Jeremías 2 - Q'eqchi Bible

Eb' laj Israel ke'xtz'eqtaana li Qaawa'

¹ Li Qaawa' kinraatina ut kixye we chi jo'ka'in:

² “Ayu ut jap aawe chi aatinak sa' xxikeb' laj Jerusalén: Jo'ka'in xye li Qaawa': Nakatjultiko'k we naq sa' laasaajilal jwal k'ojk'o laach'ool chiwix. Q'axal kinaara naq kinsumlaak aawik'in, ut kinaataaqe sa' li chaqich'och', sa' li joxk' na'ajej b'arwi' maak'a' nayo'laak.

³ Xsantil tenamit li Qaawa' naq kexwank chiwu, ex aj Israel, chanchanex li xb'een ru li awimq cho'q we. Jo'kan naq chixjunileb' li ke'rahob'tesink eere, laa'in kintaqla li rahilal sa' xb'eeneb'”, chan li Qaawa'.

⁴ “Ex aj Israel, ralal xk'ajolex laj Jakob, ab'ihomaq li naxye li Qaawa'.

⁵ Jo'ka'in xye li Qaawa': K'aru kinmaakon chiruheb' leena' leeyuwa' naq kine'xtz'eqtaana? Koho xch'ooleb' chirixeb' li jalanil yos li maak'a' neke'ok wi'; jo'kan naq eb' a'an maak'a' ajwi' neke'ok wi'.

⁶ Ink'a' kine'xsik' rik'in xyeeb'al: «B'ar wank li Qaawa' li x'isink chaq qe sa' li tenamit Ejiipt, li xb'eresink chaq qe sa' li chaqich'och', sa' li joxk' na'ajej ut julux taq'a ru, b'arwi' maak'a' li ha' ut k'ajo' li aak'ab', maajun wank chisa' chi moko nanume'k aran?».

⁷ Laa'in kexink'am chaq sa' li xq'emal ch'och' a'in re xtzekankil li chaab'il ruhil awimq na'elk chiru. A'ut naq kolex'okaq laa'ex, kemux ru linch'och' ut xa'b'eetal kekanab' li weechanihom.

⁸ Eb' laj tij maajun wa chik ke'xpatz' rib'eb': «B'ar wank li Qaawa'?». Eb' laj tzolol re lintenamit ink'a' ke'xnaw wu; eb' laj jolominel reheb' ke'xq'etq'eti rib' chiwu, ut eb' li propeet sa' xk'ab'a' chik laj Bahal ke'aatinak ut koheb' chirixeb' li jalanil yos li maak'a' neke'ok wi'.

⁹ Jo'kan naq toj yooqin chi jitok cherix laa'ex ut chirixeb' leeri leemam -chan li Qaawa'-.

¹⁰ Ayuqex aran Kitim, sa' li tenamit wank sa' sutha', ut ilomaq chaq; taqlahomaq junaq aj tz'ilol rix aatin aran Kedar, re naq teenaw ma kik'ulmank jun sutaq jo' xeb'aanu laa'ex.

¹¹ Ma wank junaq tenamit xjal li xyos? Us ta eb' a'an moko yoseb' ta! Ut lintenamit xjal ru li xloq'al rik'in li k'aru maak'a' na'ok wi'.

¹² At choxa, chisachq aach'ool chi rilb'al a'in, chasiksiki aawib' xb'aan laaxiw -chan li Qaawa'-.

¹³ Wiib' li maak xe'xb'aanu lintenamit: xine'xtz'eqtaana laa'in, li yu'amha', ut xe'xyiib' li xkumb'eb', ab'anan x'it'e'k chiruheb' ut ink'a' nat'ilk li ha' chisa'.

¹⁴ “Ma aj muneb' tab'i' eb' laj Israel? Ma xe'yo'laak tab'i' re wank cho'q aj tawasinb'il k'anjel? K'a'ut naq yo xrahob'tesinkileb' anaqwan?

¹⁵ K'a'ut naq xe'chalk eb' laj rahob'tesinel sa' xb'eeneb' chi japjookeb' re kama'eb' li kaqkoj? Xe'xk'ati chixjunil li na'ajej ut xe'xkanab' chi po'lemil, chi maajun chik wank aran.

¹⁶ A'atqeb' laj Menfis ut eb' laj Tafnes xe'sachok re leewankil.

¹⁷ Ma ink'a' tab'i' xek'ul chi jo'kan xb'aan naq xetz'eqtaana li Qaawa' leeYos, li xk'amok chaq b'e sa' leeb'eenik?

¹⁸ Ut anaqwan, k'aru teetaw chirix naq texxik Ejiipt re ruk'b'al li xha'il li nima' Nilo? K'aru aj e naq texxik Asiria chi uk'uk ha' sa' li nima' Éwfrates?

¹⁹ A' ajwi' laamaa'usilal taarahob'tesinq aawe, ut li xb'alaq'il aach'ool taajitoq aawe. K'oxla ut k'e reetal naq ink'a' us lintz'eqtaanankil xab'aanu ut q'axal ra wankat xb'aan naq ink'a' xak'e inloq'al: laa'in li Qaawa' laaYos. Raatin li Nimajwal Yos.

²⁰ “Laa'at ak junxil chik kawisi aawib' rub'el inwankil, ut kaq'etq'eti aawib' chiwu ut kaye: «Ink'a' chik nawaj k'anjelak chawu», chankat. Ut sa' xb'eenatq eb' li b'ool ut rub'elatq li ninqi che' katyoklaak ut kamux aawib' jo' junaq aj yumb'eet.

²¹ Laa'in katwaw jo' jun toon chi chaab'il che', li sik'b'il ru riyajil. Ab'anan chan put ru naq xajaltesi aawib' cho'q ruq' xtoonal li che' ink'a' na'uuchink?

²² Us ta taach'ajob'resi aawib' chi chaab'il, us ta taaxab'oni aawib' chi us, ab'an toj wanq reetalil laamaa'usilal chiwu -chan li Nimajwal Yos-.

²³ Chan put ru naq nakaye: «Maak'a' ninmux wi' wib', ink'a' ninloq'oni ru laj Bahal»? Il eb' laanums chiru li taq'a ut k'e reetal laab'aanuhom, at ch'ina kameey li nakatsachb'esink b'e;

²⁴ chanchanat li k'iche'il b'uur li naxchap raanil sa' li chaqich'och' ut maajun chik nachapok re naq yo ru. Yalaq ani nasik'ok re, sa' junpaat naxtaw; ut laj k'ol ink'a' naxb'ay rib' chi xtawb'al sa' xq'ehil ru.

²⁵ Chak'e reetal, at Israel! Ok aawe chi xch'e'b'al laawoq ut taachaqiq xsa' laawe xb'aan li chaqi'eel. Ab'an laa'at nakaye: «Maak'a' chik xja'lenkil: laa'in nawulak chiwu xik chirixeb' laj ab'l tenamit ut eb' li jalanil yos twaj tinloq'oni», chankat.

²⁶ “Jo' naq laj elq' naxutaanak naq natawe'k chi elq'ak, jo'kaneb' ajwi' naq te'xutaanaq eb' laj Israel, eb' li poyanam, eb' li awab'ej, eb' li xjolomileb' li tenamit, eb' laj tij jo'wi' eb' li propeet:

²⁷ «At inyuwa'», chankeb' re li jun tolol chi che'; «At inna'», chankeb' re li pek. Ut laa'in ink'a' nikine'xpatz' chi moko nikine'xk'oxla. Ab'an naq nachalk junaq rahilal sa' xb'eeneb', neke'xye we: «Kim chi qakolb'al».

²⁸ B'ar wankeb' laayos li xayiib' rik'ineb' laawuq', a Judá? K'ajo'eb' laayos, chanchan xk'ihaleb' laatenamit! Chalqeb' b'i' a'an re rilb'al ma te'ruuq chakolb'al naq wanqat sa' rahilal.

²⁹ K'a'ut naq nekewech' wix, wi xineetz'eqtaana chejunilex? -chan li Qaawa'-.

³⁰ Maak'a' rajb'al naq xeb'inq'us chi kaw leeralal eek'ajol, xb'aan naq ink'a' xe'xtaw ru. Laa'ex xekamsi chi ch'iich' eb' li propeet jo' naq li kaqkoj naxt'upi li xtzak.

³¹ Ex aj Israel, ab'ihomaq chi us li raatin li Qaawa'. Ma laa'in tab'i' jun chaqich'och' cho'q eere malaj laa'in ta junaq na'ajej aak'ab' ru? Ex intenamit, k'a'ut naq nekeye: «Tqab'aanu li k'aru naqaj; maajoq'e chik toochalq aawik'in», chankex?

³² Ma nasachk tab'i' sa' xch'ool junaq tuq'ixq li xchaab'il b'aatal, malaj li sum'anmej ink'a' chik najultiko'k re li xsahob' ru? Ab'an lintenamit ak najter ninsachk sa' li xch'ool.

³³ “Q'axal tzolb'ilat chi xsik'b'aleb' li neke'rahink aawu; a'atqeb' laj yumb'eet neke'xtzol re aawik'in!

³⁴ Oso'jenaq laab'aatal sa' xkik'eleb' li neb'a' jo' ajwi' sa' xkik'eleb' li maak'a'eb' xmaak, a'eb' li maajun wa xataweb' chi elq'ak.

³⁵ Ut chi maak'a' aaxutaan nakaye: «Maak'a' inmaak; moko yo ta chik xjosq'il li Qaawa' wik'in». Us b'i', wankin arin re raqok aatin sa' aab'een li nakaye naq maak'a' aamaak.

³⁶ K'a'ut naq sa' junpaat nakajal laana'leb'? Eb' laj Ejiipt ajwi' tate'xkanab' sa' xutaan jo' naq xate'xkanab' sa' xutaan eb' laj Asiria.

³⁷ K'ajo'aq ajwi' aaxutaan naq tat-elq chaq Ejiipt, xb'aan naq ink'a' nawulak chiwu li kaw wi' aach'ool, ut ink'a' us tat-elq rik'ineb' a'an”.