Isaías 62 - Q'eqchi Bible

¹ Xb'aan xraab'al Sión ink'a' tinkanab' aatinak, sa' xk'ab'a' Jerusalén ink'a' tinkanaaq chi ch'anch'o, toj reetal taakutano'q li xloq'al li tiikilal ut taalemtz'uno'q laakolb'a ib' jo' junaq saqenk.

² Toja' naq chixjunileb' li tenamit te'ril li xtiikilal laach'ool ut chixjunileb' li awab'ej te'xka'ya laaloq'al. Ak' k'ab'a'ej tate'xk'ab'a'in wi', a' li taak'ehe'q aawe xb'aan li Qaawa'.

³ Jo'kaqat ch'ina'usil koroon sa' ruq' li Qaawa', jo'kaqat xmatq'ab' li awab'ej chi ru'uj ruq' laaYos.

⁴ Ink'a' chik taayeemanq aawe: “Tz'eqtaananb'ilat”, chi moko taak'ab'a'in chik: “Sachalk na'ajej”, taayehe'q b'an aawe: “Aj k'ojob'anel inch'ool”, ut laach'och' tixk'ab'a'in: “Ixaqilb'ej”. Xb'aan naq li Qaawa' tixk'ul tz'aqal xch'ool aawik'in ut laach'och' taak'ame'q jo' jun ixaqilb'ej.

⁵ Jo' naq li saaj winq nasumlaak rik'in li tuq'ixq, jo'kan ajwi' naq taasumlaaq aawik'in laj Kab'lanel aawe. Jo' xsahil xch'ool li b'eelomej xb'aan li xsumraanm, jo'kanaq ajwi' laaYos aawik'in.

⁶ At Jerusalén, sa' xb'eeneb' laasuttz'akil xink'eheb' aj k'aak'alenel li ink'a' te'kanaaq chi ch'anch'o chi q'eq ut chi kutan. Laa'ex li nekepatz' xk'ab'a' li Qaawa', meekanab' aatinak,

⁷ meek'e chi hilank li Qaawa' toj reetal tixwaklesi wi' chik li xtenamit ut chixjunil li ruuchich'och' tixnima xloq'al Jerusalén.

⁸ Li Qaawa' kixye li xjurament sa' xk'ab'a' li xwankilal: “Maajoq'e chik tink'e laatriiw reheb' li xik' neke'ilok aawe, chi moko eb' li jalanil poyanam te'ruk' chik laab'iin li xatawasi wi' aawib',

⁹ laa'ex b'an texq'oloq, texyaloq xsahil ut teenima inloq'al; teexok ru li uub' ut teeruk' li xya'al chiru li xneb'aalil linsantil ochoch”.

Xchalik laj Kolonel

¹⁰ Ex aj Jerusalén, elenqex, numenqex sa' li okeb'aal! Tehomaq li b'e chiru lintenamit. Tuqub'omaq, tuqub'omaq chi chaab'il li nimb'e ut isihomaqeb' li pek. Taqsihomaq leereetalil re naq taa'ile'q xb'aaneb' li tenamit.

¹¹ K'ehomaq reetal naq li Qaawa' kixpuktesi resil a'in toj sa' xmaril li ruuchich'och': “Yehomaq re li tenamit Sión: Il, we' chaq laj Kolol aawe rochb'een chaq li xkolom, k'amolb'e chaq chiru li xq'ajkamunkileb' li ak xkoleb'”.

¹² “Santil tenamit” taayeemanq reheb' laj Israel; “kolb'ileb' xb'aan li Qaawa'” te'xk'ab'a'in. Ut li tenamit Jerusalén tixk'ab'a'in: “Rahinb'il ru”, “Tenamit ink'a' chik tz'eqtaananb'il”.