Jeremías 36 - Q'eqchi Bible

Laj Johakín kixk'at li b'otb'ookil hu

¹ Ak yo xka chihab' chi awab'ejink laj Johakín, ralal laj Josías, awab'ej re Judá, li Qaawa' kiraatina laj Jeremías ut kixye re:

² “Sik' junaq b'otb'ookil hu ut tz'iib'a chisa' chixjunileb' li aatin inyehom aawe chirix li tixk'ul laj Israel, laj Judá ut chirix chixjunileb' li tenamit chalen chaq xb'enwa toj anaqwan.

³ Mare anchal eb' laj Judá te'rab'i chixjunil li rahilal xink'oxla xb'aanunkil reheb', te'xyot' xch'ool te'xjal xk'a'uxl ut laa'in tinkuy tinsach li xmaakeb'”.

⁴ Toja' naq laj Jeremías kixb'oq laj Baruk, ralal laj Nerías, ut kixk'e chixtz'iib'a sa' li b'otb'ookil hu chixjunil li kiyehe'k re xb'aan li Qaawa'.

⁵ Chirix chik a'an laj Jeremías kixye re laj Baruk chi jo'ka'in: “Jo' yookat chi rilb'al, b'ak'b'ookin ut ink'a' ninru chi xik sa' rochoch li Qaawa'.

⁶ Jo'kan utan ohat laa'at sa' xkutankil li ayuunik ut yaab'asi chi kaw xyaab' laakux chixjunil li raatin li Qaawa' li xink'e chatz'iib'a sa' li b'otb'ookil hu. Yaab'asi sa' xxikeb' li poyanam ut sa' xxikeb' ajwi' chixjunileb' laj Judá li xe'chalje'k chaq sa' li xtenamiteb'.

⁷ Mare chan naq te'xtz'aama xkuyb'al li xmaakeb' chiru li Qaawa' ut li junjunq tixkanab' xb'aanunkil li maa'usilal, xb'aan naq k'ajo' xjosq'il li Qaawa' sa' xb'een li tenamit a'in”.

⁸ Laj Baruk, ralal laj Nerías, kixb'aanu chixjunil li kiyehe'k re xb'aan laj Jeremías, li propeet; ut kixyaab'asi li raatin li Qaawa' sa' rochoch li Yos.

⁹ Sa' xb'ele li po re li ro' chihab' chi awab'ejink laj Johakín, ralal laj Josías, awab'ej re Judá, kik'uub'aak xb'oqb'aleb' chi ayuunik chiru li Qaawa' chixjunileb' laj Jerusalén jo'wi' eb' laj Judá li ch'utch'uukeb' Jerusalén.

¹⁰ Laj Baruk koho chiru xneb'aalil li rochoch li Qaawa' li wank taqe'q, chi xk'atq li Ak' Okeb'aal; ut toj sa' li xna'aj laj Kemarías, ralal laj Safán laj tz'iib', kixyaab'asi sa' xxikeb' chixjunileb' li poyanam eb' li raatin laj Jeremías tz'iib'anb'il sa' li b'otb'ookil hu.

¹¹ Laj Mikeas, ralal laj Kemarías ut ri laj Safán, kirab'i chixjunil li raatin li Qaawa' jo' chanru tz'iib'anb'il sa' li b'otb'ookil hu;

¹² koho sa' rochoch li awab'ej, sa' li xna'aj laj tz'iib', ut aran koxtaweb' chi ch'utch'u chixjunileb' laj jolominel re li tenamit: laj Elisamá, laj tz'iib'; laj Delaías, ralal laj Semaías; laj Elnatán, ralal laj Akbor; laj Kemarías, ralal laj Safán; laj Sedesías, ralal laj Ananías, ut wankeb' chik naab'aleb' ninqeb' xwankil.

¹³ Laj Mikeas kixseeraq'i reheb' chixjunileb' li aatin wank sa' li b'otb'ookil hu kixyaab'asi laj Baruk sa' xxikeb' li tenamit.

¹⁴ Toja' naq chixjunileb' laj jolominel tenamit ke'xtaqla laj Jehudí, ralal laj Natanías ut ri laj Selemías, ralal laj Kusí, chi xyeeb'al re laj Baruk: “Xok li b'otb'ookil hu li xayaab'asi sa' xxikeb' li tenamit ut kim qik'in”. Laj Baruk, ralal laj Nerías, kixxok li hu ut koho b'arwi' wankeb' a'an.

¹⁵ Ke'xye re: “K'ojlan anaqwan ut yaab'asi qe li hu a'an”. Ut laj Baruk kixyaab'asi xsa' li hu sa' xxikeb'.

¹⁶ Naq ke'rab'i chixjunileb' li aatin a'an, ke'xka'ya rib' chi k'ajo'eb' xxiw, ut ke'xye: “Qayehaq resil re li awab'ej chi junpaat chixjunileb' li aatin a'in”, chankeb'.

¹⁷ Ut ke'xpatz' re laj Baruk: “Seeraq'i qe chanru naq xatz'iib'a chixjunileb' li aatin a'an”.

¹⁸ Kichaq'ok laj Baruk ut kixye: “A' ajwi' laj Jeremías xyehok we chixjunil, ut laa'in xintz'iib'a sa' linb'otb'ookil hu”, chan.

¹⁹ Toja' naq eb' li xjolomileb' li tenamit ke'xye re laj Baruk: “Ayu aawochb'een laj Jeremías chi xmuqb'al eerib' ut maajun chinawoq b'ar wanqex”.

²⁰ Ut koxe'xkanab' li b'otb'ookil hu sa' li na'ajej wan wi' laj Elisamá, laj tz'iib'; chirix chik a'an koheb' sa' rochoch li awab'ej, toj chiru neb'aal, ut ke'xseeraq'i re chixjunileb' li aatin.

²¹ Tikto li awab'ej kixtaqla laj Jehudí chi xxokb'al li b'otb'ookil hu; laj Jehudí kolxxok sa' rochoch laj Elisamá, laj tz'iib', ut kixyaab'asi sa' xxik li awab'ej jo'wi' sa' xxikeb' laj jolominel tenamit li wankeb' chi xsutam.

²² K'ojk'o li awab'ej chire xam, sa' li ochoch naxnumsi wi' li hab'alq'e, xb'aan naq a'an li xb'ele li po.

²³ Rajlal naq laj Jehudí naxyaab'asi oxib' malaj kaahib' tzol chi aatin, li awab'ej naxseti a'an chiru li xch'iich' laj tz'iib' ut naxkut sa' ru xam. Jo'kan kixb'aanu toj reetal kixchoy xk'atb'al li hu sa' li ru xam.

²⁴ Ab'anan li awab'ej ut eb' laj jolominel tenamit ink'a' b'ayaq ke'xiwak chi moko ke'xq'ich li raq'eb' naq ke'rab'i chixjunileb' li aatin a'an.

²⁵ Us ta laj Elnatán, laj Delaías ut laj Kemarías ke'xtz'aama chiru li awab'ej naq ink'a' raj tixk'at li hu a'an, ab'an ink'a' kixpaab'eb'.

²⁶ Chirix chik a'an li awab'ej kixye re laj Jeramiel, li ralal, jo' ajwi' re laj Seraías, ralal laj Asriel, ut re laj Selemías, ralal laj Abdel, naq te'xchap laj Jeremías, li propeet, rochb'een laj Baruk, laj tz'iib'. Ab'an li Qaawa' ak kixmuqeb' chik.

²⁷ Chirix chik naq li awab'ej kixk'at li hu kitz'iib'aak xb'aan laj Baruk jo' chanru yeeb'il xb'aan laj Jeremías, li Qaawa' ki'aatinak wi' chik rik'in laj Jeremías ut kixye re:

²⁸ “Xok wi' chik junaq aab'otb'ookil hu ut tz'iib'a chisa' chixjunileb' li aatin xink'e chatz'iib'a xb'enwa sa' li hu li xk'at laj Johakín, li awab'ej re Judá.

²⁹ Ut ye re laj Johakín: «Li Qaawa' xye chi jo'ka'in: Laa'at xak'at li b'otb'ookil hu ut xaye: K'a'ut naq xatz'iib'a sa' li hu naq relik chi yaal li awab'ej re Babilonia tolxjuk'i li tenamit a'in, ut maajun chik poyanam chi moko xul taakanaaq chisa'?

³⁰ At Johakín, awab'ej re Judá, laa'in li Qaawa' ninye aawe naq maajun aawalal taak'ojlaaq chi awab'ejink sa' li xk'ojarib'aal laj David; ut naq tatkamq, jiljo taakanaaq laatz'ejwal chiru xtiqwal li kutan ut chiru xkehal li q'oqyink.

³¹ Tatink'e chi xtojb'al rix laamaak; jo'kan ajwi' te'xk'ul eb' laawalal aak'ajol ut eb' laj jolominel tenamit. Tintaqla chaq sa' eeb'een, sa' xb'eeneb' laj Jerusalén jo'wi' sa' xb'eeneb' li wankeb' sa' xteepal Judá, chixjunil li rahilal li xinye resil eere chi ink'a' xineepaab'»”.

³² Toja' naq laj Jeremías kixxok jun chik li b'otb'ookil hu ut kixk'e re laj Baruk, laj tz'iib', ralal laj Nerías; ut a'an ki'ok chi xtz'iib'ankil eb' li aatin yo chi xyeeb'al laj Jeremías: kixtz'iib'a chixjunileb' li aatin jo' kixb'aanu xb'enwa sa' li b'otb'ookil hu kixk'at laj Johakín, awab'ej re Judá. Laj Jeremías kixk'e chi tz'iib'aak naab'al chik chi aatin re xtiqb'al ru li ak kixye.