Isaías 58 - Q'eqchi Bible

Li tz'aqal ayuun

¹ “Jap aawe chi aatinak chi maak'a' aaxiw -chan we li Qaawa'-, aatinan chi kaw xyaab' aakux jo' junaq pur; ch'iilaheb' lintenamit xb'aan li xq'etq'etileb', a'eb' li ralal xk'ajol laj Israel xb'aan li xmaakeb'.

² Neke'xye naq rajlal kutan nikine'xsik' ut nawulak chiruheb' xnawb'al li wajom, jo' jun tenamit nab'aanunk re li us ut ink'a' naxtz'eq chirix xch'ool li xtaqlahom li xYos. Neke'xpatz' we li chaq'rab' jwal chaab'il ut nawulak chiruheb' wank chink'atq.

³ Ut neke'xye we: «K'a' aj e naq nokoo'ayuunik? Chi moko yookat rilb'al. Maak'a' na'ok wi' naq naqakub'si qawankil, wi ink'a' nakak'e sa' laach'ool», chankeb'. K'ehomaq reetal: naq nekex'ayuunik, laa'ex nekeb'aanu li k'aru nekeraj ut nekerahob'tesi chixjunileb' laj to' k'anjel.

⁴ Nekex'ayuunik re xb'aanunkil li rahilal ut li raaxiik', jo'wi' re xsak'b'al eerib' cherib'il eerib' chi kaw. Mex'ayuunik chik jo' anaqwan, wi nekeraj twab'i li xyaab' eekux sa' choxa.

⁵ Ma a'in tab'i' li ayuunik nawaj laa'in sa' li kutan naq li winq naxkub'si li xwankil? Nekexulub' leejolom kama' naxulq'iik li b'ayal, ut nekexwark chiru pop ut cha. Ma a'an nekeye «ayuunik» re, ut «kutan li nawulak chiru li Qaawa'»?

⁶ Moko a'an ta li ayuun nawaj. “Li ayuun nawaj laa'in a'an a'in: rach'ab'ankileb' li wankeb' sa' tz'alam chi maak'a'eb' xmaak, xk'ixb'al li xk'aamal li rahob'tesiik, rach'ab'ankileb' li tawasinb'ileb' ut risinkil chixjunil li kawil taqlank.

⁷ Chawotz laawa rik'in li natz'okaak, chak'e rochochnaal li neb'a' li maak'a' rochoch, chak'e xb'aatal li maak'a' raq' ut chatenq'a laawech neb'a'il.

⁸ Toja' naq laasaqenk taak'utunq jo' naq nahik'e'k li kutan, ut sa' junpaat taak'iraaq laatiq'ilal. K'amolb'ehaq chawu laachaab'il b'aanuhom ut linloq'al taataaqenq aawe.

⁹ Chi jo'kan, wi taayaab'a link'ab'a', laa'in tatinsume; wi tinaab'oq, tinye aawe: «We'kin!». Wi ink'a' chik nakatrahob'tesink, wi ink'a' nakathob'ok chi moko nakatq'ab'ank,

¹⁰ wi nakaq'axtesi aawib' re li yo xtz'okajik, wi nakak'ojob' xch'ool li wank sa' rajb'al ru, relik chi yaal naq taakutano'q laaloq'al sa' li aak'ab', ut li x'ak'ab'il ru laayu'am kama'aq chik li kutan.

¹¹ Laa'in tatinb'eres chi junelik, tink'ojob' laach'ool chi tzekank sa' li chaqich'och', tink'e xkawilal laawoq laawuq' ut kama'aqat chik li xchaq'alil ru na'ajej t'aqresinb'il chi us, jo'kaqat chik li yu'amha' ink'a' nachaqik.

¹² Taawaklesi wi' chik li xpo'lemil laatenamit ut taak'ojob' wi' chik li rub'elankil li kiwank najter. «Aj waklesinel po'lem» taak'ab'a'in; «aj yiib'ahom re li po'lemil ochoch», cha'qeb' aawe chixjunileb'.

Li hilob'aal kutan

¹³ “Chawoxloq'i li kutan sábado ut matyakok sa' linsantil kutan. Chaye re li kutan a'an: «sahil kutan», «loq'laj kutan», cha'qat re li xsantil kutankil li Qaawa'; chawoxloq'i ut matxik chik b'araq, matyakok sa' li sábado chi moko taab'aanu li nakawaj aajunes aawib'.

¹⁴ Wi taab'aanu chi jo'kan, taasaho'q laach'ool wik'in ut tatink'am cho'q aj q'axol u sa' xb'eeneb' li najt xteramil tzuul re li ruuchich'och'. Ut tatinch'oolani rik'in li reechanihom laj Jakob, laayuwa'. Laa'in, li Qaawa', xinyehok re a'in”.