Isaías 53 - Q'eqchi Bible

¹ Ani xpaab'ank re li esil xqaye? Ani xk'ute' wi' li xnimal xwankil li Qaawa'?

² Laj K'anjel a'an xk'iik chiru li Qaawa' jo' jun toon chi che' li xmoqk sa' li chaqich'och'. Moko ch'ina'us ta na'ilok chi moko wank xloq'al; maak'a' junaq k'a' tawi' ru tqak'e wi' xwankil.

³ A'an tz'eqtaananb'il ut xik' ilb'il xb'aaneb' li poyanam, a'an jun li winq junes ra naril ut k'aynaq chi k'uluk rahilal; chanchan junaq li maajun naraj ilok re, majewanb'il chi moko xqak'e sa' xnaq' qu.

⁴ A'an xk'uluk re li qayajel ut xkuy riiqaninkil li qarahilal. Xqak'oxla naq xrape', xtiq'e' ut xrahob'tesiik xb'aan li Qaawa'.

⁵ Ab'anan xtiq'e' xb'aan li qamaak ut xrahob'tesiik xb'aan li qamaa'usilal. Rik'in li rahob'tesiik kixk'ul, xk'e qe li tuqtuukilal ut rik'in li xtiq'ilal xook'irtasiik laa'o.

⁶ Chiqajunilo xoosachk jo'eb' li karneer, ak xb'e xb'e xk'am li junjunq. Ut li Qaawa' xk'e chiriiqani li qamaak chiqajunilo.

⁷ Naq xrahob'tesiik, xkub'si xwankil, chi moko xye jun t'orolaq li raatin. Jo' jun ch'ina karneer ok re chi kamsiik, jo' jun karneer maak'a' naxye naq nab'ese'k li rismal, jo'kan ajwi' a'an ink'a' xte li xtz'uumal re chi aatinak.

⁸ Xe'xchap, xe'xraq aatin sa' xb'een ut xe'xkamsi chi maa'ani x'ilok xtoq'ob'aal ru. X'isiik sa' li ruuchich'och' a'in ut xmaakeb' lintenamit naq xkamsiik.

⁹ Xmuqe'k sa' xyanqeb' laj b'aanuhom maa'usilal ut rik'ineb' li b'ihom xtaw li xmuqleb'aal, us ta maajun li maak xb'aanuhom chi moko xyehom junaq tik'ti'.

¹⁰ Li Qaawa' xraj xrahob'tesinkil ut xtawasinkil rik'in rahilal, ut laj k'anjel tiik xch'ool xmayeja rib' re xtojb'al rix li maak. Jo'kan naq taanajto'q roq li xyu'am, toxrileb' li ralal xk'ajol ut sa' xk'ab'a' A'an taatz'aqloq ru li rajom li Yos.

¹¹ Sa' xk'ab'a' li k'iila rahilal kixk'ul taaril li saqenk ut taak'ojlaaq li xch'ool. Rik'in li xnawom, laj K'anjel chiwu naab'aleb' tixtiikob'resiheb' xch'ool, xb'aan naq xriiqani li xmaakeb' a'an.

¹² Jo'kan naq tink'e xna'aj sa' xyanqeb' li xninqal ru winq ut tixwotz li sahilal rochb'eeneb' li wankeb' xwankil, xb'aan naq xq'axtesi rib' chi kamsiik ut xk'eemank sa' ajl sa' xyanqeb' laj maak. Relik chi yaal naq xriiqani li xmaak naab'aleb' chi poyanam ut xtijok, x'elajink chirixeb' laj q'etol aatin.