Isaías 46 - Q'eqchi Bible

Xt'anik Babilonia

¹ Li yos Bel ut li yos Nebo neke'tuuyank ut xe't'ane'k chiru ch'och'. Eb' li yos a'in neke'iiqaak xb'aaneb' li b'uur; k'amb'ileb' jo'eb' li iiq chirixeb' li tawajenaqeb' xul.

² Xe'eek'ank sa' xna'ajeb' ut xe't'ane'k chiru ch'och' chi xkab'ichaleb': ink'a' chik xe'ruuk chi wakliik, ut eb' a'an ajwi' xe'k'ame'k sa' jalanil tenamit.

³ “Ab'ihomaqin, ex ralal xk'ajol laj Jakob, ut chejunilex aj Israel li xexkole'k: Laa'in kin'iiqanink eere naq toj maji' nekexyo'laak, ut junelik xink'e inch'ool cherilb'al.

⁴ Toj sa' leetiixilal laa'inaq ajwi' leeYos; naq ak saqaq aj chik leejolom, texinch'oolani ajwi'. Laa'in kinyoob'tesink eere, ut toj texwil; texinb'eresi laa'in ut texinkol.

⁵ “Ani tineejuntaq'eeta wi' naq nekek'oxla laa'ex? Ani teeye naq kama'an nin'ilok?

⁶ Wankeb' neke'isink naab'al li oor sa' li xjelooleb' ut neke'b'isok plaat sa' li peex; chirix chik a'an neke'xsik' junaq aj tenol ch'iich' re naq te'xyiib' junaq xyoseb' re xwiq'ib'ankil rib' chiru jo'wi' re xloq'oninkil.

⁷ Neke'xk'am chi paqpo sa' xb'eeneb' xtel, neke'xxaqab' sa' xna'aj ut aran nakanaak chi junwaakaj; ink'a' na'elk sa' xna'aj. Us ta te'xjap reheb' chi xpatz'b'al xtenq'ankileb' chiru, ink'a' te'sumeeq chi moko te'kole'q chiru li rahilal.

⁸ “Chijultiko'q eere a'in ut k'oxlahomaq rix; chiwanq eek'a'uxl, ex aj q'etol aatin.

⁹ Jultikaq eere li k'aru kik'ulmank chaq junxil. Laa'in li Yos, ut maak'a' chik junaq; laa'in li Qaawa', ut maajun juntaq'eetin wi'.

¹⁰ Laa'in ninye chi rub'elaj li taak'ulmanq moqon, ut ninye resil xb'enwa li toj maji' nak'ulmank. Laa'in ninye: Li k'uub'anb'il inb'aan taa'uxmanq; ut chixjunil li nawaj xb'aanunkil, tinb'aanu.

¹¹ Sa' xjayal releb'l saq'e xinb'oq chaq jun li winq, li taachalq chaq sa' jun najtil tenamit jo' li t'iw ut tixb'aanu chixjunil li wajom. Ak jo'kan xinye, ut jo'kan tinb'aanu; kama'an xink'uub', ut jo'kan naq taa'uxmanq.

¹² Ab'ihomaqin, laa'ex li kaw eejolom, li najt wankex rik'in li kolb'a ib':

¹³ Chi seeb' tinchalq chekolb'al; ak xnach'ok chaq li kolb'a ib', moko taab'ayq ta chaq. Tinyeechi'i arin Sión li kolb'a ib' cho'q re laj Israel li nintaw wi' linloq'al.