Jeremías 50 - Q'eqchi Bible

Roso'jik Babilonia ut xsutq'ijikeb' laj Israel

¹ A'aneb' a'in li aatin kixye li Qaawa' re laj Jeremías chirix li rahilal tixk'ul Babilonia, xtenamiteb' laj Kaldeha:

² “Yehomaq ut puktesihomaq li esil a'in sa'eb' li tenamit; k'ehomaq chi nawe'k ut mik'a' eemuq: «Xchapmank li tenamit Babilonia! Xkanaak sa' xutaan li yos Bel ut nasiksotk li yos Marduk xb'aan xxiw. Maak'a' chik na'ok wi' eb' li xjalanil yos, xlaje'sache'k chixjunileb'».

³ Xb'aan naq xchalk chaq sa' xjayal releb'l iq' jun tenamit li toljuk'uq re Babilonia. Maajun chik taawanq sa' li na'ajej a'an, chi moko poyanameb' chi moko xuleb'.

⁴ “Sa'eb' li kutan a'an te'sutq'iiq chaq eb' li ralal xk'ajol laj Israel, rochb'eenaqeb' chaq laj Judá, chi yooqeb' chaq chi yaab'ak naq te'chalq chi xsik'b'al li Qaawa' li xYoseb'.

⁵ Te'xpatz' xb'ehil li tenamit Sión ut aran te'xik: «Kimqex, qak'amaq qib' sa' usilal rik'in li Qaawa' ut qak'ojob'aq jun sumwank li maajoq'e taasachq sa' qach'ool», cha'qeb'.

⁶ “Chanchaneb' li karneer sachenaqeb' naq xe'wank lintenamit. Eb' laj ilol reheb' xe'sachb'esink reheb' sa'eb' li pim; jo'kan naq xe'xb'eeni rib' chiruheb' li tzuultaq'a; neke'chalk neke'xik toj reetal xsachk sa' xch'ooleb' li xna'ajeb'.

⁷ Yalaq ani xk'uluk reheb', xt'upiheb', ut eb' li xik' neke'ilok reheb' xe'xye: «Moko maak ta naq te'qasach ruheb', xb'aan naq xe'maakob'k chiru li Qaawa', a'an tz'aqal li xmuheb'aaleb'; xe'maakob'k chiru li royb'enihomeb' li xna' xyuwa'eb'».

⁸ “Elenqex chaq Babilonia sa' xyanqeb' laj Kaldeha! K'amolb'ehaqex chaq chiruheb' li yookeb' chi elelik!

⁹ K'ehomaq reetal, laa'in tintaqlaheb' chaq jun ch'uut chi ninqi tenamit, li wankeb' chaq sa' xjayal releb'l iq', re naq te'xsach ruheb' laj Babilonia. Te'xtzolob' chaq rib' ut tole'reechani. Eb' laj puub' a'an, jwal kaweb' rib', moko neke'kutuk ta simaj chi maak'a' rajb'al.

¹⁰ Talaje'xchoy xsa' Babilonia, ut jo'k'ihaleb' li te'elq'aq, te'nujaq rik'in li k'a'aq re ru te'xxok -chan li Qaawa'-.

¹¹ “Ex aj Kaldeha li xechoyatq xsa' lintenamit, jwal xsaho'k leech'ool ut xexninq'ehik. Xexpisk'ok jo'eb' li saaj wakax sa' li pach'aya', ut chanchanex li kawaay naq xejap eere.

¹² Q'axal xutaanal xkanaak Babilonia, sachso xna'leb' li na'ajej xexyo'laak wi'. A'an chik li jwal kach'in xwankil sa' xyanqeb' chixjunil li tenamit, xkanaak chi po'lemil, jo' jun chaqich'och' li maajun chik wank chisa'.

¹³ Xb'aan linjosq'il xinkanab' chi nakirirnak ut maajun chik xpoyanamil. Chixjunil li taanume'q aran Babilonia taasachq xch'ool ut taase'eq chi rilb'al li rahilal xk'ulum.

¹⁴ “Tzolob'omaq eerib' chi xik chi yalok, sutomaq Babilonia laa'ex li nakexkutuk chi simaj. Meera junaq li simaj re xkutb'aleb', xb'aan naq xmaakob'k chiwu laa'in li Qaawa'.

¹⁵ Japomaq eere chi xsutam li tenamit. Babilonia ok re chi xq'axtesinkil rib' sa' eeruq': xe't'anje'k li najt xteramil ochoch ut x'uq'e'k li xsuttz'akil. A'an li eeqajunk xinb'aanu laa'in; eeqajunqex ajwi' laa'ex sa' xb'een! B'aanuhomaq re jo' li xb'aanu a'an eere.

¹⁶ Maajun teekanab' chi awk aran Babilonia chi moko teekol li naxokok ru awimq sa' xq'ehil li q'olok. Naq te'ril li nimla rahilal, li junjunq taa'eleliq ut taaxik sa' li xtenamit; li junjunq taasutq'iiq wi' chik sa' li xna'aj.

¹⁷ “Israel chanchan li karneer sachenaq, aanilasinb'il xb'aaneb' li kaqkoj. Xb'enwa xsache'k xb'aan li awab'ej re Asiria; chirix chik a'an, laj Nabukodonosor, li awab'ej re Babilonia, xchoyok re.

¹⁸ Jo'kan naq laa'in, li Nimajwal Yos, li xYos laj Israel, ninye chi jo'ka'in: Tink'e chi xtojb'al xmaak li awab'ej re Babilonia jo' ajwi' li xtenamit, jo' xinb'aanu re li awab'ej re Asiria.

¹⁹ Israel taasutq'iiq chaq wi' chik sa' li xch'och', ut chanchan junaq karneer sa taatzekanq aran Karmeel ut Basán, jo'wi' sa'atqeb' li k'iche' re Efraín ut Galahad, toj reetal taak'ojlaaq xch'ool.

²⁰ Chiruheb' li kutan a'an maak'a'aq chik xmaakeb' laj Israel ut laj Judá, xb'aan naq laa'in twil xtoq'ob'aal ruheb' li jo'k'ihal xe'kole'k”, chan li Qaawa'.

Xt'anik li tenamit Babilonia

²¹ “Ayuqex chi yalok sa' xteepal Meratáhin ut rik'ineb' li wankeb' Pekod. Kamsihomaqeb' rik'in q'esnal ch'iich' ut sachomaq ruheb' toj reetal maajun chik tkanaaq. B'aanuhomaq chi tz'aqal re ru li xexintaqla wi'”, chan li Qaawa'.

²² Yo li raaxiik' sa' li tenamit ut k'ajo' xyaab' li nimla rahilal!

²³ Kok'puk' xkanaak Babilonia li kaw nataqlank sa' xb'een chixjunil li ruuchich'och'; xiwajel ut xutaanal li rahilal xk'ulum sa' xyanqeb' li xninqal ru tenamit.

²⁴ Xink'e aach'inb'ul chi ink'a' xak'e reetal, a Babilonia, ut xatt'ane'k chisa' chi maak'a' sa' laach'ool; xattawe'k ut xatchape'k chaq xb'aan naq xaq'etq'eti aawib' chiru li Qaawa'.

²⁵ Li Qaawa' xte li xk'uuleb'aal ut xrisi chaq li taak'anjelaq re risinkil li xjosq'il, xb'aan naq li Nimajwal Yos wank xk'anjel sa' xyanqeb' laj Kaldeha.

²⁶ Chalqex chaq toj sa' najtil tenamit, tehomaqeb' li xk'uuleb'aal ut kanab'omaqeb' chi po'lem, re naq maak'a' chik tkanaaq re xpatz'b'aleb'.

²⁷ Kamsihomaq chixjunileb' laj puub' ut sachomaq ruheb' jo'eb' li wakax. Rahilal xchalk sa' xb'eeneb' xb'aan naq xwulak xkutankil li xrahob'tesinkileb'.

²⁸ Ab'ihomaqeb' li xe'elelik chaq Babilonia, yookeb' chi xyeeb'al resil sa' li tenamit Jerusalén naq li Qaawa' li qaYos xreeqaju li xsachik li xsantil ochoch.

²⁹ “Ch'utub'omaq chixjunileb' li neke'kutuk rik'in simaj re xik chi yalok rik'in Babilonia. Sutumaq rix li tenamit re naq maajun taa'eleliq. Eeqajuuq re jo' chanru xk'ulub' ut b'aanuhomaq re jo' chanru xb'aanu a'an, xb'aan naq xq'etq'eti rib' chiwu laa'in li Qaawa', li xsant laj Israel.

³⁰ Jo'kan naq eb' li xsaaj al te'kamsiiq sa'atqeb' li b'e ut chixjunileb' laj puub' te'kamq sa' li kutan a'an”, chan li Qaawa'.

³¹ “At q'etq'et aj tenamit, yo injosq'il aawik'in; xwulak laakutankil ut xtaw xq'ehil naq taatoj rix laamaak.

³² At q'etq'et aj tenamit, tattichk'oq, tatt'ane'q ut maajun taawaklesinq aawe. Tink'at chixjunileb' laatenamit ut li xam tixsach jo'ch'inal jo'nimal li wank chasutam”, chan li Qaawa'.

³³ “Eb' laj Israel ut eb' laj Judá yo xrahob'tesinkileb'; chixjunileb' li xik' neke'ilok reheb' ink'a' neke'xkanab'eb' chi elk.

³⁴ Ab'an laj Kolol reheb' a'an jwal kaw rib': Nimajwal Yos naxk'ab'a'in. A'an taa'okenq chi xkolb'aleb' toj reetal taawanq li tuqtuukilal sa' ruuchich'och' ut te'rahob'tesiiq li wankeb' Babilonia”, chan li Qaawa'.

³⁵ “Kamsihomaqeb' chi ch'iich' eb' laj Kaldeha, sachomaq ruheb' laj Babilonia, eb' li neke'jolomink re li tenamit ut eb' laj k'ehol na'leb'.

³⁶ Kamsihomaqeb' laj q'e, chikaano'q ruheb'. Kamqeb' laj puub' ut che'rahob'tesiiq.

³⁷ Kamsihomaqeb' li kawaay ut juk'umaqeb' li b'eleb'aal ch'iich'; chisachmanq ruheb' li tojb'ileb' chi yalok ut che'yopirq jo'eb' li ixq. Chiweqmanq ut chi'elq'aaq li xb'ihomaleb'.

³⁸ Talaje'chaqiq chixjunileb' li nima' wankeb' aran, xb'aan naq Babilonia nujenaq chi jalanil yos ut k'ajo' naq xkoho xch'ooleb' chirixeb' a'an.

³⁹ “Jo'kan naq Babilonia tkanaaq cho'q xna'ajeb' laj xojb' ut eb' li yak, ut maajoq'e chik taatenamito'q.

⁴⁰ Taak'ulmanq jo' naq laa'in kinsacheb' ru Sodoom ut Gomoor, jo'wi' eb' li tenamit wankeb' chi xsutam, naq maajun chik poyanam kikanaak aran chi moko ke'tenamito'k chik”, chan li Qaawa' Yos.

⁴¹ Sa' xjayal chaq releb'l iq' chalk re jun tenamit, jun xnimal ru tenamit jwal kaw rib', jo'wi' naab'aleb' li awab'ej xe'waklije'k chaq junsut junrub'el choxa.

⁴² Wankeb' chaq xjutz' ch'iich' ut xsimaj sa' ruq'eb', q'axal josq'eb' ut maajun neke'ril xtoq'ob'aal ru. Chanchan xkawil oq li palaw naq neke'xjap reheb' ut wankeb' chaq chirix kawaay. Yo'oon wankeb' chi yalok aawik'in chi kaw, a Babilonia.

⁴³ Naq li awab'ej re Babilonia xrab'i resileb', k'ajo' naq xchalk xxiw ut nasiksotk; xmayok li xch'ool jo' junaq ixq ok re chi alank.

⁴⁴ “Relik chi yaal naq tinchalq chi junpaat: jo' junaq kaqkoj li na'elk chaq sa' li k'iche' chire li nima' Jordán ut naxik sa' li raxal pim chiru taq'a, jo'kan naq tink'eheb' chi elelik eb' laj Babilonia ut aran tinxaqab' cho'q aj k'amol b'e li ani tixk'ul linch'ool. Xb'aan naq ani chik junaq kama' laa'in? Ani junaq awab'ej taawanq chi xaqxo chiwu?

⁴⁵ Ab'ihomaq li k'aru tinb'aanu reheb' laj Babilonia, chek'e reetal li k'aru xink'uub' xb'aanunkil reheb' laj Kaldeha: jukunb'il naq te'isiiq li kok'al sa' li tenamit a'an jo'qeb' li ral li karneer, ut te'oso'q rochb'een li raxpim neke'tzekank wi'.

⁴⁶ Tz'aapixik rab'inkil li xt'anik Babilonia, ut li xyaab'eb' taa'ab'imanq sa' chixjunileb' li na'ajej”.