Isaías 60 - Q'eqchi Bible

Li xloq'al li ak' Jerusalén

¹ Waklin, at Jerusalén, ut chatlemtz'unq, xb'aan naq xk'ulunk laakutan saqenk ut li xloq'al li Qaawa' xhik'e'k sa' aab'een.

² Il, li q'oqyink wank sa' li ruuchich'och' ut li aak'ab' namuheelank reheb' li tenamit, a'ut sa' aab'een taakutano'q li Qaawa' ut li xnimal xloq'al taak'utunq sa' aab'een.

³ Eb' li tenamit te'chalq sa' laasaqenkil ut eb' li awab'ej te'b'eeq sa' xlemtz'unkil laaloq'al.

⁴ Taqsi laawilob'aal ut ilon chasutam: chixjunileb' a'in xe'xch'utub' chaq rib' ut yookeb' chi chalk aawik'in. Eb' laawalal te'chalje'q chaq toj chi najt ut eb' laarab'in te'k'ame'q chaq chi q'unq'u.

⁵ Naq taawileb' ru, k'ajo' naq taasaho'q laach'ool, kaw tentotq ut k'ojk'ooq laawaanm, xb'aan naq te'xk'am chaq li xb'ihomaleb' li tenamit wankeb' chaq chire li palaw, ut te'xq'axtesi aawe li xsahil eechej eb' li poyanam.

⁶ K'iila kameey te'chalje'q chaq sa'eb' li tenamit Madián ut Efá; chixjunileb' te'chalq chaq sa' xteepal Sabá ut te'xk'am chaq naab'al li oor ut k'ajpom, yooqeb' chi xpuktesinkil resil li xwankilal li Qaawa'.

⁷ Chixjunileb' li ketomq re Kedar te'ch'utub'aaq cho'q aawe; ut eb' li karneer re Nebayot te'k'anjelaq chawu, re naq taayeechi'iheb' sa' xb'een lin'artal cho'q mayej jo' li nawulak chiwu. Chi jo'kan laa'in tinnimob'resi li xch'ina'usal li wochoch.

⁸ Aniheb' a'an li kaw yookeb' chi xik jo'eb' li choql, kama'eb' li mukuy naq neke'xik sa' li xsokeb'?

⁹ A'aneb' li jukub' li xe'chalk wik'in, k'amolb'eheb' chaq li jukub' re Tarsis; toj najt xe'xk'ameb' chaq laawalal aak'ajol rochb'eeneb' chaq xplaat ut li x'oor, sa' xk'ab'a' li Qaawa' laaYos, li xSant laj Israel, li nak'ehok aaloq'al.

¹⁰ Eb' li jalaneb' xtenamit teeyiib'anq re laasuttz'akil, ut eb' li x'awab'ejeb' te'k'anjelaq chawu. Us ta xatinrahob'tesi xb'aan linjosq'il, ab'an anaqwan twuxtaana aawu xb'aan xchaab'ilal linch'ool.

¹¹ Junelik teetooq eb' laawokeb'aal; ink'a' chik te'tz'ape'q chi kutan chi moko chiru q'oqyink, re naq li xb'ihomaleb' li tenamit te'k'ame'q chaq aawik'in xb'aaneb' li awab'ej.

¹² Li tenamit ut li awab'ejihom li ink'a' naraj k'anjelak chawu, te'sache'q ut te'oso'q chi junwaakaj.

¹³ “Chixjunil li xloq'al Líbano taachalq aawik'in -chan li Qaawa'-: eb' li saqichaj, li yaw ut eb' li xchaq'alil ru li che' te'chalq re xch'ina'usinkil ru li wochoch, re xk'eeb'al xloq'al li na'ajej ninwank wi'.

¹⁴ Eb' li ralal xk'ajoleb' li xe'rahob'tesink aawe te'chalq chi k'utzk'uuqeb', ut chixjunileb' li xe'majewank aawe tole'xwiq'ib' rib' chawoq ut te'xye aawe: «Xtenamit li Qaawa'», «Sión, xtenamit li xSant laj Israel».

¹⁵ Xattz'eqtaanaak, xatmajewaak ut junaatalat naq xatwank; ab'an chalen anaqwan tink'e aaloq'al chi junelik ut laa'ataq li xsahil xch'ooleb' chixjunileb' junq'e junq'e kutan.

¹⁶ Eb' li tenamit tate'xch'oolani chi chaab'il ut eb' li awab'ej te'xk'e aawe li xb'ihomaleb'; ut taanaw naq laa'in li Qaawa', laj Kolol aawe, li xNimajwal Yos laj Jakob, li xin'isink chaq aawe sa' laarahilal.

¹⁷ “Tink'e aawe li oor cho'q ruuchil li q'anch'iich', ut cho'q ruuchil li q'unilch'iich' tink'e li plaat. Tink'e aawe li q'anch'iich' cho'q ruuchil li che', ut li q'unilch'iich' cho'q ruuchil li pek. Li Tuqtuukilal taa'awab'ejinq aawe ut li Tiikilal taak'amoq aab'e.

¹⁸ Ink'a' chik taa'ab'iiq resil li rahilal sa' laatenamit chi moko taawanq chik raaxiik' malaj sachok sa' laana'aj, taaye b'an reheb' laasuttz'ak: «Laa'ex linkolb'a ib'», ut laawokeb'aal «Nimaal u» chik tixk'ab'a'in.

¹⁹ “Moko aajel ta chik ru li saq'e cho'q aasaqenk chiru li kutan chi moko li xsaqenkil li po chiru li q'oqyink. Laa'in chik laasaqenk chi junelik; laa'in li Qaawa' laaYos, laa'in chik li xnimal aaloq'al.

²⁰ Li saq'e ink'a' chik taa'ok chi moko li po taasachq, xb'aan naq laa'in tinkutanob'resinq aawe chi junelik; ut li xrahilal laach'ool tox'oso'q chi junajwa.

²¹ “Chixjunileb' li wanqeb' sa' laatenamit tiikaqeb' xch'ool ut te'reechani li na'ajej a'in chi junajwa. Laa'in kinyoob'tesink reheb' re naq te'xk'ut linloq'al: chanchaneb' li xtuxm li awimq li kiwaw laa'in.

²² Eb' a'in jun ch'ina ch'uuteb' chi tenamit, ab'an te'pukanq chi k'iila o'q'ob'; ut sa' jun ch'ina teep taa'elq jun nimla tenamit q'axal kaw rib'. Laa'in li Qaawa' tinb'aanu chixjunil a'in chi junpaat naq taawulaq xq'ehil”, chan li Yos re li tenamit Jerusalén.