Jeremías 48 - Q'eqchi Bible

Li rahilal te'xk'ul eb' laj Mohab

¹ Jo'ka'in kixye li Nimajwal Yos, li xYos laj Israel, chirixeb' laj Mohab: “Toq'ob' xaq ru li tenamit Nebo naq juk'ulk aj chik. Xsache'k xwankil ut x'eechaniik Kiriatáhin. Xutaanal xkanaak li kawub'resinb'il tenamit naq xjuk'e'k.

² Maak'a' chik xloq'al Mohab. Aran Jesbón xe'xk'uub' xsachb'al ru li tenamit Mohab: «Kimqex ut qasachaq ru sa' ruuchich'och'», chankeb'. Jo'kan ajwi' naq tat-oso'q laa'at, a Madmén, ut li raaxiik' junelik yooq chasutb'al.

³ Japeb' re laj Joronáhin xb'aan li juk'ink ut li nimla rahilal.

⁴ “Xjuk'mank chi junajwa li tenamit Mohab ut li xyaab'eb' li kok'al na'ab'iik yalaq b'ar.

⁵ Neke'huyhutk chi yaab'ak naq yookeb' chi taqsink Luhit; neke'ruk' li xya'al ruheb' naq yookeb' chi xik Joronáhin.

⁶ Elenqex, kolomaq eerib', jo'kaqex li k'iche'il b'uur sa' li chaqich'och'!

⁷ “At Mohab, laa'at xak'ojob' laach'ool rik'in laab'ihomal ut laab'aanuhom, ab'anan tat-eechaniiq ajwi' laa'at. Laj Kamós, laayos, taak'ame'q chi preexil rochb'eeneb' laj tij ut li xninqaleb' ru winq.

⁸ Taachalq laj sachonel sa' xb'een li junjunq chi tenamit ut maajun taakole'q sa' ruq'. Li ru taq'a taasachmanq ru ut eb' li roq taq'a nakirirnak taakanaaq -chan li Qaawa'-.

⁹ Kawresihomaq li xmuqleb'aal Mohab, xb'aan naq oso'k re; eb' li xtenamit te'kanaaq chi po'lemil ut maajun chik poyanam wanq chisa'”.

¹⁰ Tz'eqtaananb'ilaq li ani naxq'ema rib' chi xb'aanunkil li xk'anjel li Qaawa'! Tz'eqtaananb'ilaq li ink'a' naraj okenk chi kamsink!

¹¹ Mohab sa wank ut sa' tuqtuukilal chalen sa' li xsaajilal; maajun wa x'isiik sa' li xna'aj re ta xk'ame'k sa' jalanil tenamit. Chanchan li b'iin li ink'a' najalyaak li xna'aj, jo'kan naq ink'a' najalaak xsahil jo'wi' li xsununkil.

¹² “Ab'anan chalk re xkutankil naq laa'in tintaqlaheb' chaq laj jalonel xna'aj li b'iin: te'yamtesiiq xsa'eb' li kuk ut te'puk'iiq chi junwaakaj -chan li Qaawa'-.

¹³ Toja' naq Mohab taaxutaanaq xb'aan laj Kemós, li xyos, jo' naq ke'xutaanak eb' laj Israel xb'aan Betel, li q'axal ke'xkawu wi' xch'ooleb'.

¹⁴ “K'a'ut naq nekeye laa'ex aj Mohab: «Kaw qib' ut k'ajo' xnimal li qametz'ew chi yalok»?

¹⁵ Chalk re li taasachoq re Mohab ut eb' li xtenamit; chixjunileb' li xsaajil aleb' te'k'ame'q chi kamk -chan li xnimal ru Awab'ej, a' li Nimajwal Yos naxk'ab'a'in-.

¹⁶ Nach' chik wank li roso'jik Mohab, xseeb'ank chaq li raaxiik' sa' xb'een.

¹⁷ Chiraho'q eech'ool chirix Mohab, laa'ex li wankex chi xsutam ut nekexnawok ru; yaab'anqex chirix ut yehomaq: «Xtoqe'k li kawil che' a'in, x'oso'k li xwankil ut li xloq'al Mohab», cha'qex.

¹⁸ “Kub'sihomaq leewankil, ex aj Dibón, ut k'ojob'omaq eerib' sa' li pojtz', xb'aan naq chalk re sa' eeb'een laj sachonel ut xjuk'eb' chik leekawub'resinb'il ochoch.

¹⁹ Xaqlinqex sa' li b'e, ex aj Aroher, ut ilomaq; patz'omaq reheb' laj eelel li xe'kole'k k'aru xk'ulmank.

²⁰ Xutaanal xkanaak Mohab ut sachso xch'ool, xb'aan naq xsache'k xwankil. Yaab'anqex ut tz'uyinqex chirix! Yehomaq resil aran Arnón naq xjuk'e'k Mohab”.

²¹ Xwulak li raqb'a aatin sa' xb'eeneb' li tenamit wankeb' chiru taq'a: aran Jolón, Yahás, Mepahat,

²² Dibón, Nebo, Bet-Diblatáhin,

²³ Kiriatáhin, Bet-Kamul, Bet-Mehón,

²⁴ Keryot, Bosrá, ut sa' xb'eeneb' chixjunil li tenamit wankeb' sa' xteepal Mohab, jo' li wankeb' chaq chi najt ut li wankeb' chi nach'.

²⁵ “X'oso'k li xwankil Mohab ut maak'a' chik xkawilal”, chan li Qaawa'.

²⁶ Kaltesihomaq eb' laj Mohab, xb'aan naq xe'xq'etq'eti rib' chiru li Qaawa'. Eb' laj Mohab te'xtolk'osi rib' sa'eb' li xxa'aw ut te'se'eeq xb'aan chixjunileb'.

²⁷ Ex aj Mohab, ma ink'a' tab'i' xese'eb' laj Israel? Rajlal naq nekex'aatinak chirixeb', nekeb'anb'ani leejolom, jo'keb' tawi' aj elq'.

²⁸ Elenqex sa'eb' leetenamit, ex aj Mohab, ayuqex chi wank sa'eb' li saqoonak jo'eb' li mukuy li neke'sukub'k junqre li uul.

²⁹ Naqanaw naq q'axal q'etq'eteb' laj Mohab: neke'xk'e xwankileb', neke'numtaak ut jipeb'.

³⁰ Li Qaawa' ajwi' naxnaw naq jwal neke'xnima xwankil; ab'anan moko us ta te'elq, ut maak'a' na'ok wi' li xb'aanuhomeb'.

³¹ Jo'kan naq tinyaab'aq ut tintz'uyinq chirixeb' laj Mohab, taamayoq linch'ool chirixeb' laj Kir-Jaréset.

³² Q'axal wi' chik tinyaab'aq cherix, ex aj Sibmá, chiru naq xinyaab'ak chirixeb' laj Jaser. Jo'kex jun xtoonal uub' li neke'nume'k li ruq' toj junpak'al li palaw, toj sa' li tenamit Jaser neke'wulak. Ab'an anaqwan chixjunil li ru laa'uub' xsache'k xb'aan laj sachonel.

³³ Maak'a' chik li b'ichank ut li sahil ch'oolejil sa'eb' li k'aleb'aal re Mohab. Xlajk li b'iin sa'eb' li k'uuleb'aal, maajun chik nayatz'ok re li uub', ut maak'a' chik li b'ichank xb'aan li sahil ch'oolej.

³⁴ Li xyaab'eb' laj Jesbón nawulak toj Elalé ut na'ab'imank toj Yahás; na'uxk japok e Sohar ut na'ab'iik toj Joronáhin ut Eklat-Selisiyá, xb'aan naq xchaqik li nima' re Nimrín.

³⁵ “Tinram chiruheb' laj Mohab li xik chi tzuul chi mayejak ut chi k'atok pom chiruheb' li jalanil yos”, chan li Qaawa'.

³⁶ Jo'kan naq namayok linch'ool chirix Mohab; ninyaab'ak chirixeb' laj Kir-Jaréset jo' jun li xolb', xb'aan naq chixjunil li b'ihomal li xe'xtuub', x'oso'k.

³⁷ Chixjunileb' xe'xjo li xjolomeb' ut li xmacheb'; xe'xsetatq xsa' li ruq'eb' ut xe'xk'e q'es ruhil t'ikr chirixeb'.

³⁸ “Sa' xb'eeneb' li kab'l ut sa'atqeb' li b'e re Mohab junes yaab'ak na'ab'imank, xb'aan naq kok'putz' xinkanab' Mohab jo' junaq ch'och'uk'al li maak'a' na'ok wi'”, chan li Qaawa'.

³⁹ K'ehomaq reetal chanru xkanaak Mohab, xiwajel chik rilb'al. Xjipi rib' ut xutaanal xkanaak; tz'eqtaananb'il aj chik xb'aaneb' chixjunileb' li wankeb' chi xsutam.

⁴⁰ Jo'ka'in kixye li Qaawa': “Eb' li xik' neke'ilok re Mohab xe'xkut rib' sa' xb'een jo' junaq t'iw li xhel li xxik' sa' xb'een li xtzak.

⁴¹ Xe'chapje'k eb' li tenamit ut xe'eechaniik eb' li kawub'resinb'il ochoch. Chiru li kutan a'an k'ajo' naq taamayoq xch'ooleb' laj puub' aj Mohab, siksootqeb' aj chik jo'kaqeb' li ixq ok re chi alank.

⁴² Taajuk'manq xwankil Mohab ut moko tenamit ta chik tkanaaq, xb'aan naq xq'etq'eti rib' chiwu laa'in li Qaawa'.

⁴³ Ex aj Mohab, xiwxiw wanqex xb'aan naq texchape'q sa' junaq jul malaj ra'al -chan li Qaawa'-.

⁴⁴ Li ani taa'eleliq chiru laj yo, toxt'ane'q sa' li jul; ut li taa'elq chaq sa' li jul, toxt'ane'q sa' li ra'al, xb'aan naq tink'e Mohab sa' tojb'amaak naq taawulaq xkutankil li rahilal -chan li Qaawa'-.

⁴⁵ “Eb' laj eelel te'xik chi tawajenaqeb' chi xkolb'al rib' sa' xmu Jesbón; ab'an x'elk chaq jun xam aran Jesbón, sa' rochoch laj Sijón, li awab'ej, ut xk'ateb' li xtzuulul Mohab, a'an jun tenamit q'etq'et ut aj po'ol ch'oolej.

⁴⁶ Ra chaalel sa' aab'een, a Mohab! Oso'jenaqat chik, at tenamit Kamós: xe'isiik eb' laawalal aak'ajol sa' li xna'ajeb' ut xe'k'ame'k chi preexil.

⁴⁷ Ab'anan laa'in, sa' roso'jikeb' li kutan, tink'ameb' chaq wi' chik eb' laj Mohab sa' li xna'ajeb'”, chan li Qaawa'. Arin xraqe'k resilal li rahilal te'xk'ul eb' laj Mohab.