Isaías 64 - Q'eqchi Bible

¹ At Qaawa', us raj naq taate li choxa ut tatkub'eeq chaq! Te'ha'o'q raj eb' li tzuul naq tate'ril.

² Wi ta te'xnaw laak'ab'a' eb' li xik' neke'ilok aawe, te'xk'ul raj jo' naq na'ok xxamlel li chaqipim malaj nawoqxink li ha' xb'aan xtiqwal li xam. Eb' li xninqal ru tenamit te'ok raj xxiw chawu,

³ jo' naq xab'aanu eb' li xiwajel b'aanuhom li maajun wa qoyb'enihom, naq xatkub'e chaq ut xe'ha'ho' eb' li tzuul chi rilb'al aawu.

⁴ Maajun wa x'ab'imank chi moko x'ilmank jun sutaq naq junaq chik yos xb'aanu li xab'aanu laa'at cho'q reheb' li neke'paab'ank chiru.

⁵ Nakat-elk chi xk'ulb'al chi sa laach'ool li nab'aanunk li tiikilal chi anchal li raanm jo'wi' najultiko'k re li xtaaqenkil laab'e. Yaal ajwi' naq xatjosq'o'k, ab'an a'an xk'ulmank xb'aan naq xoomaakob'k chawu; chalen chaq junxil jwal aj q'etol aatino.

⁶ Chiqajunilo laa'o chanchan muxb'il qu, ut li tiikilal naqab'aanu kama' wi' jun li t'ikr tz'ajn ru. Xoot'ane'k chiqajunilo jo' li xxaq li che' naq natz'umaak, ut xook'ame'k xb'aaneb' li qamaak jo' naq na'apunk li kawil iq'.

⁷ Maajun junaq napatz'ok laak'ab'a', chi moko naxyal xq'e chi xsik'b'al laatenq'aal, xb'aan naq xamuq aawib' chiqu ut xoohaakanab' rub'el xwankilal li qamaa'usilal.

⁸ At Qaawa', laa'at li qana' qayuwa', laa'o chanchano li seb' ut laa'at laj pak'ol qe; chiqajunilo laa'o xyiib'ahomo laawuq'.

⁹ Mi q'axal at josq'o'k, at Qaawa', chi moko junelik taak'e sa' laach'ool li qamaak. Chak'e reetal naq laa'o laatenamit chiqajunilo.

¹⁰ Eb' laasantil tenamit neke'kirirnak xe'kanaak, maajun chik wank sa' li tenamit Sión ut Jerusalén xkanaak chi po'lemil.

¹¹ Li qaloq'laj tijob'aal li q'axal ch'ina'us rilb'al, b'arwi' kate'xloq'oni eb' li qana' qayuwa', x'oso'k sa' li xam. Jo'ch'inal jo'nimal li xsaho'k wi' li qach'ool maak'a' chik rusil anaqwan.

¹² Ut rik'in rilb'al chixjunil a'an, at Qaawa', ma ink'a' traho'q laach'ool? Ma tatkanaaq chi ch'anch'o ut toj yooqat chi qarahob'tesinkil?