Isaías 56 - Q'eqchi Bible

ISAÍAS III Li Yos naxb'oqeb' chixjunileb'

¹ Li Qaawa' kixye chi jo'ka'in: “Junelik wanqex sa' tiikilal ut b'aanuhomaq li us, xb'aan naq nach' chik wank linkolb'a ib' ut ok re chi k'utunk li xtiikilal linch'ool.

² Us xaq re li poyanam li naxb'aanu chi jo'kan ut junelik naxk'e xch'ool chi xk'anjelankil ru a'an: a' li na'oxloq'ink li sábado ut ink'a' naxsach xwankil, li naxra rib' chiru li xb'aanunkil li maa'usilal”.

³ Naq junaq ab'l tenamit tixq'axtesi rib' re li Qaawa', ink'a' naru tixye: “Li Qaawa' ink'a' tinxk'ul sa' xyanqeb' li xtenamit”. Chi moko li winq kapuninb'il tixye: “Laa'in jun chaqiche'”.

⁴ Xb'aan naq jo'ka'in kixye li Qaawa': “Wi eb' li kapun te'oxloq'inq li sábado ut te'xb'aanu li nawulak chiwu, wi junelik te'xpaab' linsumwank,

⁵ laa'in wank k'aru jwal loq' tink'e reheb' jo' ruuchil li ralal xk'ajoleb': sa' li wochoch, chiruheb' lintz'ak, tink'e naq tz'iib'anb'ilaq li xk'ab'a'eb'; patz'b'ilaqeb' chi junelik ut maajoq'e chik te'sache'q xloq'al.

⁶ Ut eb' laj ab'l xtenamit li xe'xq'axtesi rib' re li Qaawa' cho'q aj k'anjel chiru re xraab'al li Yos ut k'anjelak chiru, wi te'roxloq'i li sábado ut ink'a' te'xmux ru, wi kawaqeb' xch'ool rik'in linsumwank,

⁷ laa'in teb'ink'am chaq wik'in sa' linloq'laj tzuul ut tinsahob'resi xch'ooleb' sa' li wochoch na'uxk wi' tijok. Tink'ulub'an li xyeechi'omeb' ut eb' li xk'atb'il mayej sa' xb'een lin'artal, xb'aan naq li wochoch tixk'ab'a'in rochochil li tijok cho'q reheb' chixjunil li tenamit.

⁸ Laa'in tinsutq'isiheb' chaq li toj wankeb' chi preexil sa' ab'l tenamit, tinch'utub'eb' ut te'wanq sa' junajil”. A'an a'in raatin li Qaawa' li nach'utub'ank reheb' laj Israel li xe'cha'cha'iik sa' najtil tenamit.

Xq'usb'aleb' laj k'amol b'e ink'a' useb' xch'ool

⁹ Ex josq' aj xul, kimqex; ex xul li wankex chaq sa'eb' li k'iche', kimqex chi wa'ak.

¹⁰ Xb'aan naq mutz'eb' li neke'k'aak'alenk re lintenamit, ut maak'a' neke'xk'e reetal. Chixjunileb' chanchaneb' li tz'i' ink'a' nawoob'ak; neke'xnumsi li kutan chi hilank ut chi matk'ek, q'axal nawulak chiruheb' li wark.

¹¹ Jo'eb' li tz'i' li junes wa'ak naxik wi' xch'ooleb' ut maajoq'e neke'nujak li xsa'eb', jo'kaneb' ajwi' laj k'amol b'e: ink'a' neke'xtaw xyaalal; li junjunq ak xb'e xb'e naxchap ut ka'ajwi' li k'aru us cho'q reheb' neke'xsik'.

¹² Eb' a'an neke'xye: “Yo'qeb' chi sik'ok b'iin jo'wi' li ha' nakaltesink, re naq tookalaaq. Xb'aan naq li kutan wulaj kama'aq anaqwan; malaj jwal chaab'ilaq chik”, chankeb'.