Isaías 7 - Q'eqchi BibleXb'een esil cho'q re laj Ajás 1 A'in kik'ulmank naq laj Ajás, ralal laj Jotán ut ri laj Osías, wan chaq chi awab'ejil aran Judá. Laj Rasín, awab'ej re Siria, rochb'een laj Pékaj, ralal laj Romelías, awab'ej re Israel, ke'taqe'k Jerusalén re raj reechaninkil li tenamit, ab'anan ink'a' ke'ruhank. 2 Naq li xjunkab'al laj David ke'rab'i resil naq eb' laj Siria xjunajihomeb' rib' rik'ineb' laj Efraín, k'ajo' naq ke'chalk xxiw li awab'ej ut eb' li tenamit, ut ke'ok chi siksotk jo'eb' li che' naq neke'eek'asiik xb'aan li kawil iq' sa' li k'iche'. 3 Toja' naq li Qaawa' kixye re laj Isaías: “Ayu chi xk'ulb'al laj Ajás, aawochb'een laj Sehar-Yasub laawalal. Ayu toj sa' xmaril li roqha' wan wi' li tamb'aha' li wank chi tzuul, sa' xB'e laj Puch'unel, 4 ut toxaaye re: «K'e reetal ut kawaq aach'ool. Matxiwak ut mich'inank laawaanm xb'aaneb' li wiib' kok' ru'uj si' a'an, a' laj Rasín rochb'eeneb' laj Siria ut li ralal laj Romelías. 5 Eb' laj Siria, rochb'eeneb' laj Efraín ut li ralal laj Romelías, xe'xk'uub' chaq aasachb'al naq xe'xye: 6 Yo'qeb' chi yalok rik'ineb' laj Judá ut qaxib'esiiqeb'; qeechaniiq li xch'och'eb' ut qaxaqab'aq li ralal laj Tabel cho'q x'awab'ejeb', chankeb'. 7 Ab'an li Nimajwal Yos xye chi jo'ka'in: Ink'a' taak'ulmanq a'an! 8-9 Damaask a'an li xnimal ru tenamit aran Siria ut laj Rasín a'an li awab'ej re Damaask. Samaria a'an li xnimal ru tenamit sa' xteepal Efraín, ut li ralal laj Romelías a'an li awab'ej re Samaria. Ab'anan sa' oob' xkaak'aal chihab' eb' laj Efraín moko tenamitaq ta chik. Ut wi laa'ex ink'a' k'ojk'o leech'ool wik'in, jo'kan ajwi' teek'ul: ink'a' texkanaaq chi xaqxo»”. Xkab' esil cho'q re laj Ajás 10 Li Qaawa' kiraatina wi' chik laj Ajás ut kixye re: 11 “Patz' re li Qaawa' laaYos junaq eetalil cho'q aawe, a' yaal ma toj sa' xchamal li xna'ajeb' li kamenaq malaj toj taqe'q sa' xb'een li choxa”. 12 Kichaq'ok laj Ajás ut kixye: “Ink'a' tinpatz', ink'a' nawaj xyalb'al rix li Qaawa' rik'in xpatz'b'al junaq sachb'ach'oolej”. 13 Toja' naq laj Isaías kixye: “Ab'ihomaq, ex ralal xk'ajol laj David: ma ink'a' tz'aqal cho'q eere xch'i'ch'i'inkileb' li poyanam, naq teeraj ajwi' xch'i'ch'i'inkil li Qaawa' linYos? 14 Jo'kan utan, a' ajwi' li Qaawa' tixk'ut cheru jun nimla eetalil. K'ehomaq reetal: li saaj ixq wank sa' yu'am; taawanq jun xk'uula'al teelom, ut Emmanuel tixk'e cho'q xk'ab'a'. 15 Xsasal xya'al xtu' li wakax ut xya'al kab' tixtzeka li ch'ina'al toj tixnaw xsik'b'al li k'aru us ut li ink'a' us. 16 Ab'anan naq toj maji' tixnaw xtz'eqtaanankil li ink'a' us ut xsik'b'al li k'aru us, li xch'och'eb' li wiib' chi awab'ej li nakaxiwa ruheb' taakanaaq chi maajun chik xpoyanamil. 17 “Sa'eb' li kutan a'an li Qaawa' tixtaqla chaq sa' aab'een, sa' xb'een laatenamit ut sa' xb'een laajunkab'lal naab'al li rahilal jo' maajun wa xk'ulmank chaq chalen naq eb' laj Efraín ke'xjek' rib' rik'ineb' laj Judá”. 18 Sa'eb' li kutan a'an li Qaawa' tixb'oqeb' chaq laj Ejiipt li jo'keb' xk'ihaleb' li suq, ut eb' laj Asiria li te'chalq chaq jo'keb' li kas. 19 Chixjunileb' a'an te'chalq, tole'okaq sa' xchamal eb' li roq taq'a ut sa'atqeb' li ochoch pek, te'xch'iki rib' sa'eb' li na'ajej k'ix ru ut b'arwi' neke'uk'ak li wakax. 20 Naq taawulaq li kutan a'an, toj junpak'al li nima' Éwfrates, li Qaawa' tixtaqla chaq sa' eeb'een li awab'ej re Asiria li taak'ehoq eere sa' xutaan: tixjo leejolom, leetzelek ut leemach jo' naxb'aanu junaq aj b'esonel. 21 Chiruheb' li kutan a'an li junjunq tixk'iiresi jun x'ixqiwakax ut wiib'aq xkarneer, 22 ut k'ajo'aq xk'ihal li xya'al xtu' li wakax tixxok. Jo'kan naq tixch'oolani rib' rik'in li xsasal xya'al xtu' li wakax. Jo'k'ihaleb' li te'kole'q sa' li tenamit te'xch'oolani rib' rik'in xsasal xya'al xtu' wakax ut xya'al kab'. 23 Chiruheb' li kutan a'an sa' li na'ajej b'arwi' kiwank junq mil toon chi uub' ut jun mil chi tumin li xtz'aq, junes k'ix ut pajl aj chik wanq chiru. 24 Ka'ajwi' eb' li neke'yohok, te'ok aran rik'in simaj, xb'aan naq junes k'ix ut pim taawanq sa' chixjunil li na'ajej. 25 Sa'eb' li tzuul b'arwi' nak'aleek li ch'och' rik'in jokleb' maajun chik taaruuq chi ok aran xb'aan xk'ihaleb' li k'ix ut li pim; a'anaq chik xna'ajeb' li wakax ut eb' li karneer. |
Q'eqchi DC Bible © Bible Society in Guatemala, 2005.
Bible Society in Guatemala