Isaías 55 - Q'eqchi Bible

Li ruxtaan li Qaawa' rik'in li xtenamit

¹ “Chejunilex li nachaqik eere, kimqex chi uk'ak ha'. Us ta maak'a' eetumin, kimqex ut tzekanqex chi maatan; uk'umaq b'iin ut xya'al xtu' wakax, chi ink'a' teetoj.

² K'a'ut naq nekesach eetumin chirix li moko wa ta, ut nekesach leetojb'al chirix li ink'a' nak'ojob'ank ch'oolej? Paab'omaq li ninye ut textzekanq chaab'il tzekemq; taak'ojlaaq leech'ool rik'ineb' li sahil eechej.

³ Chex'ab'inq ut kimqex wik'in; ab'ihomaqin ut taawanq eeyu'am. Xb'aan naq tink'ojob' eerik'in jun junelik sumwank, ut chi jo'kan tinb'aanu li kinyeechi'i re laj David sa' xk'ab'a' linrahom.

⁴ Laa'in kinxaqab'ank re laj David cho'q wuuchil chiruheb' li tenamit, cho'q aj k'amol b'e ut aj jolominel reheb' li poyanam.

⁵ K'e reetal, taab'oqeb' li tenamit ink'a' aanawom ruheb', ut te'chalq aawik'in eb' li poyanam ink'a' xnawomeb' aawu sa' xk'ab'a' li Qaawa' laaYos, li xSant laj Israel, li xk'ehok aaloq'al.

⁶ “Sik'omaq li Qaawa' naq toj naru xtawb'al; b'oqomaq A'an naq toj wank chi nach'.

⁷ Li ink'a' us xch'ool xkanab'aq xb'aanunkil li maa'usilal, ut li yib'ru xna'leb' mixk'oxla chik li ink'a' us. Sutq'iiq chaq rik'in li Qaawa' ut A'an taaruxtaana ru, sutq'iiq chaq rik'in li qaYos li jwal chaab'il chi kuyuk maak.

⁸ Xb'aan naq link'a'uxl moko jo' ta leek'a'uxl laa'ex, chi moko linb'e jo' ta leeb'e -chan li Qaawa'-.

⁹ Jo' naq q'axal najt wank li choxa sa' xb'een li ruuchich'och', jo'kan ajwi' linna'leb' naxq'ax ru leena'leb' ut q'axal nim link'a'uxl chiru leek'a'uxl laa'ex.

¹⁰ “Jo' naq li hab' ut li xchu'ke nakub'eek chaq sa' choxa ut ink'a' nasutq'iik aran wi toj maji' naxt'aqresi li ch'och' ut ink'a' naxk'e chi yo'laak ut chi moqk li awimq re naq twanq iyaj cho'q re laj awinel jo'wi' li wa re tzekaak,

¹¹ jo'kan ajwi' li aatin ninye laa'in. Ink'a' taasutq'iiq chaq wik'in chi maak'a' tixk'am chaq, tento b'an naq xb'enwa tixb'aanu li wajom ut tixpaab' li k'aru xintaqla wi'”.

Xraqik li Hu

¹² K'ajo'aq xsahil eech'ool naq tex'elq Babilonia; sa' tuqtuukilal texk'ame'q chaq wi' chik sa' leena'aj. Naq eb' li tzuul ut eb' li b'ool texrileb' chi chalk, te'xjap re chi b'ichank, ut chixjunileb' li k'iche' te'xpoq'poq'i li ruq'eb' cherilb'al.

¹³ Sa' xna'aj li k'ix taayo'laaq li saqichaj, ut sa' xna'aj li k'aamla taayo'laaq li waa'uut. Chixjunil a'an taak'ulmanq re xk'eeb'al xloq'al li Qaawa'; a'anaq jun xnimal eetalil li maajoq'e taasachmanq.