Isaías 66 - Q'eqchi Bible

Li tz'aqal xloq'oninkil ru li Qaawa'

¹ Jo'ka'in kixye li Qaawa': “Li choxa a'an link'ojarib'aal, ut li ruuchich'och' a'an li xxaqleb'aal li woq. K'aru chi ochochil teeyiib' laa'ex cho'q we, malaj k'a' chi na'ajejil teek'e cho'q inhilob'aal?

² Laa'in kinyiib'ank re chixjunil a'in, ut jo'kan naq wankeb' -chan li Qaawa'-. “Li ani nink'e sa' xnaq' wu, a'an li neb'a' ut li q'un xch'ool, a' li na'oxloq'ink re li waatin.

³ Ab'anan wankeb' li neke'mayejak teelom wakax, ut neke'xkamsi ajwi' junaq winq; neke'xxeq' junaq karneer, ut neke'xch'ot ajwi' xkux junaq tz'i'; neke'mayejak triiw, ut neke'xyeechi'i ajwi' xkik'el li aaq; neke'k'atok k'ajpom chiwu, ut neke'xloq'oni ajwi' li jalanil yos. Eb' li xe'sik'ok re li jo'maajo'il na'leb' a'in q'axal sa sa' xch'ooleb' chi xb'aanunkil chixjunil a'an.

⁴ Laa'in ajwi' taasaho'q linch'ool chi xrahob'tesinkileb' ut tintaqla chaq sa' xb'eeneb' li rahilal q'axal neke'xxiwa ru. Xb'aan naq xinb'oqok ut ink'a' xine'xsume, xin'aatinak ut maajun x'ab'ink we; xe'xb'aanu b'an li ink'a' nawulak chiwu, a' chik li nayoob'ank injosq'il xe'xb'aanu”.

Raqb'a aatin ut kolb'a ib'

⁵ Ab'ihomaq li naxye li Qaawa', laa'ex li nekexsiksotk ut nekexpaab'ank chiru: “Wankeb' eerech tenamitul xik' nekexrileb' ut nekextz'eqtaanaheb' xb'aan link'ab'a', ut neke'xye: «Xk'utaq xloq'al li Qaawa'; naqaj naq sahaq sa' leech'ool», chankeb'. A'ut eb' a'an xutaanal te'kanaaq.

⁶ Yo li choqink sa' li tenamit, na'ab'imank xyaab' kuxej sa' rochoch li Yos: a'an li xyaab' xkux li Qaawa' li yo chi xq'ajkamunkileb' li xik' neke'ilok re.

⁷ “Jerusalén x'alank naq toj maak'a' xrahilal; xwank jun xk'uula'al teelom naq toj maji' xq'ehil.

⁸ Ani x'ab'ink naq xk'ulmank junaq na'leb' jo' a'an? Ani x'ilok re junsutaq naq xyo'laak junaq tenamit yal chiru jun kutan malaj yal sa' junpaat xwakliik jun tenamit? Ab'anan Sión, naq xtaw xkutankil li alank, sa' junpaat xtenamito'k.

⁹ Ma xruuk tab'i' xinram xyo'lajik lintenamit? Laa'in laj eechal re li yu'am -chan li Qaawa' laaYos-.

¹⁰ “Sahoqex rik'in Jerusalén, chejunilex li nekexrahok re, chiwanq sahil ch'oolej sa' eeyanq. Wotzomaq li xsahilal xch'ool eerochb'een, jo'k'ihalex li xexyaab'ak chirix.

¹¹ Xb'aan naq taak'ojob'aaq leeraanm xb'aan li xnimal xq'unal: jo'eb' li k'uula'al yookeb' chi tu'uk, jo'kan ajwi' naq teetu'un li xtu' Jerusalén rik'in sahil ch'oolej.

¹² Xb'aan naq laa'in li Qaawa' ninye chi jo'ka'in: Tink'e chi pukank aran li tuqtuukil usilal jo' jun nima'; jo' naq nab'ut'irk li nima', jo'kanaq li xchalik li xb'ihomaleb' li xninqal ru tenamit sa' xb'een Jerusalén. Toja' naq texch'oolaniiq, texk'ame'q chi q'unq'u ut text'otzt'otziiq sa' xb'eeneb' li raq.

¹³ Jo' junaq na'b'ej naxq'unb'esi li xk'uula'al, jo'kan ajwi' naq texinq'unb'esi laa'in, ut aran Jerusalén taak'ojob'aaq leech'ool”.

¹⁴ Naq teeril a'in, q'axal taasaho'q leeraanm ut taak'ulunq wi' chik leech'ool jo' li raxpim. Li Qaawa' tixk'ut li xwankilal sa' xyanqeb' laj k'anjel chiru, ut li xjosq'il taak'utunq sa' xyanqeb' li xik' neke'ilok re.

¹⁵ Xb'aan naq li Qaawa' taak'ulunq chaq sa' li xam; jo' li kaqsut-iq' naq te'chalq eb' li xb'eleb'aal ch'iich'. Ut sa' junpaat trisi li xnimal xjosq'il ut taarahob'tesinq jo' naq nasachok li xam.

¹⁶ Relik chi yaal naq li Qaawa' taaraqoq aatin rik'in xam; taaraqoq aatin rik'in q'esnal ch'iich' sa' xb'eeneb' chixjunil li poyanam, ut naab'aleb' li te'sache'q ru xb'aan li Qaawa'.

¹⁷ Eb' li neke'xchajob'resi rib' ut neke'xq'axtesi rib' chi xloq'oninkil li jalanil yos sa'eb' li awimq, eb' li neke'xik chirix jun li winq li wank sa' yiib'ej ut neke'tzekank xtib'el li aaq, k'anti' malaj li ch'o, jun sachikaqeb' naq te'oso'q rochb'eenaq li xk'a'uxeb' ut li xb'aanuhomeb', chan li Qaawa' Yos.

Chixjunileb' li tenamit te'xch'utub' rib'

¹⁸ “Laa'in tinchalq chi xch'utub'ankil chixjunileb' li tenamit -chan li Qaawa'- jo'wi' eb' li jalan jalanq chi aatinob'aal: junchalikaqeb' naq tole'ril linloq'al.

¹⁹ Tinb'aanu jun nimla eetalil sa' xyanqeb', ut wanqeb' li te'kole'q ut tintaqlaheb' sa'atqeb' li najtil tenamit: aran Tarsis, Etiopía, Libia, Mesek, Tubal ut Grecia, jo' ajwi' sa'atqeb' li tenamit wankeb' chaq chire palaw, li toj maji' rab'ihomeb' aatinak chiwix chi moko rilomeb' linloq'al. Eb' a'an te'puktesinq resil linloq'al sa'atqeb' li najtil tenamit.

²⁰ Ut te'xk'ameb' chaq leeras eeriitz'in li wankatqeb' sa' chixjunil li na'ajej, jo' mayej cho'q re li Qaawa': te'chalje'q chirixeb' kawaay, sa' b'eleb'aal ch'iich', chi paqonb'il, chirixatq muul ut kameey, toj Jerusalén sa' linsantil tzuul -chan li Qaawa'-, jo' neke'xb'aanu eb' li ralal xk'ajol laj Israel naq neke'xk'am chaq li xmayejeb' sa'eb' li sek' saq ru toj sa' li wochoch.

²¹ Ut sa' xyanqeb' a'an wan tinxaqab'eb' cho'q aj tij ut aj Leví cho'q we, -chan li Qaawa'-.

²² “Jo' naq li ak' choxa ut li ak' ruuchich'och' li tinyoob'tesi wanqeb' chiwu chi junajwa, jo'kan ajwi' naq te'wanq leeralal eek'ajol ut leek'ab'a', -chan li Qaawa'-.

²³ Rajlal po, sa' xyo'lajik li po, ut rajlal sábado, chixjunileb' li poyanam tole'xwiq'ib' rib' chiwu, -chan li Qaawa'-.

²⁴ Ut sa' li relikeb' te'ril naq kamenaqaqeb' chik li winq li xe'xq'etq'eti rib' chiwu. Li xmotzo'ileb' ink'a' te'kamq, chi moko taachupq li xam li nak'atok reheb'. Ut xa'b'eetalaq cho'q reheb' chixjunil li poyanam naq te'ril a'an”.