Jeremías 43 - Q'eqchi Bible

Laj Jeremías kik'ame'k Ejiipt

¹ Naq laj Jeremías kiraqe'k chi xnumsinkil re li tenamit chixjunil li kiyehe'k re xb'aan li Qaawa', li xYoseb',

² laj Asarías, ralal laj Hosaías, ut laj Jwan, ralal laj Kareha, rochb'eeneb' li winq jwal q'etq'eteb', ke'xye re laj Jeremías: “Tik'ti' li yookat chi xyeeb'al qe. Li Qaawa', li qaYos, ink'a' xatxtaqla chaq xyeeb'al qe naq ink'a' tooxik chi wank Ejiipt.

³ A' laj Baruk, ralal laj Nerías, xtakchi'ink chaq aawe re qaq'axtesinkil sa' ruq'eb' laj Kaldeha, re tookamsiiq malaj took'ame'q Babilonia”.

⁴ Ut chixjunileb' ke'xq'et li raatin li Qaawa'. Maajun kikanaak sa' xteepal Judá, chi moko laj Jwan, ralal laj Kareha, chi moko eb' li xjolomileb' laj puub'.

⁵ Laj Jwan, ralal laj Kareha, ut chixjunileb' li xjolomileb' laj puub' ke'xch'utub'eb' laj Judá li toj wankeb' aran, a'eb' li ke'sutq'ije'k chaq sa'eb' li tenamit b'arwi' junxil ke'cha'cha'iik:

⁶ eb' li winq, li ixq, li kok'al, li xrab'ineb' li awab'ej ut chixjunileb' li poyanam li ke'kanab'aak rub'el xwankil laj Kedalías, ralal laj Ajikán ut ri laj Safán, xb'aan laj Nabusaradán, xjolomileb' laj k'aak'alenel. Ke'xch'utub' ajwi' laj Jeremías, li propeet, ut laj Baruk, ralal laj Nerías.

⁷ Ut chixjunileb' koheb' Ejiipt, chi ink'a' ke'xpaab' li raatin li Qaawa', ut koxe'kanaaq sa' li tenamit Tafnes.

⁸ Aran li Qaawa' kiraatina laj Jeremías ut kixye re:

⁹ “Xok wiib' oxib'aq ninqi pek ut ch'ikeb' sa' ch'och', chiruheb' laj Judá, sa' rokeb'aal li rochoch laj Parahón, arin Tafnes;

¹⁰ ut ye reheb': «Li Nimajwal Yos, li xYos laj Israel, xye chi jo'ka'in: Laa'in tintaqla chaq laj Nabukodonosor, laj k'anjel chiwu ut awab'ej re Babilonia, ut tink'ojob' li xk'ojarib'aal ut li xmuheb'aal sa' xb'eeneb' li pek a'in li xinch'ik sa' ch'och'.

¹¹ Taachalq ut tolxjuk' Ejiipt. Eb' li ak teneb'anb'il kamk sa' xb'eeneb', te'kamsiiq; eb' li tento te'isiiq sa' li xna'ajeb', te'isiiq; ut eb' li ak teneb'anb'il naq te'kamq sa' li raaxiik', sa' li raaxiik' te'kamq.

¹² Tixk'ateb' li rochochil li xyoseb' laj Ejiipt; tixk'ateb' ajwi' eb' li yos malaj ut tixk'ameb' chirix. Tixch'iile li tenamit Ejiipt, jo' laj ilol ketomq naxch'iile ru li raq', ut chirix chik a'an taaxik jo' junaq li xq'axok u.

¹³ Tixputz'i eb' li xninqal pek li wankeb' Bet-Semes, sa' xteepal Ejiipt, ut tixk'ateb' li rochochil li xyoseb' laj Ejiipt»”.