Isaías 63 - Q'eqchi Bible

K'a'ut naq kaqkaq ru laawaq'?

¹ “Ani li kaqkaq raq', li yo chaq chi chalk Bosrá, sa' xteepal Edom? Q'axal ch'ina'us li xtiqib'ankil naq yo chaq chi chalk, rik'in xnimal xwankil”. “Laa'inin, li nin'aatinak rik'in tiikil ch'oolej ut q'axal nim inwankil chi kolok”.

² “K'a'ut naq kaqkaq laawaq', jo' li raq' junaq aj yatz'ol ru li uub'?”.

³ “Yaal, injunes xinyatz' ru li uub' chi maajun reheb' lintenamit xtenq'ank we. Xinyeq'iheb' sa' woq eb' li xik' neke'ilok we ut xinteniheb' chi k'ajo' injosq'il. Li xkik'eleb' xpach'ok chiwix ut xintz'ajni chixjunil li waq'.

⁴ A'in li xkutankil li raqok aatin li wank sa' inch'ool; xwulak xq'ehil li eeqajunk ut xkolb'al lintenamit.

⁵ Xin'ilok chinsutam ut maajun aj tenq' xintaw; k'ajo' xsachik linch'ool xb'aan naq maajun wank chintenq'ankil. A' linkawilal xkolok we, ut xb'aan xxamlel linjosq'il xintaw xkawub' li waanm.

⁶ Xinyeq'iheb' li tenamit xb'aan linjosq'il, xinsach ruheb' ut li xkik'eleb' xb'eek chiru ch'och' naq xe'oso'k”.

Li Qaawa' naruxtaana ru li xtenamit

⁷ Nawaj xjultikankil li ruxtaan li Qaawa' ut xb'ichankil li xnimal xloq'al, sa' xk'ab'a' jo'nimal li kixb'aanu qe, xb'aan li xrahom sa' xb'eeneb' li ralal xk'ajol laj Israel, li kixk'utb'esi rik'in ruxtaanankil qu ut qusilankil xb'aan li xnimal xchaab'ilal li xch'ool.

⁸ Li Qaawa' kixye: “Relik chi yaal naq a'aneb' lintenamit, a'aneb' li walal li maajoq'e tine'xb'alaq'i”. Ut A'an kikolok reheb'

⁹ chiru chixjunil li rahilal. Maawa' junaq xtaql chi moko junaq ánjel li kikolok reheb', a' aj b'an wi' li Qaawa' kikolok. Xb'aan li xrahom ut li ruxtaan kixkoleb', kixwaklesiheb' ut kixk'ameb' chaq chi q'unq'u chalen chaq junxil.

¹⁰ A'ut eb' a'an ke'xq'etq'eti rib' chiru ut ke'xmajewa li xsantil musiq'; jo'kan naq li Qaawa' xik' chik kirileb' ut ki'ok chi yalok rik'ineb'.

¹¹ Toja' naq kijultiko'k reheb' li kutan junxil chaq naq laj Moisés kixkol li xtenamit ut ke'xpatz'i rib' chirib'ileb' rib': “B'ar wank li Yos li ki'isink chaq re laj Moisés sa' li nima' ut kixkol laj k'aak'alehom re li xketomq? B'ar wank li Qaawa' li kixk'e li xsantil musiq' re laj Moisés

¹² ut kirochb'eeni rik'in li xnimal xwankil? Kixjach ru li palaw sa' wiib' chiruheb' re naq nawnooq li xk'ab'a' chi junelik;

¹³ kixnumsi li xtenamit sa' xchamal li palaw, jo' tawi' junaq kawaay chi aanilak sa' li chaqich'och', ut ink'a' ke'tichk'ok li roqeb',

¹⁴ chanchaneb' li ketomq li neke'b'eek chiru taq'a”. Li xmusiq' li Qaawa' kik'amok reheb' chi hilank. Jo'ka'in naq kab'eresiheb' laatenamit, at Qaawa', re naq nawnooq laak'ab'a' chi junelik.

¹⁵ At Qaawa', ilon chaq toj sa' choxa ut k'e reetal toj sa' chaq laasantil na'aj nakathilank wi'. B'ar xkoho li xnimal laarahom ut laakawilal? K'a'ut naq ink'a' namayok b'ayaq laawaanm? Ma x'oso'k tab'i' laawuxtaan cho'q qe?

¹⁶ Laa'at li qana' qayuwa'! Us ta laj Abrahán ink'a' nokooxk'e sa' xch'ool chi moko nokoojultiko'k re laj Israel, a'ut laa'at li qana' qayuwa', at Qaawa'; chalen chaq sa' xtiklajik laa'at laj kolol qe.

¹⁷ K'a'ut naq xoohaakanab' chi sachk, at Qaawa'? K'a'ut naq xjipo'k li qach'ool re naq ink'a' chik xqak'e aaloq'al? Kim wi' chik, at Qaawa', sa' xk'ab'a'eb' laj k'anjel chawu, sa' xk'ab'a' laaweechanihom, a' laatenamit.

¹⁸ Yal jun k'amok ajwi' eb' li xik' neke'ilok qe xe'reechani laasantil tenamit ut xe'okje'k sa' laaloq'laj ochoch.

¹⁹ Yooko chi xk'ulb'al chanchan naq maajun sut xqak'ab'a'in laak'ab'a', chanchano jun tenamit li maajun sut xat-awab'ejink sa' xb'eeneb'.