Isaías 51 - Q'eqchi Bible

Xk'ojob'ankil xch'ool Jerusalén

¹ “Ab'ihomaqin laa'ex li nekek'e eech'ool chi wank sa' tiikilal, laa'ex li nekexsik'ok re li Qaawa'. Sutq'inqex rik'ineb' leexe'toonil yuwa', k'ehomaq reetal li raxpek li kex'isiik wi' chaq naq kexk'ub'aak.

² K'ehomaq reetal laj Abrahán, leeyuwa', ut lix Sara, li ki'alank eere. Naq laa'in kinb'oq chaq laj Abrahán, a'an jun chirib'il rib'; ab'anan kiwosob'tesi ut kink'ihob'resi.

³ Laa'in tink'ojob' xch'ool Sión ut twil xtoq'ob'aal ru li xpo'lemil; tinsutq'isi li chaqich'och' cho'q sahil na'ajej, ut li joxk' ch'och' tkanaaq cho'q xna'aj li Qaawa': k'ajo'aq li b'ichank ut sahil ch'oolej aran, taawanq li wajb'ak ut b'anyoxink sa' ink'ab'a'.

⁴ “Ex intenamit, ab'ihomaqin; ex inpoyanam, k'ehomaq reetal li ok we xyeeb'al, xb'aan naq wik'in taa'elq li chaq'rab' ut lintaqlahom taakutanob'resinq re eb' li tenamit.

⁵ Ak xnach'ok chaq linraqb'a aatin, chi seeb' taachalq linkolb'a ib', ut rik'in linwankil tinjolomiheb' li tenamit. Wik'in neke'oyb'enink li tenamit wankeb' chaq chire li palaw, ut kaweb' xch'ool rik'in linwankilal.

⁶ “Taqsihomaq leerilob'aal sa' choxa ut ilomaq li ruuchich'och' taq'a: li choxa taa'oso'q jo' li sib', ut li ruuchich'och' taaq'eelo'q jo' junaq aq'ej; eb' li xpoyanamil te'kamq jo'kaqeb' li suq. A'ut linkolb'a ib' taawanq chi junelik ut lintiikilal maajoq'e taa'oso'q.

⁷ Ab'ihomaqin, laa'ex li nekenaw k'aru li tiikil ch'oolej, ex tenamit li kaw eech'ool chirix linchaq'rab'. Meexiwa ruheb' li poyanam neke'majewank chi moko chich'inanq eech'ool naq neke'hob'ok.

⁸ Xb'aan naq te'oso'q jo' li aq'ej nachoye'k xb'aan li mok'o'k, kama' li tuuxnoq' li nak'uxe'k xb'aan li k'ams. A'ut lintiikilal maajoq'e taa'oso'q ut linkolb'a ib' taawanq junq'e junq'e kutan”.

⁹ Ajen, ajsi aawu, at Qaawa', ut k'ut laawankilal; waklin jo' kab'aanu chaq junxil, jo' kab'aanu chaq najter q'e kutan. Ma ink'a' tab'i' laa'at katkamsink re Rahab, ut kapaynumi chi ch'iich' li xk'anti'il li palaw?

¹⁰ Ma ink'a' tab'i' laa'at katchaqihob'resink re li palaw ut li nimla ha', ut kate jun li b'e sa' xchamal li palaw re naq ke'nume'k li kakoleb' chaq?

¹¹ Jo'ka'in naq te'sutq'iiq chaq li te'kole'q xb'aan li Qaawa', yooqeb' chi b'ichank naq te'ok Sión. Li rahilal ut li yaab'ak taasachmanq chi junajwa; numtajenaqaq li xsahil xch'ooleb', ut a'an taak'utunq tz'aqal sa' xnaq' ruheb'.

¹² “Laa'in nink'ehok xkawub' laach'ool -chan li Qaawa'-. Anihat laa'at chi xxiwankil ru li winq li yal kaamel, li taa'oso'q jo' li k'im?

¹³ K'a'ut naq nakatz'eq chirix laach'ool li Qaawa', laj yoob'tesihom aawe, li kihelok re li choxa ut kixk'ojob' li ruuchich'och'? K'a'ut naq nakanumsi li kutan chi xxiwankil ru laj rahob'tesinel, li junelik naxyal xq'e chasachb'al? Ab'anan, b'ar wank anaqwan li xjosq'il laj rahob'tesinel?

¹⁴ Chi seeb' taa'ach'ab'aaq li wank sa' tz'alam; moko taakamq ta chi b'ak'b'o chi moko taakanaaq chi maak'a' xtzekemq.

¹⁵ “Laa'in li Qaawa', laaYos, naweek'asi ru li ha' ut nink'e chi pisk'ok li xkaw oq li palaw. Qaawa', li Nimajwal Yos, a'in link'ab'a'.

¹⁶ Laa'in xink'e li waatin chi xtz'uumal aawe ut xatinmuheela rub'el inwankil. Laa'in kinhelok re li choxa ut kink'ojob' li ruuchich'och' sa' xna'aj, ut anaqwan ninye re Sión: «Laa'at lintenamit»”.

¹⁷ Ajen, ajsi aawu, waklin, at Jerusalén! Laa'at li xat-uk'ak sa' xsek'ul li xjosq'il li Qaawa', jo' tawi' li na'uk'ak b'iin sa' junaq sek' toj reetal naxchoy ut nataktotk nakanaak.

¹⁸ Sa' xyanqeb' chixjunileb' laawalal aak'ajol, maajun reheb' nab'eresink aawe; maajun sa' xyanqeb' chixjunil li xak'iiresiheb' nak'amok b'e chawu.

¹⁹ Ani xraho'k xch'ool chawix naq xchalk li wiib' chi rahilal sa' aab'een: xatjuk'e'k ut xatrahob'tesiik, xattz'okaak ut xatkamk xb'aan li yalok? Ma wank tab'i' junaq xk'ojob'ank re laawaanm?

²⁰ Eb' laawalal aak'ajol t'ant'ookeb' xe'kanaak sa'atqeb' li xaalib'e, jo'keb' li yuk naq xe't'ane'k sa' li ra'al; xe'lub'k xb'aan xjosq'il li Qaawa' naq xe'q'use'k xb'aan laaYos.

²¹ Jo'kan utan, ab'i a'in, at xtoq'ob'aal ru tenamit, chanchanat li tatkalaaq, ab'an maawa' xb'aan uk'ak b'iin.

²² Jo'ka'in kixye li Qaawa', laaYos, laj kolol re laatenamit: “Twisi sa' laawuq' li xsek'ul li rahilal, li xsek'ul linjosq'il li xatkalaak wi'; ink'a' chik taawuk' xsa'.

²³ Sa' ruq'eb' chik li xe'rahob'tesink aawe, tink'e, a'eb' li xe'yehok aawe: «B'uchub'aq eerib' chiru ch'och' re naq toonume'q sa' eeb'een». Ut laa'at xab'uchub' aawib' chiru ch'och', xatkanaak jo' jun li b'e cho'q reheb' li xe'nume'k sa' aab'een”.