Isaías 9 - Q'eqchi Bible

Li kolb'a ib'

¹ Jo' chaq sa' xtiklajik naq li Yos kixrahob'tesi eb' li tenamit re Sabulón ut Neftalí, jo'kanaq ajwi' chiruheb' li kutan chaalel tixk'e xloq'al li b'e naxik chire li palaw, toj junpak'al li nima' Jordán, sa' xteepaleb' li jalanil tenamit.

² Li tenamit li yookeb' chaq chi b'eek sa' li aak'ab' ke'ril jun xnimal saqenk; eb' li wankeb' chaq sa' xmuheel li kamk sa' kutan chik wankeb' anaqwan.

³ Xak'ihob'resi laatenamit, at Qaawa', xak'e xnimal xsahilaleb' xch'ool naq xatk'ulunk sa' xyanqeb', kama' wi' li sahil ch'oolejil sa' xq'ehil li q'olok, sa' li kutan naq neke'xjek'i chirixeb' li b'ihomal.

⁴ Xb'aan naq xawisiheb' chi munil, xakoleb' chiru li tz'uum li narahob'tesink, ut xasach xwankileb' li neke'numtaak sa' xb'eeneb', jo' kab'aanu chaq reheb' laj Madián junxil.

⁵ Chixjunil li xxaab'eb' laj puub' li kaw na'eek'ank chiru ch'och' ut eb' li aq'ej oso'jenaqeb' sa' kik' te'k'atmanq ut te'oso'q sa' xam.

⁶ Xb'aan naq jun k'uula'al xyo'laak cho'q qe ut xqamaatani jun ch'ina'al. Li wankilal wanq sa' ruq', ut tixk'ab'a'in: “Xnimal ru aj k'ehol na'leb'”, “Li Yos q'axal kaw rib'”, “Yuwa'b'ej chi junelik”, “Xnimal ru aj k'ehol tuqtuukil usilal”.

⁷ K'ajo'aq li xwankilal, ut li tuqtuukilal maak'a'aq roso'jik sa' li xk'ojarib'aal laj David ut li x'awab'ejihom: a'an taak'ojob'anq re li xwankil sa' xb'een li tiikilal ut li k'ulub'ej chalen anaqwan ut toj chiruheb' li kutan chaalel. Ut a'in taa'uxmanq sa' xk'ab'a' li xnimal xrahom li Nimajwal Yos!

Li raqok aatin sa' xb'eeneb' laj Israel

⁸ Li Qaawa' xraqok aatin sa' xb'een li tenamit Israel, sa' xb'eeneb' li ralal xk'ajol laj Jakob.

⁹ Chixjunileb' li poyanam xe'nawok re, li wankeb' sa' xteepal Efraín ut Samaria, a'eb' li neke'xq'etq'eti ut neke'xnima rib' chi xyeeb'al:

¹⁰ “Yaal naq xe't'ane'k li xan, ab'anan rik'in pek chik tookab'laq. Xe'xyok'i eb' li tz'amb'a yiib'anb'il rik'in sikomoor, ab'anan yaw chik tqak'e cho'q reeqaj”.

¹¹ Li Qaawa' xtaqla chaq laj Rasín sa' xb'eeneb' laj Israel ut xchiq' chaq xjosq'ileb' li xik' neke'ilok reheb':

¹² eb' laj Siria xe'chalje'k chaq sa' xjayal releb'l saq'e, ut sa' xjayal rokeb'l saq'e xe'chalk eb' laj Filistea. Sa' junpaat xe'xsach ruheb' laj Israel. Ab'anan ink'a' xch'anaak xjosq'il li Qaawa' ut toj yo chi xrahob'tesinkileb' li tenamit.

¹³ Eb' li tenamit ink'a' xe'sutq'iik rik'in li Yos li yo chi rahob'tesink reheb', chi moko xe'xsik' li Nimajwal Yos.

¹⁴ Jo'kan naq li Qaawa' tixsacheb' ru laj k'amol b'e jo'wi' eb' li poyanam, jo' na'uxk re junaq xul naq nayok'mank li xjolom ut li xye, jo' na'uxk re li kala' naq nakure'k ut na'isiik li xxaq. Ut chixjunil a'in taak'ulmanq yal chiru jun kutan.

¹⁵ Li cheekel winq ut li nim xwankil, a'an li jolomej, ut li propeet aj b'alaq', a'an li xye.

¹⁶ Eb' laj jolominel xe'xb'alaq'i li tenamit a'in, ut eb' li neke'taaqenk reheb' xe'sachk xb'aaneb'.

¹⁷ Jo'kan naq li Qaawa' ink'a' tixtoq'ob'a ruheb' li saaj al, ink'a' taaruxtaana ruheb' li neb'a'yox ut eb' li xmalka'an, xb'aan naq chixjunileb' ink'a' useb' xna'leb' ut reemaaruheb', ut junes tz'i' aj aatin neke'xye. Ab'an ink'a' ajwi' xch'anaak xjosq'il li Qaawa' ut toj yo chi xrahob'tesinkileb' li tenamit.

¹⁸ Xb'aan naq xnumtaak li maa'usilal, jo' li xam naxk'at li k'ix ut li chaqipim; nachoqleek li k'iche' xb'aan ut nab'utz'utz'nak li xsib'el chi elk.

¹⁹ Xb'aan xnimal xjosq'il li Nimajwal Yos x'ok xxamlel li ruuchich'och' ut eb' li poyanam yookeb' chi k'atk jo'eb' li k'im; maajun chik naril xtoq'ob'aal ru li ras riitz'in.

²⁰ Li junjunq nawa'ak sa' junpak'al ut toj yo ajwi' xtz'okajik, nawa'ak sa' junpak'al chik, ab'an ink'a' nak'ojlaak xch'ool; li junjunq naxtiw li xtib'el li xkomon.

²¹ Eb' laj Manasés ut eb' laj Efraín neke'xkamsi rib' chirib'ileb' rib', ut chi xkab'ichaleb' junxikikeb' chi xsachb'al laj Judá. Ab'anan ink'a' ajwi' xch'anaak xjosq'il li Qaawa' ut toj yo chi xrahob'tesinkileb' li tenamit.