Isaías 59 - Q'eqchi Bible

Xnimankil ru li yot'b'ach'oolej

¹ Ink'a' teek'oxla naq li Qaawa' maak'a' chik xwankil chekolb'al, chi moko tz'aptz'o ta li xxik cherab'inkil.

² A' leemaa'usilal laa'ex xnajtob'resink eere rik'in leeYos; ut eemaak laa'ex naq A'an naxmuq li rilob'aal ut ink'a' chik naraj eerab'inkil.

³ Xb'aan naq nujenaq chi kik' leeruq' ut k'ajo' li raaxiik' nekeb'aanu; junes tik'ti' nekeye ut yib' aj aatin wank chi xtz'uumal eere.

⁴ Maajun napatz'ok li tiikilal sa' li raqleb'aal aatin, chi moko wank li naraqok aatin rik'in sa' xyaalal; kaw b'an xch'ooleb' li poyanam chirix li moko yaal ta ut junelik yo'oon wankeb' chi xyeeb'al li tik'ti'. Maa'usilal nasiyaak sa' xch'ooleb', ut nayo'laak chaq li raaxiik'.

⁵ Neke'xyoob' li lab'alil jo' namolb'ek li k'anti', ut neke'k'uub'ank maa'usilal jo' xkemom x'am. Ani taatzekanq re li mol a'an, taakamq; ut wi taapuk'manq li mol a'an, taayo'laaq k'anti' li nakamsink.

⁶ Li xkemomeb' moko us ta re li aq'ej; maa'ani naru xb'atb'al rib' rik'in li xk'uub'ahomeb'. Li xb'aanuhomeb' a'an junes raaxiik', ut li ruq'eb' junes rahob'tesink neke'xb'aanu.

⁷ Neke'xseeb'a rib' chi xb'aanunkil li maa'usilal, jo'wi' chi xkamsinkileb' li ras riitz'in li maak'a'eb' xmaak. Ka'ajwi' li kamsink poyanam wank sa' xch'ooleb', sachok ut rahilal neke'xkanab' b'arwi' neke'nume'k.

⁸ Ink'a' neke'xnaw li xb'ehil li tuqtuukilal, chi moko neke'xb'aanu li tiikilal; neke'xjal ru li k'ulub'ej: maajun sa' xyanqeb' li neke'taaqenk re li xb'eheb', toxtaw li tuqtuukil usilal.

⁹ Xmaakeb' a'an naq xnajto'k qik'in li tiikilal ut li kolb'a ib' moko nach' ta chik wank. Xqoyb'eni li saqenk, ut a' chik li aak'ab' wank arin; xqayo'oni b'eek sa' li saqenk, ut q'oqyink chik nokoonume'k wi'.

¹⁰ Yal xqamayu aj chik ru li tz'ak naq xoob'eek, chanchan tawi' naq ink'a' nokoo'ilok. Xootichk'ok chi b'eek sa' wa'leb' jo' tawi' sa' aak'ab' wanko; us ta kaweb' li qoq quq', xoowank kama'eb' li kamenaq.

¹¹ Chiqajunilo xqajap qe jo' li tz'uqtz'un, xooq'urnak jo' li mukuy; xqoyb'eni li qakolb'al, ab'an ink'a' xk'ulunk; xqayo'oni wank chi ach'ab'anb'il, ab'anan xnajto'k qik'in.

¹² Xb'aan naq xnumtaak li qaq'etq'etil chawu, at Qaawa', ut a' li qamaak najitok qe chawu. Wank sa' qach'ool li qaq'etb'a aatin ut naqanaw chixjunil li xoomaakob'k wi'.

¹³ Xqamajewa ut xqatz'eqtaana li Qaawa', ink'a' xqaj xtaaqenkil li qaYos; ka'ajwi' li maa'usilal ut li raaxiik' xqak'oxla xb'aanunkil, ut junes b'alaq'ik x'alaak sa' qach'ool.

¹⁴ Tz'eqtaananb'il chik li tiikilal, ut maak'a' chik li tiikil ch'oolej sa' qayanq; maab'ar chik nayeemank li yaal ut li k'ulub'ej ramro li b'e re ok qik'in.

¹⁵ Maajun chik nab'aanunk li yaal, ut wi junaq xrisi rib' sa' li maa'usilal namaq'e'k li k'aru wank re. K'ajo' naq xchalk xjosq'il li Qaawa' chi rilb'al naq maak'a' chik li k'ulub'ej.

¹⁶ Xk'e reetal naq maajun natenq'ank reheb' li rahob'tesinb'ileb', ut xsachk xch'ool chi rilb'al naq maajun na'okenk chirixeb'. Toja' naq li Yos xq'axok u rik'in li xwankilal ut a' ajwi' li xtiikilal xkuutunk re.

¹⁷ Xk'e li tiikil ch'oolej cho'q koleb' ch'iich', ut li kolb'a ib' cho'q xpunit ch'iich'; xtiqib' rib' rik'in li eeqajunk jo' junaq xjut-aq', ut xk'e li xjosq'il chirix jo' xb'aatal.

¹⁸ Li Qaawa' tixq'ajkamu li junjunq jo' chanru li xk'ulub': tixrahob'tesiheb' laj rahob'tesinel ut taa'eeqajunq sa' xb'eeneb' li xik' neke'ilok re, sa' xb'eeneb' ajwi' li tenamit sutsuukeb' xb'aan li palaw.

¹⁹ Chixjunileb' li poyanam chalen sa' releb'l saq'e toj sa' rokeb'l te'xk'e xloq'al li Qaawa' naq te'ril li xwankil, xb'aan naq taachalq jo' li xkawil oq li nima' naq na'apuuk xb'aan li kawil iq'.

²⁰ Ab'an sa' li tzuul Sión taachalq jun aj Kolonel cho'q reheb' li ralal xk'ajoleb' laj Jakob li te'xyot' xch'ool ut te'xjal xk'a'uxl. Li Qaawa' xyehok re a'in.

²¹ “Ut laa'in tink'ojob' jun sumwank eerik'in -chan li Qaawa'-: linmusiq' li xchalk sa' eeb'een ut eb' li waatin li xink'e chi xtz'uumal eere, maajaruj taasachq sa' leech'ool. Wanqeb' junelik sa' leere, sa' reheb' leeralal eek'ajol, ut sa' reheb' li chaaleleb' moqon, chalen anaqwan toj chi junelik”.