Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Isaías 61 - Q'eqchi Bible


Li xk'anjel li propeet

1 Li xMusiq' li Qaawa' wank sa' inb'een xb'aan naq li Yos xinxyul ut xinxtaqla chaq chi xyeeb'al li Chaab'il Esilal reheb' li neb'a', re xk'ojob'ankil xch'ooleb' li ra wankeb', re xpuktesinkil resil li kolb'a ib' reheb' li wankeb' sa' tz'alam ut li rach'ab'ankileb' li wankeb' chi tz'aptz'o;

2 re xyeeb'al resil jun chaab'il chihab' sa' xk'ab'a' li Qaawa', a' li xkutankil li eeqajunk cho'q re li qaYos. Li Qaawa' xinxtaqla chaq re xk'ojob'ankil xch'ooleb' chixjunileb' li yookeb' chi yaab'ak.

3 Ut laa'in tento tink'e xkorooneb' laj Sión li ra wankeb', ruuchil li cha; tinhoy li sununkil b'an sa' xb'eeneb', jo' ruuchil li tz'uyink; tento teb'intiqib' rik'in chaab'il aq'ej, jo' ruuchil li rahil ch'oolej. “Xche'el li tiikilal” chik te'xk'ab'a'in, awb'ileb' xb'aan li Qaawa' re xk'utb'al li xloq'al.

4 Toja' naq te'xyiib' wi' chik li najteril po'lem, te'xkab'la ajwi' eb' li mayeril ochoch; te'xwaklesi wi' chik eb' li juk'b'il tenamit jo'wi' eb' li ochoch li ke'juk'mank junxil.

5 Eb' laj ab'l poyanam tole'xch'oolaniheb' leeketomq, eb' li jalaneb' xtenamit te'k'anjelaq cheru ut te'xxok ruheb' leerawimq.

6 Ut laa'ex teek'ab'a'in: “aj tij chiru li Qaawa'”; “aj k'anjeleb' chiru li qaYos” taayeemanq eere. Teetzeka li xsahil eechej eb' laj ab'l tenamit ut teereechani li xb'ihomaleb'.

7 Numtajenaq leexutaan ut leemajewankil eek'ulum chaq; jo'kan naq naab'alaq ajwi' leemaatan: ka'wa teek'ul xk'ihal leeb'ihomal sa' li na'ajej wanqex wi' ut junelik chik sahaq sa' leech'ool.

8 Xb'aan naq laa'in, li Qaawa', jwal ninra li tiikilal ut xik' nawil li elq'ak ut li kamsink poyanam. Tinq'ajkamuheb' chi tz'aqal re ru ut tink'ojob' rik'ineb' jun sumwank xaqxooq xwankil chi junelik.

9 Q'axal nawnooq ruheb' li ralal xk'ajol xb'aaneb' li tenamit, ut chixjunileb' li te'iloq reheb' te'xk'e reetal naq a'aneb' jun tenamit osob'tesinb'il xb'aan li Qaawa'.


Li ak' Jerusalén

10 K'ajo' naq nasaho'k linch'ool rik'in li Qaawa', jwal nim li xsahil li waanm rik'in linYos, xb'aan naq xinxtiqib' rik'in li xkolom ut xinxlan rik'in li xtiikilal jo' rik'in junaq b'aatal, kama' li b'eelomej naxk'e li xkoroon chi xjolom ut li ixaqilb'ej naxtiqib' rib' rik'in li xchaq'alil ru q'ol.

11 Jo' naq li ch'och' naxk'e chi yo'laak chixjunil li che'k'aam ut namoqk li loq'laj iyaj sa' li xna'aj li awimq, jo'kan ajwi' naq li Qaawa' tixk'e chi moqk li tiikilal, ut chixjunileb' li tenamit te'b'ichanq re.

Q'eqchi DC Bible © Bible Society in Guatemala, 2005.

Bible Society in Guatemala
ကြှနျုပျတို့နောကျလိုကျပါ:



ကြော်ငြာတွေ