li xwankil; kixk'ojob' sa' xna'aj li choxach'och' rik'in li xseeb'al xk'a'uxl ut kixhel ru li choxa rik'in li xnimal xnawom.

¹⁶ Rik'in li xyaab' xkux neke'ch'utlaak li ha' sa' choxa, ut naxwaklesi eb' li choql toj sa' xmaril li ruuchich'och'. A'an nak'ehok chi repok li kaaq naq yo li hab', ut narisiheb' chaq li iq' b'arwi' k'uulanb'ileb' xb'aan.

¹⁷ Chixjunileb' li poyanam jwal jipeb' ut maak'a' neke'xnaw; eb' laj tenol ch'iich' neke'kanaak sa' xutaan xb'aan li xyoseb', xb'aan naq eb' li jalam u li neke'xyiib', a'an yal tik'ti' ut maak'a' xyu'ameb'.

¹⁸ Maak'a' xyaalal ut xk'ulub'eb' li tz'eqtaanaak; relik chi yaal naq te'oso'q sa' xkutankil li raqb'a aatin.

¹⁹ A'ut li xYos laj Jakob moko jo'kan ta: A'an kiyiib'ank re li choxach'och' ut kixsik' ru laj Israel cho'q reechanihom: “Li Nimajwal Yos” a'an li xk'ab'a'.

Babilonia a'an jun k'anjelob'aal sa' ruq' li Qaawa'

²⁰ “At Babilonia, chanchanat li tenleb' sa' wuq', laa'at link'anjelob'aal re yalok. Wochb'eenat naq xinsacheb' ru li xninqal ru tenamit ut xinjuk'eb' li xwankilaleb'.

²¹ Wochb'eenat naq xinkamsiheb' li kawaay ut eb' li neke'b'eek chirixeb'; xinputz'iheb' li b'eleb'aal ch'iich' jo'wi' eb' li neke'b'eresink reheb'.

²² Wochb'eenat naq xinkamsiheb' winq ut ixq, cheekel winq ut saaj aleb', eb' li ch'ajom ut eb' li tuq'ixq.

²³ Wochb'eenat naq xinputz'iheb' li ketomq ut eb' li neke'ilok reheb'; xinkamsiheb' laj k'alom jo'wi' eb' li b'ooyx, xinsacheb' ru eb' laj k'amol b'e ut eb' laj jolominel.

Li xraqb'a aatin li Yos sa' xb'een Babilonia

²⁴ “Ab'anan cheru ajwi' laa'ex aj Judá tink'e reeqaj re Babilonia ut reheb' chixjunil laj Kaldeha li rahilal xe'xb'aanu re Sión -chan li Qaawa'-.

²⁵ Relik chi yaal naq yo injosq'il sa' aab'een, at xnimal ru tzuul aj juk'unel, li nakasach chixjunil li ruuchich'och' -chan li Qaawa'-. Twisi linjosq'il sa' aab'een, tatinjukuki sa' xb'eeneb' li saqoonak ut chanchanaqat chik li choqlenb'il k'iche' tatinkanab'.

²⁶ Maajun xpekul laapo'lemil taaxokmanq re xk'ojob'ankil rub'elankil junaq ochoch chi moko re kab'lak, xb'aan naq nakirirnak tatkanaaq chi junwaakaj -chan li Qaawa'-.

²⁷ “Taqsihomaq li eetalil re li yalok sa' chixjunil li ruuchich'och' ut yaab'asihomaq li pur sa'atqeb' li tenamit. Kawresihomaqeb' li poyanam re yalok rik'ineb' laj Babilonia. Ch'utub'omaqeb' li awab'ej re Ararat, Miní ut Askenas; xaqab'omaq junaq li taak'amoq b'e chi yalok. Taqlahomaqeb' li kawaay chi uub'ej jo'kaqeb' li josq' aj saak'.

²⁸ B'oqomaqeb' li tenamit chi yalok rik'ineb' laj Babilonia; kawresihomaq li awab'ej re Media, eb' laj jolominel ut li xninqaleb' ru winq, jo' ajwi' chixjunileb' li na'ajej wankeb' rub'el xwankileb'”.

²⁹ Nahich'lok li ruuchich'och' chi k'ajo' xxiw, xb'aan naq yo chi tz'aqlok ru li xk'uub'ahom li Qaawa' chirix Babilonia: naq li tenamit a'an tkanaaq chi nakirirnak ut maajun chik poyanam taawanq chisa'.

³⁰ Eb' laj puub' aj Babilonia xe'xkanab' li yalok ut xe'xtz'ap rib' sa'eb' li kawub'resinb'il ochoch; xe'lub'kje'k, ut jo'eb' aj chik li ixq anaqwan. Xe'k'ate'k li rochocheb' ut xe'weqmank eb' li okeb'aal.

³¹ Riiqajeb' wi' rib' eb' laj taql chi yehok esil, re xyeeb'al re li awab'ej re Babilonia naq ak xchapmank chixjunil li xtenamit.

³² Wankatqeb' laj xik'il uuchinel chireheb' li nima', xe'k'atmank eb' li kawub'resinb'il ochoch ut k'ajo' xxiweb' laj puub'.

³³ Xb'aan naq li Nimajwal Yos, li xYos laj Israel, xye chi jo'ka'in: “Li tenamit Babilonia a'an chanchan li na'ajej na'isimank wi' li rix li triiw; wulak re xkutankil li q'olok!”.

^34-35 Jerusalén, li tenamit Sión, kixye chi jo'ka'in: “Laj Nabukodonosor, li awab'ej re Babilonia, xinxtiw ut xinxchoy; jo' junaq sek' maak'a' chik tzekemq chisa' xinxkanab'. Jo' li ranumal li palaw naq xinxnuq': xchoy chixjunil li k'aru wank we ut xkuti chi najt li ink'a' xwulak chiru. Che'xtoj ta rix eb' laj Babilonia li rahilal xe'xb'aanu we, ut eb' laj Kaldeha che'xtoj ta rix eb' linkomon xe'xkamsi”.

³⁶ Jo'kan utan li Qaawa' kixye chi jo'ka'in: “Laa'in tin'okenq chawix ut tink'e reeqaj li rahilal x'uxmank aawe. Tink'eheb' chi chaqik li nima' ut li yu'amha' re Babilonia,

³⁷ ut li tenamit a'an taakanaaq jo' jun tuub' chi pek, cho'q xna'ajeb' laj xojb', tz'eqtaananb'ilaq ut xiwajelaq rilb'al; ut maajunaq poyanam taawanq chisa'.

³⁸ Chixjunileb' laj Babilonia japaqeb' re jo'eb' li kaqkoj; te'tz'uyinq jo'kaqeb' li raleb' li kaqkoj.

³⁹ Naq taachaqiq reheb', tink'e li ruk'a'eb' re naq tsaho'q sa' xch'ooleb'; tinkaltesiheb' re naq taasachq li xna'leb'eb', te'warq chi junajwa ut ink'a' chik taa'ajq ruheb' -chan li Qaawa'-.

⁴⁰ Chirix chik a'an tink'eheb' chi kamsiik, jo' neke'k'ame'k chi kamsiik eb' li karneer, li chib'aat ut li saaj wakax”.

⁴¹ Ilomaq chanru naq xchape'k ut xsache'k Babilonia, li tenamit q'axal nim xwankil sa' ruuchich'och'. Xiwajel ut se'leb'aal xkanaak wi' Babilonia sa' xyanqeb' chixjunil li xninqal ru tenamit.

⁴² Xtaqe'k li palaw sa' xb'een Babilonia ut tik xmuqunk xb'aaneb' li xkaw oq.

⁴³ Nakirirnak xe'kanaak eb' li xtenamit, chanchaneb' aj chik li joxk' ch'och'; maajun chik poyanam wank chisa' chi moko nanume'k aran.

⁴⁴ “Tinrahob'tesi laj Bel, li xyoseb' laj Babilonia, ut tink'e chi xxa'wa li k'aru ak xtzekahom; maajun chik tenamit taachalq rik'in. Ak xt'ane'k li xsuttz'akil li tenamit.

⁴⁵ Ex intenamit, elenqex chaq Babilonia ut chejunjunqal kolomaq leeyu'am chiru li xnimal injosq'il!

⁴⁶ Mich'inank leech'ool chi moko chexxiwaq xb'aan li esil yo xyeeb'al sa' li tenamit. Rajlal chihab' taa'ab'iiq jalan jalanq li esil: taanumtaaq li rahilal sa' xb'een li tenamit ut eb' li awab'ej te'yaloq chirib'ileb' rib'.

⁴⁷ Jo'kan utan, chalk re xkutankil naq tolinsach ruheb' li xjalanil yoseb' laj Babilonia. Chixjunileb' li poyanam te'kanaaq sa' xutaan ut te'nujaq chi kamenaq li xna'ajeb'.

⁴⁸ Li choxach'och' ut jo'ch'inal jo'nimal li wank chisa' k'ajo' naq te'saho'q naq taajuk'e'q Babilonia ut tole'elq chaq laj sachonel sa' xjayal releb'l iq' -chan li Qaawa'-.

⁴⁹ Sa' xk'ab'a'eb' laj Israel li xe'kamk taajuk'e'q Babilonia; sa' xk'ab'a'eb' li xe'kamsiik sa' ruuchich'och' tento taasachmanq chi junwaakaj”.

⁵⁰ Laa'ex li xexkole'k chiru li kamk, ayuqex sa' aanil chi ink'a' texhilanq; ut naq wanqex chik chi najt, jultikaq eere li Qaawa' ut wanq sa' leech'ool Jerusalén.

⁵¹ Laa'ex nekeye: “Xutaanal xookanaak, xb'aan naq naqab'i li qahob'b'al; xookaqo'k xb'aan qaxutaan rik'in rilb'al naq eb' laj ab'l tenamit xe'ok chaq sa' qayanq ut xe'xmux li xsantil ochoch li Yos”, chankex.

⁵² Jo'kan naq li Qaawa' xye chi jo'ka'in: “Chalk re xkutankil naq tolinsach ruheb' li xjalanil yoseb' ut sa' chixjunileb' li tenamit tz'uynaqeb' li te'tiq'e'q.

⁵³ Us ta Babilonia tixnima chi us li xwankil ut taawulaq taraj toj sa' choxa li xsuttz'akil, laa'in tintaqlaheb' li te'juk'uq re”, chan li Qaawa'.

⁵⁴ K'ajo' li yaab'ak na'ab'imank aran Babilonia, makach'in li japok e sa' xyanqeb' laj Kaldeha.

⁵⁵ A' li Qaawa' yo chi xsachb'al Babilonia re naq ink'a' chik taachoqinq. Japjookeb' re eb' li xik' neke'ilok re ut chanchan li xkaw oq li palaw li xyaab' xkuxeb'.

⁵⁶ Xchalk laj sachonel sa' xb'een Babilonia, ak xe'chape'k laj puub' ut xe'toqiik li xsimajeb'. Xb'aan naq li Qaawa' a'an jun Yos naq'ajkamunk ut naxk'e re li junjunq jo' chanru li xyehom xb'aanuhom.

⁵⁷ Li Qaawa', li xnimal ru Awab'ej, xyehom chi jo'ka'in: “Tinkaltesiheb' li xninqal ru winq jo' ajwi' eb' li wankeb' xna'leb' aran Babilonia, eb' li xjolomileb' li tenamit, eb' laj raqol aatin ut eb' laj puub'. Te'warq chi junwaakaj ut ink'a' chik te'ajq ruheb' -chan li Qaawa'-.

⁵⁸ “Li xsuttz'akil Babilonia li jwal nim ru taajuk'manq chi junajwa, ut te'k'ate'q eb' li xtz'apb'al li rokeb'aal li tenamit. Maak'a' rajb'al naq xe'k'anjelak eb' li xninqal ru tenamit, xb'aan naq li k'aru xe'xtawasi wi' rib', yal xam toxraqe'q wi'”, chan li Nimajwal Yos.

Kikute'k li hu sa' nima'

⁵⁹ A'an a'in li aatin kixye laj Jeremías, li propeet, re laj Seraías, laj k'aak'alehom re li awab'ej, ralal laj Nerías ut ri laj Mahasías, naq laj Sedesías, li awab'ej re Judá, yo chi xik aran Babilonia, sa' li xka chihab' chi awab'ejink.

⁶⁰ Laj Jeremías ak xtz'iib'ahom sa' jun li hu resilal chixjunil li rahilal taachalq sa' xb'een Babilonia, naraj naxye chixjunil li tz'iib'anb'il reetalil sa' li hu a'in.

⁶¹ Toja' naq kixye re laj Seraías: “Naq tatwulaq Babilonia, k'e aach'ool chi xyaab'asinkil chi kaw xyaab' laakux chixjunil li tz'iib'anb'il sa' li hu a'in.

⁶² Chirix chik a'an taaye chi jo'ka'in: «At Qaawa', laa'at xaye naq taajuk' li tenamit a'in, toj reetal naq maajun chik twanq chisa', chi moko junaq poyanam chi moko junaq xul, xb'aan naq joxk' taakanab' li na'ajej a'in chi junwaakaj».

⁶³ Naq akaq xatraqe'k chi xyaab'asinkil xsa' li hu a'in, taab'ak' junaq pek chiru; toja' naq taakut sa' li nima' Éwfrates

⁶⁴ ut taaye: «Jo'ka'in naq taasob'e'q Babilonia ut maajun chik taawaklesinq re sa' li rahilal taataqlaaq chaq sa' xb'een xb'aan li Qaawa'»”. Arin xraqe'k chixjunil li xyehom ut xtz'iib'ahom laj Jeremías.