Isaías 50 - Q'eqchi Bible

Xrahob'tesinkileb' laj Israel

¹ Jo'ka'in kixye li Qaawa': “Ma wank b'araq li xhuhil li jachok ib', reetalil naq xintz'eqtaana leena'? Malaj xexink'ayi ta laa'ex, re xtojb'al link'as? K'ehomaq reetal naq laa'ex xexk'ayiik xb'aan leemaak; xb'aan ajwi' leeq'etb'a aatin xtz'eqtaanaak leena'.

² K'a'ut naq maajun xintaw naq xink'ulunk chekolb'al? K'a'ut naq ink'a' xineesume naq xexinb'oq? Malaj ut xek'oxla naq ink'a' tinruuq eekolb'al ut maak'a' inwankil re eerisinkil sa' li rahilal? Yal rik'in jun chi aatin ninye, nachaqik li palaw, ut eb' li roq nima' joxk' neke'kanaak; eb' li kar neke'kamk xb'aan li chaqi'eel ut neke'q'aak xb'aan xmajelal li ha'.

³ Laa'in nin'ak'ab'ob'resi ru li choxa, chanchan junaq li naxtiqib' rib' rik'in q'eqi t'ikr xb'aan xrahil xch'ool”.

Rox xb'ich laj K'anjel chiru li Qaawa'

⁴ Li Qaawa' xinxtzol chi aatinak jo' xtz'aqal tzolom ut xk'e waatin re xk'ojob'ankil xch'ool li tawajenaq. Rajlal eq'la ninrajsi re naq tink'e inch'ool chi ab'ink, jo' neke'xb'aanu eb' li xtzolom.

⁵ Li Qaawa' xtehok re linxik, ut laa'in ink'a' xinq'etq'eti wib' chiru chi moko xch'inank linch'ool.

⁶ Xinkanab' wib' chi sak'e'k, ut xinyeechi'i li xk'atq we naq xine'xmich' chinmach. Ink'a' xinmuq li xnaq' wu naq xine'xpik'a chi ruq'eb' ut xine'xchuub'a.

⁷ Li Qaawa' a'an laj tenq'ahom we; jo'kan naq ink'a' ra naweek'a naq nikine'xhob'; q'axal kaw xaqxookin jo' li saqoonak: ninnaw naq ink'a' tinkanaaq sa' xutaan.

⁸ Li nakolok we wank chink'atq: ani taayehoq naq wank inmaak? Xikaqo sa' wiib'al rik'in laj raqol aatin. Ani li najitok we? Chalqaq wik'in ut xyehaq we.

⁹ Li Qaawa', a'an li natenq'ank we: ani taak'ehoq we sa' tojb'amaak? Chixjunileb' li xik' neke'ilok we te'oso'q, jo' li aq'ej naq nak'uxe'k xb'aan li mok'o'k.

¹⁰ Ani sa' eeyanq naxiwank re li Qaawa', chirab'iiq xyaab' xkux laj K'anjel chiru. Wi nekexb'eek sa' li aak'ab' b'arwi' maajun li saqenk, kawaq eech'ool rik'in li Qaawa' ut chekuutuuq eerib' rik'in leeYos.

¹¹ Ab'anan laa'ex li nekexlochok xam ut neketz'ab' li ru xam, tex'oso'q chejunilex sa' raq' leexam ut sa' ru xam li xetz'ab'. Laa'in tinb'aanunq re chixjunil a'an: jiljooqex sa' rahilal.