Jeremías 42 - Q'eqchi Bible

Ke'xtz'aama usilal chiru laj Jeremías naq taatijoq chirixeb'

¹ Toja' naq chixjunileb' li xjolomileb' laj puub' rochb'eeneb' laj Jwan, ralal laj Kareha, ut laj Asarías, ralal laj Hosaías, ut chixjunileb' li poyanam, jo' kok' ut ninq, ke'wulak chi aatinak

² rik'in laj Jeremías, li propeet, ut ke'xye re: “Naqatz'aama jun li usilal chawu: Tijon chiru li Qaawa' laaYos, chiqix laa'o li jun ch'inach'uuto xookanaak. K'ajo' qak'ihal junxil, ut anaqwan yookat chik rilb'al naq ink'a' chik k'iho.

³ Tijon chiqix chiru li Qaawa' laaYos, re naq tixk'ut chiqu li b'e tooxik wi' ut k'aru tqab'aanu”, chankeb'.

⁴ Kichaq'ok laj Jeremías ut kixye reheb': “Us, maak'a' reek'. Anaqwan ajwi' tintijoq cherix chiru li Qaawa' leeYos, jo' chanru xetz'aama chiwu, ut tink'e chenaw chixjunil li k'aru tinxsume wi', chi maajun aatin tinmuq cheru”.

⁵ Toja' naq eb' a'an ke'xye re laj Jeremías: “Li Qaawa' laaYos a'an tiik xch'ool, ut a'an chikanaaq cho'q testiiw chiqix laa'o wi ink'a' tqapaab' li tixk'e chiqab'aanu.

⁶ A' yaal ma tixk'ul qach'ool li xsumehom li Yos malaj ut ink'a', laa'o tqapaab' li Qaawa' li qaYos, li xatqataqla wi' chi tz'aamank chi elajink. Wi too'ab'inq chiru, us too'elq”, chankeb'.

Li xsumehom li Qaawa'

⁷ Lajeeb' kutan chik chirix a'an, li Qaawa' ki'aatinak rik'in laj Jeremías,

⁸ ut a'an kixb'oq laj Jwan, ralal laj Kareha, rochb'eeneb' li xjolomileb' laj puub' ut chixjunileb' li poyanam, jo' kok' ut ninq,

⁹ ut kixye reheb': “Li Qaawa', li xYos laj Israel, li xineetaqla wi' chi tz'aamank chi elajink cherix, xye chi jo'ka'in:

¹⁰ «Wi laa'ex texkanaaq sa' li na'ajej a'in, laa'in tinwaklesi eech'ool ut ink'a' texinrahob'tesi; texink'ojob' sa' leena'aj ut ink'a' chik texinjuk', xb'aan naq naraho'k linch'ool chirix li rahilal xinb'aanu eere.

¹¹ Meexiwa ru li awab'ej re Babilonia, li q'axal nekexxiwak xb'aan. Mexxiwak chiru xb'aan naq wankin eerik'in chekolb'al ut cherisinkil rub'el li xwankil.

¹² Ninye li waatin naq twuxtaana eeru ut tink'e laj Nabukodonosor chi ruxtaanankil eeru re naq texxkanab' chi sutq'iik sa' leetenamit».

¹³ “Ab'anan, wi laa'ex ink'a' teeraj kanaak sa' li na'ajej a'in, teeraj b'an chik xq'etb'al raatin li Qaawa' leeYos,

¹⁴ rik'in xyeeb'al: «Jwal us tooxik Ejiipt, b'arwi' ink'a' chik tqil li raaxiik' chi moko tqab'i xyaab'eb' li pur, chi moko tookamq xb'aan li we'ej»,

¹⁵ ab'ihomaq laa'ex, li jun ch'inach'uutex aj Judá, k'aru naxye eere li Nimajwal Yos, li xYos laj Israel: «Wi relik chi yaal teeraj xik chi na'ajunk Ejiipt,

¹⁶ aran ajwi' toxexxtaw li raaxiik' li jwal nekexiwa, jo'wi' li we'ej li ink'a' nekeraj xk'ulb'al. Maajun taakole'q, ut aran Ejiipt texkamq chejunilex.

¹⁷ Relik chi yaal naq jo'k'ihaleb' li kaweb' xch'ool chi xik chi na'ajunk Ejiipt, aran te'kamq xb'aan li raaxiik', li we'ej malaj xb'aan li raxkamk. Maajun taakole'q aran, ut maajun ink'a' ta tixk'ul li rahilal li tintaqla sa' xb'eeneb'».

¹⁸ “Jo'ka'in xye li Nimajwal Yos, li xYos laj Israel: «Jo' naq xink'ut linjosq'il chiruheb' laj Jerusalén, jo'kan ajwi' naq taachalq linjosq'il sa' eeb'een wi texxik Ejiipt. Texmajewaaq, texse'eeq, tex'eetz'uuq ut xutaanalaqex yalaq b'ar, ut ink'a' chik teeril li na'ajej a'in».

¹⁹ Laa'ex li toj wankex Judá, li Qaawa' naxye eere naq mexxik Ejiipt. K'ehomaq reetal, laa'in yookin chi xyeeb'al xyaalal eere anaqwan.

²⁰ Yookex chi xb'alaq'inkil eerib' eejunes, xb'aan naq laa'ex ajwi' xexyehok we: «Tijon chiqix chiru li Qaawa' laaYos, re naq tixk'ut chiqu li b'e tooxik wi' ut k'aru li tqab'aanu».

²¹ Laa'in xink'e chenaw anaqwan li k'aru xye we li Qaawa' leeYos, ab'an laa'ex ink'a' nekeraj xpaab'ankil.

²² Jo'kan utan, chenawaq chi us naq texkamq xb'aan li raaxiik', li we'ej ut li raxkamk, yalaq b'ar teeraj wi' na'ajunk”.