Jeremías 38 - Q'eqchi Bible

Laj Jeremías kik'ehe'k sa' xjulel li ha'

¹ Laj Sefatías, ralal laj Matán, laj Kedalías, ralal laj Pajsur, laj Jukal, ralal laj Selemías, ut laj Pajsur, ralal laj Malkías, ke'rab'i naq laj Jeremías ki'aatinak chiruheb' chixjunil li tenamit ut kixye reheb':

² “Jo'ka'in xye li Qaawa': «Li ani taakanaaq sa' li tenamit a'in taakamsiiq chi q'esnal ch'iich', malaj taakamq xb'aan li we'ej malaj ut xb'aan li raxkamk. Ab'an li taa'elq ut tixq'axtesi rib' sa' ruq'eb' laj Kaldeha, a'an tixkol li xyu'am ut us taa'elq».

³ Xyehom ajwi' li Qaawa': «Relik chi yaal naq li tenamit a'in taaq'axtesimanq sa' ruq'eb' laj puub' li wankeb' rub'el xwankil li awab'ej re Babilonia, ut taa'eechaniiq chi maak'a' chik xramb'al»”.

⁴ Toja' naq eb' li xjolomileb' li tenamit ke'xye re li awab'ej: “Tento xkamsinkil li winq a'an, xb'aan naq, rik'ineb' li aatin naxye, naxch'ina xch'ooleb' laj puub' li toj wankeb' sa' li tenamit, ut naxch'ina ajwi' xch'ooleb' chixjunil li poyanam. Li winq a'in ink'a' naxsik' li usilal cho'q re li tenamit, a' b'an li rahilal naxsik'”.

⁵ Kichaq'ok laj Sedesías, li awab'ej, ut kixye: “B'aanuhomaq re li k'aru teeraj xb'aanunkil. Laa'in maak'a' naru ninb'aanu re xramb'al cheru”.

⁶ Tikto eb' a'an ke'xchap laj Jeremías ut ke'xk'e sa' li xjulel xha' laj Malkías, ralal li awab'ej, li wank chiru xneb'aalil li rochocheb' laj k'aak'alenel. Ke'xkub'si laj Jeremías rik'in k'aam sa' li xjulel li ha'. Aran maak'a' chik ha', junes sulul aj chik wank chisa'; jo'kan naq laj Jeremías kisob'e'k sa' li sulul.

⁷ Naq laj Ebedmélek, aj Etiopía, aj ilol re li rochoch li awab'ej, kirab'i naq kik'ehe'k laj Jeremías sa' xjulel li ha',

⁸ ki'elk sa' li ochoch ut koho chi aatinak rik'in li awab'ej li k'ojk'o sa' li Rokeb'aal laj Benjamín chiruheb' li kutan a'an, ut kixye re:

⁹ “At awab'ej, yib'ru xe'xb'aanu eb' li winq a'an naq xe'xk'e sa' xjulel li ha' laj Jeremías, li propeet. Toq'ob' ru; aran taakamq xb'aan xtz'okajik, xb'aan naq maak'a' chik wa sa' li tenamit”.

¹⁰ Tikto li awab'ej kixye re laj Ebedmélek aj Etiopía: “Sik' lajeeb'aq xka'k'aaleb' chi winq re naq te'risi chaq laj Jeremías sa' xjulel li ha', naq toj maji' nakamk”.

¹¹ Laj Ebedmélek kixsik'eb' li winq ut koho sa' rochoch li awab'ej, sa' xk'uuleb'aaleb' li aq'ej; kixxok q'eel t'ikr li maak'a' chik na'ok wi' ut, rik'in k'aam, kixkub'si sa' li xjulel ha' li wan wi' laj Jeremías:

¹² “K'eheb' li t'ikr a'an sa' laatel, re naq ink'a' tatxk'at li k'aam”, chankeb' re. Jo'ka'in kixb'aanu laj Jeremías.

¹³ Toja' naq eb' li winq ke'risi chaq li propeet chi kelonb'il ut ke'xkanab' chiru xneb'aalil li rochocheb' laj k'aak'alenel.

Laj Sedesías kixtaqla xb'oqb'al laj Jeremías

¹⁴ Chirix chik a'an laj Sedesías, li awab'ej, kixtaqla xb'oqb'al laj Jeremías, li propeet, re taa'aatinaq rik'in sa' li rox okeb'aal re li rochoch li Qaawa'; ut aran kixye re: “Wank k'aru tinpatz' aawe, ut nintz'aama chawu naq mik'a' aamuq chiwu”, chan re.

¹⁵ Kichaq'ok laj Jeremías ut kixye re: “Wi ninch'olob' li yaal chawu, ch'olch'o naq tinaakamsi; ut wi tink'e junaq aana'leb', ink'a' tinaapaab'”.

¹⁶ Toja' naq li awab'ej kixye xjurament re laj Jeremías sa' hasb': “Sa' xk'ab'a' li yo'yookil Yos li xk'ehok qayu'am, ninye li waatin naq ink'a' tatink'e chi kamsiik chi moko tatinq'axtesi reheb' li neke'ajok aakamsinkil”.

¹⁷ Tikto laj Jeremías kixye re laj Sedesías: “Jo'ka'in xye li Nimajwal Yos, xYos laj Israel: «Wi taaq'axtesi aawib' sa' ruq'eb' li xjolomileb' li xsoldaad li awab'ej re Babilonia, laa'at ut eb' laajunkab'al texkole'q, ut li tenamit a'in ink'a' taak'atmanq.

¹⁸ Ab'an wi ink'a' taaq'axtesi aawib' sa' ruq'eb', li tenamit a'in taa'eechaniiq xb'aaneb' laj Kaldeha ut taak'atmanq; ut laa'at ink'a' ajwi' tatkole'q sa' ruq'eb'»”.

¹⁹ Kichaq'ok laj Sedesías, li awab'ej, ut kixye: “Ninxiwak xb'aaneb' laj Judiiy li xe'q'axonk sa' xyanqeb' laj Kaldeha. Mare anchal tinq'axtesiiq sa' ruq'eb' ut tine'xrahob'tesi”.

²⁰ Laj Jeremías kixye re: “At awab'ej, laa'at ink'a' tatq'axtesiiq sa' ruq'eb' a'an. Paab' li naxye aawe li Qaawa' chi xtz'uumal we. Us tat-elq chi jo'kan ut taakol laayu'am.

²¹ Ab'an wi ink'a' taaq'axtesi aawib', a'an a'in li xk'utb'esi chiwu li Qaawa':

²² Chixjunileb' li ixq li xe'kanaak sa' rochoch li awab'ej re Judá, te'isiiq ut te'q'axtesimanq sa' ruq'eb' li xjolomileb' li xsoldaad li awab'ej re Babilonia; ut eb' li ixq a'an yooqeb' chi xyeeb'al: «Xate'xb'alaq'i ut xe'numtaak sa' aab'een eb' laachaab'il amiiw. Naq xsob'e'k laawoq sa' sulul, xate'xkanab' aajunes», cha'qeb'.

²³ “Eb' laawixaqil ut eb' laawalal aak'ajol te'q'axtesiiq sa' ruq'eb' laj Kaldeha, ut laa'at ink'a' tatkole'q sa' ruq'eb' a'an, tate'xk'e b'an rub'el xwankil li awab'ej re Babilonia ut te'xk'at li tenamit a'in”.

²⁴ Toja' naq laj Sedesías kixye re laj Jeremías: “Maajun chinawoq re a'in, wi nakawaj xkolb'al laayu'am.

²⁵ Wi eb' li xjolomileb' li tenamit te'xnaw naq xin'aatinak aawik'in ut tole'xpatz' aawe: «Ch'olob' chiqu k'aru xaye re li awab'ej, chi maajun aatin taamuq chiqu. Ye ajwi' qe k'aru xatraatina wi' li awab'ej. Chi jo'kan ink'a' tatqakamsi», cha'qeb',

²⁶ laa'at taaye reheb': «Xintz'aama chiru li awab'ej naq ink'a' chik tinxtaqla sa' rochoch laj Jonatán, re naq ink'a' tinkamq aran», cha'qat reheb'”.

²⁷ Ut relik chi yaal chixjunileb' li xjolomileb' li tenamit kole'xpatz' re laj Jeremías chixjunil li ak yeeb'il re, ab'an a'an kixsumeheb' jo' chanru xyehe'k re xb'aan li awab'ej. Toja' naq ke'xkanab' xch'i'ch'i'inkil, xb'aan naq maa'ani ki'ab'ink re li k'aru xyeemank.

²⁸ Ut laj Jeremías kikanaak chiru xneb'aalil li rochocheb' laj k'aak'alenel, toj sa' li kutan ki'eechaniik wi' Jerusalén xb'aaneb' laj Kaldeha.