Isaías 43 - Q'eqchi Bible

Ka'ajwi' li Qaawa' nakolok

¹ Anaqwan, jo'ka'in kixye li Qaawa', laj yoob'tesihom aawe, a Israel, laj winqob'resihom aawe, a Jakob: “Matxiwak xb'aan naq laa'in xatinkol; laa'in xink'ehok laak'ab'a', wehat chik.

² Wi tatnume'q sa' ha', tatwochb'eeni; wi taaq'ax junaq nima', ink'a' tatxk'am li roqha'; wi ut tatnume'q sa xam, ink'a' tatk'atq, chi moko taaletzq li raq' xam chawix.

³ Xb'aan naq laa'in li Qaawa' laaYos, li xSant laj Israel, laj Kolol aawe. Ruuchil aatojb'al xinq'axtesiheb' li tenamit Ejiipt, Etiopía ut Sabá cho'q aaweeqaj.

⁴ Xb'aan naq jwal loq'at cho'q we laa'in, q'axal terto aatz'aq ut nakatinra. Tink'eheb' li poyanam ut eb' li tenamit cho'q aaweeqaj re xkolb'al laayu'am.

⁵ Matxiwak b'i', xb'aan naq wankin aawik'in. Sa' xjayal chaq releb'l saq'e toj sa' rokeb'l tink'ameb' chaq ut tinch'utub'eb' laawalal aak'ajol.

⁶ Tinye reheb' li wankeb' sa' xjayal releb'l iq': «Q'ajsihomaq chaq we», ut reheb' li wankeb' sa' xjayal xsak'leb' iq': «Maarameb' chik. K'ameb' chaq we eb' li walal ink'ajol toj chi najt, chalen chaq sa' xmaril li ruuchich'och';

⁷ k'ameb' chaq chixjunileb' li neke'patz'ok ink'ab'a', eb' li xinyoob'tesiheb', xinwinqob'resiheb' ut xinkawresiheb' re naq te'xloq'oni wu».

⁸ “Isihomaq chaq lintenamit: a'an mutz' aj tenamit, us ta wank xsa' ruheb', ut tz'apxikeb', us ta wank xxikeb' re ab'ink.

⁹ Xch'utub'aaq rib' chixjunileb' li poyanam, xjunajiiq rib' chixjunileb' li tenamit. Ani sa' xyanqeb' a'an xyehok resil a'in, malaj ak xyehom li kik'ulmank junxil? Xxaqab'aqeb' li xtestiiw li te'ch'olob'anq xyaalal chiqu, re naq te'ab'iiq ut tqaye: «Yaal a'an».

¹⁰ Laa'ex lintestiiw -chan li Qaawa'-; laa'ex aj k'anjelex chiwu ut insik'om chaq eeru re naq teenaw wu ut k'ojk'ooq leech'ool wik'in, ut teetaw xyaalal anihin laa'in. Maak'a' chik junaq yos chiwu laa'in, chi moko taawanq junaq chik moqon chiwix.

¹¹ Ka'ajin wi' li Qaawa', ut maak'a' chik junaq aj kolonel chiwu.

¹² Laa'in xinyehok resil li kolb'a ib' chaalel, xink'ehok chi nawe'k ut xexinkol; maawa' junaq jalanil yos xb'aanunk re: laa'ex lintestiiw -chan li Qaawa'-.

¹³ Chalen chaq q'e kutan, ak laa'in chaq li Qaawa'. Maajun taakoloq eere sa' wuq'; maajun taaruuq chi xjuk'b'al li ninb'aanu laa'in”.

¹⁴ Jo'ka'in kixye li Qaawa', li xSant laj Israel, li ki'ach'ab'ank eere: “Sa' xk'ab'a' leeraab'al wankeb' poyanam xeb'intaqla aran Babilonia; xinte chixjunileb' li tz'alam, ut li xsahil xch'ooleb' laj Kaldeha xkanaak cho'q rahilal.

¹⁵ Laa'in li Qaawa', laa'in leeSant, li kiyoob'tesink re Israel, laa'in li nin'awab'ejink eere”.

¹⁶ Jo'ka'in kixye li Qaawa' li kitehok b'e sa' li palaw, jo' jun nimb'e sa' xkawil oq li ha'.

¹⁷ Kixk'eheb' chi yalok k'iila aj puub' q'axal kaweb' rib', rochb'eeneb' li b'eleb'aal ch'iich' ut eb' li kawaay, yal re xsachb'al ruheb': junxikikeb' chi kamk. Ke't'ane'k ut maajun chik kiwakliik; ke'oso'k jo' naq nachupk li saqenk. Jo'ka'in naxye anaqwan:

¹⁸ “Meek'oxla chik li kik'ulmank junxil, meejultika chik li ak xnume'k.

¹⁹ Jalan chik li k'aru tinb'aanu, ut ak xintikib' xb'aanunkil. Ma toj maji' nekek'e reetal? Yaal naq tinte junaq b'e sa' li chaqich'och', jo' junaq nimb'e sa' li junesal na'ajej.

²⁰ Eb' li josq' aj xul, eb' laj xojb' jo'wi' eb' laj tak' ra' te'xk'e inloq'al, xb'aan naq taayo'laaq li ha' sa' li chaqich'och' ut te'wanq nima' sa' li joxk' ch'och', re naq te'uk'aq lintenamit sik'b'ileb' ru inb'aan.

²¹ Toja' naq li tenamit li kinkawresi cho'q we te'xb'icha linloq'al.

²² “Ab'an laa'at, a Jakob, ink'a' xapatz' link'ab'a', xattitz'k b'an inb'aan, a Israel.

²³ Ink'a' xayeechi'i we laakarneer cho'q k'atb'il mayej chi moko xaloq'oni wu rik'in mayejak. Laa'in ink'a' xatintawasi rik'in xtitz'b'al laamayej, chi moko xatinch'i'ch'i'i rik'in xpatz'b'al laak'ajpom.

²⁴ Ink'a' xatintaqla chi loq'ok sununkil b'an re ta xamayeja chiwu, ut ink'a' xak'ojob' inch'ool rik'in xxeeb'ul laaxul. Laa'at b'an xattawasink we rik'ineb' laak'iila maak ut xinaach'i'ch'i'i xb'aan laamaa'usilal.

²⁵ Ab'an laa'in xinkuy chixjunil laamaak ut ink'a' chik xink'e sa' inch'ool laamaa'usilal, xb'aan naq Yosin.

²⁶ Wi wank k'aru nakawaj wi' injitb'al, qawech'aq rix sa' li raqleb'aal aatin; tz'il rix chi us anaqwan re xnawb'al ani wank xmaak.

²⁷ Xb'enwa kimaakob'k laaxe'toonil yuwa'; chirix chik a'an eb' laj k'amol aab'e ke'xq'etq'eti rib' chiwu.

²⁸ Jo'kan naq kinsach ruheb' li xjolomileb' li tenamit, kink'e chi sache'k laj Jakob chi junajwa ut kinq'axtesi laj Israel chi majewaak.