Isaías 44 - Q'eqchi Bible

Li Qaawa' naxk'ojob' xch'ool laj Israel

¹ “Ab'i, a Israel, aj k'anjelat chiwu; ab'i, a Jakob, insik'om chaq aawu.

² Laa'in li Qaawa' laj yoob'tesihom aawe, li kinsiyank chaq aawe ut toj yookin chatenq'ankil. Matxiwak, a Jakob, aj k'anjelat chiwu, at Yesurún, lintenamit sik'b'il ru inb'aan.

³ Tintaqla li hab' sa' li chaqich'och' ut tinyoob'tesiheb' li nima' sa' li joxk' na'ajej. Tinhoy linmusiq' sa' xb'eeneb' laawalal aak'ajol ut twosob'tesiheb' laawi aamam.

⁴ Te'k'iiq jo' li pim sa' li chaab'il ch'och', jo'kaqeb' li che' chire li nima'.

⁵ Li jun tixye: «Laa'in rehin li Qaawa'», li jun chik tixk'ab'a'in ralal xk'ajol laj Jakob, ut li jun chik tixtz'iib'a sa' ruq': «Li Qaawa' a'an laj eechal we», ut tixye naq xkomoneb' laj Israel”.

Jun ajwi' li Qaawa', ka'ajwi' li qaYos

⁶ Jo'ka'in kixye li Qaawa', li Nimajwal Yos, li awab'ej re Israel, laj kolol reheb': “Laa'in li xtiklajik ut li xraqik; maak'a' chik junaq yos chiwu laa'in.

⁷ Ma wank tab'i' junaq kama' laa'in? Chi'aatinaq anaqwan ut xyehaq xyaalal we. Ani xyehok resil chi junxilaj li k'aru taak'ulmanq moqon? Ani nayehok qe li k'a'aq re ru chaalel?

⁸ Mexxiwak ut meesiksiki eerib'. Ma ink'a' ak inyehom resil laa'in chalen chaq junxil? Laa'ex li testiiw chiwix. Ma wank tab'i' junaq chik yos chiwu laa'in? Maak'a' chik junaq aj kolonel, ka'ajin wi' ut maak'a' chik junaq”.

Li loq'onink jalanil yos

⁹ Chixjunileb' laj yiib'ahom xjalam u jalanil yos maak'a' neke'ok wi'; maak'a' rajb'al li xb'aanuhomeb' us ta jwal raaro xb'aaneb'. Eb' li neke'loq'onink reheb' maak'a' neke'ril ut maak'a' neke'xnaw; jo'kan naq te'kanaaq sa' xutaan.

¹⁰ Ani nayiib'ank junaq yos malaj naxpak' junaq jalam u chi maak'a' ta royb'enihom?

¹¹ Chixjunileb' li neke'loq'onink reheb' xutaanal te'elq, xb'aan naq eb' laj yiib'ahom reheb' yal winqeb'. Wi te'xch'utub' rib' sa' raqleb'aal aatin, te'ok xxiw chixjunileb' ut te'kanaaq sa' xutaan.

¹² Qilaq li naxb'aanu laj tenol ch'iich': naxchap li ch'iich', naxk'e sa' ru xam ut naxteni chi t'ojleb' rik'in xmetz'ew re xk'uub'ankil jo' chanru x'alaak sa' xch'ool. Ab'anan wi laj tenol ch'iich' ink'a' nawa'ak, taalajq li xmetz'ew; ut wi ink'a' na'uk'ak ha', taatawaaq ut ink'a' chik tixkuy k'anjelak.

¹³ Malaj qilaq li naxb'aanu laj peech': naxb'is li che', naxtz'iib'a junaq eetalil chiru, naxq'otoxi rik'in lach' tz'iib'leb', ut chirix a'an na'ok chi xpech'inkil ru. Chi jo'kan tixyiib' xjalam u junaq poyanam, tz'aqal jo' na'ilok, ut moqon chik tixk'ojob' sa' junaq tijob'aal.

¹⁴ Kixsik' ru jun toon chi yaw malaj junaq ji, xkomoneb' li neke'k'iik sa'eb' li k'iche'; malaj kiraw jun toonaq li saqichaj, ut li hab' kik'iiresink re.

¹⁵ Chi jo'kan eb' li poyanam taawanq xsi'eb', te'q'ixinq chiru xam, malaj rik'in li che' a'an te'xchiq li kaxlanwa. Malaj ut te'xyiib' junaq jalam u chiru, re te'xwiq'ib' rib' chi xloq'oninkil ru.

¹⁶ Wan ajwi' naq li winq tixk'at li xtoqolal li che', tixk'uub' xtzekemq sa' li xxamlel, ut tixtzeka pomb'il tib' toj reetal taanujaq. Taaq'ixinq chiru ut tixye: “Q'axal sa li q'ixink chiru li xam a'in; k'ajo' xsahil!”, cha'aq.

¹⁷ Ut chiru li che' x'ela'ank tixyiib' li xjalam u junaq yos, tixwiq'ib' rib' chi xloq'oninkil ru ut tixye re: “Chinaakol xb'aan naq laa'at linyos”, cha'aq re.

¹⁸ Eb' li poyanam a'an, maak'a' neke'xnaw chi moko neke'xtaw ru. Tz'aptz'o xsa' ruheb' ut maak'a' neke'ril; maak'a' xna'leb'eb' ut ink'a' neke'xtaw ru.

¹⁹ Maak'a' neke'xk'oxla, maak'a' xnawomeb' chi moko neke'xtaw xyaalal re xyeeb'al: “Xink'at li xtoqolal li che', xinyiib' linwa, xinpomok tib' sa' ru xxamlel ut xinwa'ak. Chiru li rela' li che' xinyiib' jun li tz'i'b'eetalil yos, ut anaqwan yookin chi xloq'oninkil yal jun kurul chi che'!”.

²⁰ Relik chi yaal naq eb' li poyanam a'an neke'xkawu xch'ooleb' chirix li maak'a' na'ok wi', ut neke'xb'alaq'i rib'eb'. Maajoq'e te'ruhanq chi xkolb'al rib'eb' chi moko te'xye: “Tik'ti' tz'aqal li k'aru wank sa' linnim uq'”.

Li Qaawa' naxkuy xmaak laj Israel

²¹ Jultikaq aawe, a Jakob, naq laa'at aj k'anjel chiwu; laa'at aj k'anjel chiwu xb'aan naq laa'in kinyoob'tesink aawe. Minsachk sa' laach'ool, a Israel.

²² Laa'in xinkuy laaq'etq'etil ut xinsach laamaak jo' naq nasachk li choql ut li mayuus. Sutq'in chaq wik'in xb'aan naq laa'in xinkolok aawe.

²³ At choxa, jap aawe xb'aan xsahil aach'ool sa' xk'ab'a' li xb'aanuhom li Qaawa'. B'ichanqex, sahoqex, ex xchamal li ruuchich'och'! Ex k'iche' ut ex tzuul eerochb'een chixjunileb' li che', pisk'onqex xb'aan xsahil eech'ool, xb'aan naq li Qaawa' xk'ut li xloq'al chiru laj Israel naq xkoleb' li ralal xk'ajol laj Jakob.

“Laa'in li Qaawa'”

²⁴ Jo'ka'in kixye li Qaawa' laj Kolol aawe, li kisiyank chaq aawe naq toj maji' nakatyo'laak: “Laa'in li Qaawa', laa'in kinyoob'tesink re chixjunil, injunes kinhel ru li choxa ut kink'ojob' li ruuchich'och' sa' xna'aj.

²⁵ Laa'in ninpo'ok ru li neke'xye eb' laj q'e, ut ninjuk' li esil neke'xye li neke'b'alaq'ink; ninsach xk'a'uxeb' li wankeb' xna'leb', ut memil nakanaak wi' li xnawomeb'.

²⁶ Ab'an ninxaqab' xwankil li raatineb' laj k'anjel chiwu ut ninb'aanu naq us te'elq eb' lintaql. Laa'in ninye naq taatenamito'q wi' chik Jerusalén, ut ninjultika naq eb' li tenamit sa' xteepal Judá te'waklesiiq wi' chik. Laa'in tinwaklesinq reheb' sa' li xpo'lemil.

²⁷ Laa'in wank inwankil chi xyeeb'al re li palaw: «Chatchaqiq! Maak'a'aq chik ha' sa' laachamal!».

²⁸ Ut laa'in ninye re laj Siro: «Aj k'anjelat chiwu, laa'at taab'aanu chixjunil li wajom»; ut ninye re Jerusalén: «Tattenamito'q wi' chik»; ut ninye ajwi' naq taayiib'amanq wi' chik linloq'laj ochoch arin Sión”.