Isaías 49 - Q'eqchi Bible

Xkab' xb'ich laj K'anjel chiru li Qaawa'

¹ Ab'ihomaqin, ex tenamit li wankex chaq chire li palaw, k'ehomaq reetal, laa'ex li wankex chaq chi najt. Li Qaawa' kinxb'oq chaq naq toj wankin rik'in linna' ut kixye link'ab'a' naq toj maji' ninyo'laak.

² Kixk'e chi xtz'uumal we li aatinak chi yaal, jo' tawi' li q'esnal ch'iich', ut kinxkol rik'in xwankilal li ruq'; kinxji' jo' jun simaj q'esq'es li ru'uj ut sa' rochochil li simaj kinxk'uula.

³ Ut kixye we: “At Israel, laa'at laj k'anjel chiwu ut aawik'in tink'ut inloq'al”, chan.

⁴ Xb'aan naq laa'in kink'oxla: “Maak'a' aj e naq xinyal inq'e chi k'anjelak, yal xintawasi wib' chi maak'a' rajb'al”. Ab'anan ninb'aanu link'anjel sa' xk'ab'a' li Qaawa' ut linq'ajkamunkil wan chaq rik'in linYos.

⁵ Tintaw inloq'al chiru li Qaawa' ut A'an tz'aqal li nak'ehok inkawilal. Ut anaqwan kixye we li Qaawa', li kik'uub'ank chaq we rik'in linna' re naq tink'anjelaq chiru, re xsutq'isinkil chaq wi' chik laj Jakob rik'in A'an ut re xjunajinkileb' li ralal xk'ajol laj Israel:

⁶ “Moko tz'aqal ta naq aj k'anjelat chiwu yal re xwaklesinkil li xteepal laj Jakob ut xsutq'isinkileb' chaq wi' chik eb' laj Israel li xe'kole'k. Xatinxaqab' aj b'an wi' cho'q xsaqenkeb' li poyanam, re naq taawulaq linkolb'a ib' toj sa' xmaril li ruuchich'och'”.

⁷ A'in xyehom li Qaawa', laj Kolonel ut li xSant laj Israel; jo'ka'in kixye re li jun li jwal tz'eqtaananb'il. A'in xyehom li Yos re li jun majewanb'il sa' xyanqeb' chixjunileb' li tenamit, re li wank chi munil rub'el xwankileb' li josq' aj rahob'tesinel: “Naq eb' li awab'ej ut eb' li xninqal ru winq te'ril aawu, te'xaqliiq ut te'xk'utzub' rib' chawu, xb'aan naq laa'in li Qaawa', li xSant laj Israel: laa'in xinsik'ok aawu ut ninb'aanu li k'aru ninyeechi'i”.

Sahil ch'oolej sa' li xsutq'ijikeb'

⁸ Jo'ka'in kixye li Qaawa': “Sa' chaab'il kutan xatwab'i, sa' xq'ehil li kolb'a ib' xatintenq'a. Xatinyoob'tesi ut xatinxaqab' chi xk'ojob'ankil li sumwank rik'in li tenamit, re xwaklesinkil wi' chik li na'ajej ut xjek'inkil li ch'och' ak sachb'il xchaab'ilal;

⁹ re xyeeb'al reheb' li wankeb' sa' tz'alam: «Elenqex chaq», ut li wankeb' chaq sa' aak'ab': «K'utomaq eerib'». Sa' chixjunileb' li b'e te'xtaw chaab'il pach'aya' jo'wi' xwaheb' li ketomq chiru chixjunileb' li tzuul.

¹⁰ “Ink'a' te'tz'okaaq chi moko te'chaqiq re; ink'a' te'k'ate'q xb'aan li tiqwal iq' chi moko xb'aan xtiqwal li saq'e. Xb'aan naq Li na'uxtaanank ruheb' tixk'am xb'eheb' toj wan wi' li yu'amha'.

¹¹ Laa'in tintehoq b'e sa' chixjunileb' li k'iche' ut taatuqub'aaq ru chixjunil li b'e ak wank”, chan li Yos.

¹² K'e reetal, wankeb' te'chalq chaq chi najt; wankeb' te'chalq sa' xjayal releb'l iq' ut sa' rokeb'l li saq'e, ut wankeb' chik te'chalq chaq sa' xteepal Sinín.

¹³ Ex choxa ut ruuchich'och', japomaq eere xb'aan xsahil eech'ool. Ex tzuul, pisk'onqex ut b'ichanqex, xb'aan naq li Qaawa' xk'ojob' xch'ool li xtenamit ut xril xtoq'ob'aal ruheb' li wankeb' sa' rahilal.

¹⁴ “«Xinxkanab' li Qaawa', xinsachk sa' xch'ool linYos», chan laj Sión.

¹⁵ Ab'anan, ma wank tab'i' junaq na'b'ej nasachk sa' xch'ool li xk'uula'al malaj naxkanab' xraab'al li tz'aqal ralal? Us ta jo'kan naxb'aanu junaq na'b'ej, a'ut laa'in ink'a' tatinsach sa' inch'ool.

¹⁶ K'e reetal naq sa' li wuq' tz'iib'anb'ilat, junelik yookin chi rilb'aleb' laasuttz'akil.

¹⁷ Sa' junpaat te'chalq li te'waklesinq aawe ut te'elq aawik'in eb' li xe'juk'uk ut xe'sachok aawe.

¹⁸ Taqsi laawilob'aal ut ilon chasutam: chixjunileb' a'in yookeb' chi ch'utlaak ut xe'sutq'iik chaq wi' chik aawik'in. “Laa'in li Qaawa' ninye injurament naq chixjunileb' a'in chanchanaqeb' junaq lemtz'il q'ol, jo'kaqeb' li xsahob' ru junaq tuq'ixq ok re chi sumlaak.

¹⁹ Xb'aan naq laatenamit po'lem naq xwank, xjuk'mank ut nakirirnak xkanaak; ab'an anaqwan jwal taakach'ino'q ru xb'aan xk'ihaleb' li wanqeb' chisa', ut eb' li xe'sachok aawe jwal najt chik wanqeb'.

²⁰ Eb' laawalal li xaye naq xe'sachk chawu, te'xye wi' chik sa' laaxik: «Li tenamit a'in q'axal kach'in cho'q qe; k'e jalan chik qana'aj re naq sa toowanq chisa'», cha'qeb'.

²¹ Ut taaye ajwi' sa' laach'ool: «B'ar anchal xe'chalk chaq eb' li kok'al a'in? Maak'a'eb' chaq walal xb'aan naq jo'kin junaq xma'al ixq naq xinwank; xintz'eqtaanaak ut xin'isiik sa' lintenamit. Ut eb' a'in ani xe'k'iiresink reheb'? Xb'aan naq laa'in xinkanaak injunes. B'ar put xe'chalk a'in chi jo'kanan?»”.

²² Jo'ka'in kixye li Qaawa' Yos: “Laa'in tink'ut li wuq' chiruheb' li tenamit ut tink'e junaq eetalil cho'q reheb' li poyanam, re naq te'xk'am chaq chi q'unq'u eb' laawalal ut eb' laarab'in te'k'ame'q chaq sa' xb'eeneb' xtel.

²³ Eb' li awab'ej a'anaqeb' laj ilol aawe, ut li xrab'ineb' a'anaqeb' ruuchil laana'. Te'xwiq'ib' rib' chawu toj chiru ch'och', ut chi ru'uj raq'eb' texmes li pojtz' chawoq. Chi jo'kan taanaw naq laa'in li Qaawa' ut maajoq'e te'xutaanaq li neke'yo'onink wik'in”.

²⁴ Ma naru tab'i' xmaq'b'al li k'aru xreechani junaq kaw rib'? Malaj naru chi elelik junaq preex chiru li josq' aj winq?

²⁵ Li Qaawa' naxye naq naruuk: “Eb' li wankeb' chi preexil te'maq'e'q chiru li kaw rib', ut li reechanihom li josq' aj winq taa'eleliq chiru. Laa'in tinyaloq rik'ineb' li te'raj yalok aawik'in, ut tinkoleb' laawalal aak'ajol.

²⁶ Tink'eheb' chi xtiweb' rib' li xe'rahob'tesink aawe, ut te'ruk' li xkik'eleb' jo' tawi' eb' li neke'kalaak rik'in li chaab'il b'iin. Toja' naq chixjunileb' te'xnaw naq laa'in li Qaawa', laj Kolol aawe, li xNimajwal Yos laj Jakob li xin'isink chaq aawe sa' laarahilal”.