Jeremías 49 - Q'eqchi Bible

Li rahilal te'xk'ul eb' laj Amón

¹ Jo'ka'in kixye li Qaawa' chirixeb' laj Amón: “Ma maak'a'eb' tab'i' ralal xk'ajoleb' laj Israel? Ma maajun taa'eechaninq re li xna'ajeb'? K'a' put naq li yos Mikón chik x'eechanink re Gad ut eb' laj Amón xe'kanaak sa'eb' li xtenamiteb'?

² “Jo'kan naq chalk re xkutankil naq aran Rabá, sa' xteepal Amón, taa'ab'imanq li xyaab' kuxej re yalok ut po'lem taakanaaq wi' li tenamit a'an; te'k'atmanq eb' li poyanam ut eb' laj Israel te'reechani wi' chik li na'ajej kimaq'e'k chiruheb' -chan li Qaawa'-.

³ “Yaab'anqex, ex aj Jesbón, xb'aan naq xsache'k li tenamit Ar. Japomaq eere chi yaab'ak, ex aj Rabá, k'ehomaq li q'es ruhil t'ikr cherix, tz'uyinqex ut ayuqex yalaq b'ar sa' xyanqeb' li tz'ak, xb'aan naq li yos Milkón taak'ame'q chi preexil rochb'eeneb' laj tij jo'wi' eb' li xninqal ru winq.

⁴ K'a'ut naq nakanima aawankil rik'in laachaab'il ch'och', at q'etq'etil tenamit? K'a'ut naq nakakawu aach'ool chirix laab'ihomal, ut nakaye: “Ani taaruuq chi yalok wik'in?”, chankat.

⁵ Us b'i' -chan li Nimajwal Yos-, yalaq b'ar tintaqla chaq li nimla xiwak sa' aab'een, ak xb'e xb'e tixchap li junjunq naq taa'eleliq, ut maajun chik taach'utub'anq reheb'.

⁶ Ab'an, chirix chik a'an, tink'eheb' chaq wi' chik chi sutq'iik eb' laj Amón”, chan li Qaawa'.

Li rahilal te'xk'ul eb' laj Edom

⁷ Jo'ka'in kixye li Nimajwal Yos chirixeb' laj Edom: “Ma maak'a' chik li chaab'il na'leb' aran Temán? Ma x'oso'k li seeb'al k'a'uxl rik'ineb' li wankeb' xna'leb'? Ma xsachk tab'i' li chaab'il na'leb'?

⁸ Elelinqex chi junpaat, ex aj Dedán, sik'omaq eena'aj re teemuq eerib' chi us, xb'aan naq ok we chi xrahob'tesinkileb' li ralal xk'ajoleb' laj Esaú, xwulak xkutankil naq tinraqoq aatin sa' xb'eeneb'.

⁹ Naq eb' laj ch'oqol ru uub' neke'chalk aawik'in, neke'xkanab' kach'inaq re sakonaak. Naq eb' aj elq' neke'ok sa' laawochoch chiru q'oqyink, neke'xk'am ka'ajwi' li neke'raj xk'amb'al.

¹⁰ Ab'an laa'in rek' xinkanab'eb' laj Esaú, xinkanab' chi kutankil li na'ajej neke'xmuq wi' rib' ut ink'a' chik te'ruuq wank chi muqmu. Chi junwaakaj xe'sachmank ruheb' li ralal xk'ajol, eb' li rech'alal jo'wi' eb' li rechkab'al; maajun chik naxye:

¹¹ «Kanab'eb' chinch'oolani eb' laaneb'a'yox, ut k'ojk'ooq xch'ool eb' li xmalka'an chiwix»”.

¹² Jo'ka'in kixye li Qaawa': “Wi eb' li ink'a' xk'ulub'eb' xk'ulb'al li rahilal, xe'rahob'tesiik, ma toja' ta chik laa'at tatkanaaq chi ink'a' taatoj rix laamaak? Relik chi yaal naq tento tatrahob'tesiiq re xtojb'al rix laamaak.

¹³ Xb'aan naq xinye injurament naq li tenamit Bosrá taasache'q ru, tz'eqtaananb'ilaq ut majewanb'ilaq; ut nakirirnak te'kanaaq chixjunileb' li xtenamitul chi junwaakaj”.

¹⁴ Jun ak' esil xwab'i rik'in li Qaawa', xtaqla chaq jun aj yehol esil sa' chixjunileb' li tenamit: “Junajiiq eerib' ut ayuqex chi yalok rik'in Edom! Kawresiiq eerib' re xik chi yalok rik'ineb'”.

¹⁵ Relik chi yaal naq jwal kach'inaqat chiruheb' li tenamit ut tz'eqtaananb'ilaqat xb'aaneb' li poyanam.

¹⁶ Xatxb'alaq'i laaq'etq'etil, xb'aan naq xiwajel aawu naq xatwank. Laa'at wankat sa' xyanqeb' li saqoonak ut kaw aach'ool rik'ineb' li najt xteramil tzuul. Us ta taayiib' laamuheb'aal chi jwal najt xteram jo' li t'iw, toj aran ajwi' tatinkub'si chaq -chan li Qaawa'-.

¹⁷ “Xiwajelaq chik rilb'al Edom. Jo'k'ihaleb' li te'nume'q aran, te'sachq xch'ool chi rilb'al ut te'xse'e chixjunil li rahilal xk'ulum.

¹⁸ Juntaq'eetaq rik'in Sodoom ut Gomoor, naq ke'sache'k ru rochb'eeneb' li tenamit wankeb' chi xsutam: maajun chik taanume'q chi moko taawanq sa' li na'ajej a'an -chan li Qaawa'-.

¹⁹ “Laa'in tinchalq jo' li kaqkoj naq na'elk chaq sa' li k'iche' chire li nima' Jordán ut naxik sa' li raxalpim chiru taq'a; jo'kan ajwi' naq twaanilasiheb' chi junpaat eb' laj Edom, ut sa' li xna'ajeb' tink'e chi k'anjelak li ani nawulak chiwu. Xb'aan naq ani tixjuntaq'eeta rib' wik'in ut taanumtaaq chiwu? Ma wank tab'i' junaq aj k'aak'alenel li truuq tixkuy wank chiwu laa'in?

²⁰ “Jo'kan naq ab'ihomaq li tinb'aanu laa'in, li Qaawa', reheb' laj Edom, k'aru xink'uub' xb'aanunkil reheb' laj Temán. Jukunb'il naq te'isiiq eb' li raleb' li karneer, ut li xna'ajeb' taasache'q ru.

²¹ Xb'aan li rahilal te'xk'ul eb' laj Edom, siksootqeb' chixjunil li ruuchich'och' xb'aan xxiweb'; ut toj chire li Kaqi Palaw taa'ab'iiq li xyaab' xkuxeb'.

²² K'ehomaq reetal, li xik' na'ilok re Bosrá yo chi chalk sa' xb'een jo' junaq t'iw li xhel li xxik' sa' xb'een li xtzak. Sa' li kutan a'an q'axal te'xiwaq eb' li kaweb' rib' aj Edom, chanchanaqeb' li ixq li ok re chi alank”.

Li rahilal te'xk'ul eb' laj Damaask

²³ Jo'ka'in kixye li Qaawa' chirixeb' laj Damaask: “Yo xk'a'uxeb' laj Jamat ut eb' laj Arpad, xb'aan naq xe'rab'i resil li rahilal chalk re; nachiq'chotk li xch'ooleb' jo' li palaw naheetank ru, ut ink'a' chik wankeb' sa' tuqtuukilal.

²⁴ Eb' laj Damaask xe'ch'inank xch'ool ut okeb' re chi elelik. Neke'siksotk xb'aan xxiweb'; k'ajo' li rahilal yookeb' chi xk'ulb'al, jo' junaq ixq li ok re chi alank.

²⁵ K'a' naq nakirirnak xkanaak li tenamit li jwal k'eeb'il xloq'al, li tenamit re li sahil ch'oolejil?

²⁶ Relik chi yaal naq sa' li kutan a'an eb' li saaj winq kamenaq te'kanaaq sa'eb' li k'ayiil ut chixjunileb' laj puub' te'kamsiiq sa'atqeb' li b'e -chan li Nimajwal Yos-.

²⁷ Laa'in tink'e xxamlel eb' li xsuttz'akil Damaask ut te'oso'q eb' li ch'ina'usil ochoch re Ben-Adad”.

Li rahilal te'xk'ul eb' laj Arabia

²⁸ Jo'ka'in kixye li Qaawa' chirixeb' laj Kedar ut eb' li awab'ej re Jasor, li ke'q'axe'k ru xb'aan laj Nabukodonosor, li awab'ej re Babilonia: “Xaqlinqex ut ayuqex chi yalok rik'in Kedar, sachomaqeb' ru li poyanam wankeb' sa' xjayal releb'l saq'e.

²⁹ Eechanihomaq li rochocheb' ut li xketomqeb', li xmuheb'aaleb' ut chixjunil li nak'anjelak reheb'. Maq'omaq eb' li xkameey chiruheb' ut japomaq eere chi xyeeb'al: «Yalaq b'ar yo li raaxiik'!», cha'qex.

³⁰ Ex aj Jasor, seeb'aaq eerib' chi elelik, ayuqex chi najt b'arwi' ink'a' textawe'q -chan li Qaawa'-, xb'aan naq laj Nabukodonosor, li awab'ej re Babilonia, wank jun na'leb' cherix ut ak xk'uub'ahom eerahob'tesinkil.

³¹ Xaqlinqex ut ayuqex chi xchapb'al li tenamit wank sa' tuqtuukilal, li maak'a' naxk'oxla -chan li Qaawa'-; moko sutsu ta chi tz'akil chi moko wankeb' rokeb'aal, ut xjunes wank.

³² Elq'ahomaq eb' li xkameey ut eechanihomaq chixjunil li xketomqeb'. Sa' xkaaxukuutil li ruuchich'och', tincha'cha'i chixjunileb' li neke'xjo li xjolomeb' ut yalaq b'ar tink'am chaq li rahilal sa' xb'eeneb' -chan li Qaawa'-.

³³ Li tenamit Jasor taakanaaq chi junajwa cho'q xna'ajeb' laj xojb' ut taajoxk'ch'och'o'q. Maajun chik poyanam taawanq sa' li na'ajej a'an chi moko taa'uxq chik nume'k aran”.

Li rahilal te'xk'ul eb' laj Elam

³⁴ A'aneb' a'in li aatin kixye li Qaawa' re laj Jeremías chirix li rahilal tixk'ul Elam, naq laj Sedesías kixtikib' awab'ejink sa' xb'eeneb' laj Judá.

³⁵ Li Nimajwal Yos kixye chi jo'ka'in: “Laa'in tintoq li xna' xsimaj Elam, li q'axal naxkawu wi' xch'ool.

³⁶ Sa' xkaaxukuutil li ruuchich'och' te'chalq li kaahib' chi iq', re naq te'xcha'cha'iheb' laj Elam sa' chixjunil li ruuchich'och' ut yalaq b'ar te'wulaq chi xkolb'al rib'eb'.

³⁷ Tink'eheb' chi xiwak eb' laj Elam chiruheb' li xik' neke'ilok reheb', a'eb' li neke'ajok xkamsinkileb'; ut tink'am chaq li rahilal sa' xb'eeneb', a' li xxamlel linjosq'il -chan li Qaawa'-.

³⁸ Aran Elam tink'ojob' link'ojarib'aal ut tinsach ruheb' li awab'ej jo'wi' eb' li xninqal ru winq -chan li Qaawa'-.

³⁹ Ab'an chiruheb' li kutan chaalel tinsutq'isiheb' chaq wi' chik eb' laj Elam li wankeb' chaq chi preexil”, chan li Qaawa'.