Isaías 6 - Q'eqchi Bible

Li xb'oqb'al laj Isaías

¹ Sa' li chihab' naq kikamk laj Osías, li awab'ej, kiwil li Qaawa' k'ojk'o sa' jun k'ojarib'aal jwal ch'ina'us ut najt xteram. Nujenaq li rochoch li Yos rik'in xb'as li xb'aatal.

² Ut sa' xb'een A'an xaqxookeb' wiib' chi ánjel sutsuukeb' xb'aan li xam; li junjunq wank waqitq xxik': junq sumal li xxik' neke'xtz'ap wi' li xnaq' ruheb', junq sumal tz'aptz'ookeb' wi' li roqeb' ut li junq sumal chik a'an neke'rupupik wi'.

³ Ut neke'xjap re chirib'ileb' rib' chi xyeeb'al: “Sant, Sant, Sant li Qaawa', li Nimajwal Yos. Nujenaq chixjunil li ruuchich'och' rik'in li xloq'al!”, chankeb'.

⁴ Naq ki'ab'iik li xyaab' kuxej a'an, eb' li roqechal li okeb'aal ke'eek'anje'k sa' xna'ajeb', ut li kab'l kinujak chi sib'.

⁵ Ut kinye sa' inch'ool: “Toq'ob' xaq wu, xin'oso'k, xb'aan naq laa'in jun li winq ninye li ink'a' us ut wankin sa' jun tenamit aj maak. Xwil rik'in wu li Awab'ej, a' li Nimajwal Yos!”.

⁶ Toja' naq jun reheb' li ánjel kichalk wankin wi', ut kixk'am chaq li ru xam li kixxok chaq sa' li artal rik'in jun li chapleb' ch'iich'.

⁷ Kixtoch' li xtz'uumal we rik'in li lochlookil ru xam ut kixye: “K'e reetal, rik'in li ru xam a'in xinch'e' li xtz'uumal aawe. Kuyb'il sachb'il chik laamaak”, chan.

⁸ Ut kiwab'i li Qaawa' yo chaq chi xyeeb'al: “Ani tintaqla? Ani taaxik sa' qak'ab'a' laa'o?”. Laa'in kinye: “Waaye'in arin, at Qaawa'. Taqlahin laa'in”.

⁹ Toja' naq kixye we: “Ayu ut ye li aatin a'in reheb' li tenamit: «Rik'in leexik tex'ab'inq ut ink'a' teetaw ru; teek'e eech'ool chi ilok ut maak'a' teeril».

¹⁰ Kawub'resi li xch'ooleb' li tenamit a'in, chajipob'resi li xxikeb' ut chamutz' li ruheb'. Mare anchal te'iloq rik'ineb' li ru, te'ab'inq rik'ineb' li xxik, te'xtaw xyaalal sa' xch'ooleb' ut te'xjal xk'a'uxeb', ut laa'in teb'ink'irtasi”, chan.

¹¹ Ut laa'in kinpatz' re: “Jo'q'e taak'ulmanq a'an, at inQaawa'?”, chankin. Ut a'an kixye we: “Toj reetal te'juk'manq eb' li tenamit ut maajun chik poyanam wanqeb' chisa'; toj te'oso'q chixjunileb' li winq sa'eb' li ochoch ut nakirirnak te'kanaaq eb' li k'aleb'aal,

¹² toj te'isiiq chixjunileb' li poyanam xb'aan li Qaawa' ut yamyotq tkanaaq li xna'ajeb'.

¹³ Us ta jun aj chik li poyanam tkanaaq sa' xyanq li lajeetq, taasache'q ajwi' ru a'an jo' na'uxk re li ji malaj li tz'unu'j che' naq nayok'mank: ka'aj chik li xtoonal nakanaak. Ab'anan sa' li xtoonal taa'elq jun li santil tuxm”, chan li Qaawa'.