Isaías 45 - Q'eqchi Bible

Laj Siro xtaql li Qaawa' Yos

¹ Jo'ka'in kixye li Qaawa' re laj Siro, sik'b'il ru xb'aan cho'q awab'ej: “Laa'in xatinch'ilo chawuq' re xk'eeb'aleb' li tenamit rub'el laawankil ut re xjuk'b'aleb' xwankil eb' li awab'ej. Laa'in xinte chixjunileb' li okeb'aal ut maajun chik taatz'ape'q chawu.

² K'amolb'ehaqin chawu ut tinkub'si xterameb' li tzuul. Tinpuk'iheb' li okeb'aal yiib'anb'il rik'in q'anch'iich' ut kok'puk' tinkanab'eb' li xnat'b'al rixeb'.

³ Tink'e aawe eb' li sahil eechej wankeb' chi muqmu, jo' ajwi' chixjunil li b'ihomal ink'a' nawb'il, re naq taanaw naq laa'in li Qaawa', li xYos laj Israel, li ninb'oqok aawe rik'in laak'ab'a'.

⁴ Sa' xk'ab'a' xraab'al laj Jakob aj k'anjel chiwu, sa' xk'ab'a' laj Israel, sik'b'il ru inb'aan, xatinb'oq rik'in laak'ab'a' ut xinterq'usi laawankil us ta laa'at ink'a' nakanaw wu.

⁵ Laa'in li Qaawa' ut maak'a' chik junaq; moko wank ta chik junaq yos chiwu laa'in. Xink'e aakawilal, us ta ink'a' nakanaw wu,

⁶ re naq chixjunileb' te'xnaw, chalen chaq sa' xjayal releb'l saq'e toj sa' rokeb'l, naq moko wank ta chik junaq yos chiwu laa'in. Laa'in li Qaawa' ut maak'a' chik junaq.

⁷ Laa'in ninyoob'ank re li kutan ut li aak'ab', ninb'aanu li usilal jo'wi' li rahilal. Laa'in li Qaawa' ninb'aanunk re chixjunil a'in.

Li xnimal xwankil li Yos

⁸ “Ex choxa, chehoy chaq li k'ajob'; ex choql, chetaqla chaq li tiikilal. Chitehonq li ch'och' ut chiruuchin li kolb'a ib'; rochb'eenaq a'an chi'atz'umaq li tiikil ch'oolej. Laa'in, li Qaawa', ninyoob'tesink re a'in”.

⁹ Ra chaalel sa' xb'een li naxwech' rix laj k'uub'ahom re, ut a'an chanchan junaq sek' sa' xyanqeb' li ch'och' sek'. Ma naxye tab'i' li seb' re laj pak'onel: “K'aru nakab'aanu laa'at?”, malaj: “Moko chaab'il ta laak'anjel”?

¹⁰ Ra chaalel sa' xb'een li tixye re li xyuwa': “K'a'ut naq xatsiyank?”, ut tixye re li xna': “K'a'ut naq xat-alank?”.

¹¹ Jo'ka'in kixye li Qaawa', li xSant laj Israel, laj Yoob'tesihom re: “Ma teewech' wix xb'aaneb' li walal ink'ajol? Ma teewech' rix li k'aru ninb'aanu laa'in?

¹² Laa'in kinyiib'ank re li ruuchich'och' ut kinyoob'tesiheb' li poyanam li wankeb' chisa'. Laa'in kinhelok re li choxa rik'ineb' li wuq' ut nintaqlank sa' xb'een chixjunileb' li chahim.

¹³ Laa'in xinwaklesink re laj Siro chi q'axok u ut xintuqub' ru chixjunileb' li b'e chiru. A'an taayiib'anq wi' chik re lintenamit ut taarach'ab'eb' li wankeb' chaq sa' jalanil tenamit, chi ink'a' tixpatz' xtojb'al chi moko xq'ajkamunkil”, chan li Nimajwal Yos.

¹⁴ Jo'ka'in kixye li Qaawa' re laj Israel: “Eb' laj k'anjel re Ejiipt, eb' laj yakonel re Etiopía ut eb' laj Sebá li jwal najteb' xteram te'chalq aawik'in ut laa'at taaweechaniheb'. B'ak'b'ooqeb' chi kareen naq te'xik chawix, te'xwiq'ib' rib' chawu ut te'xtz'aama usilal aawe: «Relik chi yaal naq li Yos wank aawik'in, ut maak'a' chik junaq yos chiru A'an», cha'qeb'”.

¹⁵ Relik chi yaal naq laa'at li muqmuukil Yos, laa'at li xYos laj Israel, laj Kolonel.

¹⁶ Sachsooqeb' xch'ool te'kanaaq laj yiib'ahom jalanil yos, te'kub'siiq xwankil ut te'se'eeq.

¹⁷ A'ut laj Israel kolb'ilaq xb'aan li Qaawa', kolb'ilaq chi junajwa. Maajaruj chik texk'ehe'q sa' xutaan chi moko texse'eeq.

¹⁸ Xb'aan naq jo'ka'in naxye li Qaawa', laj yoob'tesihom re li choxa, A'an tz'aqal Yos, li kik'uub'ank ut kiyiib'ank re li ruuchich'och', ut kixk'ojob' sa' xna'aj; moko kixyiib' ta chi maak'a' xyaalal, re b'an naq taatenamito'q: “Laa'in li Qaawa' ut maak'a' chik junaq chiwu laa'in.

¹⁹ Ink'a' xin'aatinak sa' hasb' chi moko sa' junaq muqmuukil na'ajej. Moko xinye ta reheb' li ralal xk'ajoleb' laj Jakob: «Sik'omaqin b'arwi' maak'a' wank». Laa'in li Qaawa' li nin'aatinak chi tz'aqal yaal, ut tiikil aatin ninye.

Li Qaawa' a'an tz'aqal Yos

²⁰ “Ch'utub'omaq eerib' ut kimqex wik'in; jilonqex chink'atq jo'k'ihalex li ink'a' xsache'k eeru sa'atqeb' li tenamit. Maak'a'eb' xna'leb' li neke'b'eresink li che'ilyos, ut neke'elajink chiru junaq yos li ink'a' nakolok.

²¹ Aatinanqex chi xkolb'al eerib'; wi teeraj, patz'omaq eerib' cherib'il eerib': Ani xk'ehok chi nawe'k a'in chalen chaq sa' xtiklajik? Ani ak xyehom chaq chalen chaq junxil? Ma maawa' tab'i' laa'in li Qaawa'? Maak'a' chik junaq yos chiwu laa'in. Laa'in li Yos tiik inch'ool ut aj kolonelin; maak'a' chik junaq yos chiwu laa'in.

²² “Sutq'inqex chaq wik'in re naq texinkol, chejunilex li wankatqex chaq sa' xmaril li ruuchich'och', xb'aan naq laa'in li Yos ut maak'a' chik junaq.

²³ Sa' xk'ab'a' linloq'al xinye injurament, sa' we x'elk li tz'aqal yaal, jun li aatin xaqxooq xwankil chi junelik: «Chixjunileb' te'xwiq'ib' rib' chiwu, chixjunileb' te'yehoq jurament

²⁴ ut te'xye naq ka'ajwi' rik'in li Qaawa' wank li tiikilal ut li wankilal». K'ajo'aq xxutaaneb' naq te'sutq'iiq chaq wik'in jo'k'ihaleb' li xik' neke'ilok we.

²⁵ Sa' ink'ab'a' te'q'axoq u ut k'eeb'ilaqeb' xloq'al chixjunileb' li ralal xk'ajol laj Israel”.