Isaías 41 - Q'eqchi Bible

Laj Siro, xtaql li Qaawa'

¹ Ch'anab'aq eek'ank, ex tenamit li wankatqex chire li palaw; kawaq eech'ool, ex tenamit. Jilonqex chaq re naq too'aatinaq chi us, qach'utub'aq qib' chiqajunilo chi raqok aatin.

² Ani xwaklesink chaq re li awab'ej a'an sa' releb'l saq'e, li junelik naq'axok u? Ani naq'axtesink re eb' li tenamit sa' ruq' ut naxkub'si xwankileb' li awab'ej? Pojtz' te'kanaaq xb'aan li xq'esnal ch'iich', ut kama'eb' li k'im naq te'cha'cha'iiq xb'aan li xsimaj.

³ A'an naraanilasiheb' chi maajun nach'i'ch'i'ink re, chanchan wi' naq ink'a' naxtoch' li ch'och' rik'ineb' li roq.

⁴ Ani xk'uub'ank ut xb'aanunk re a'in? A' li xk'ehok xyu'ameb' li poyanam chalen chaq junxil: laa'in, li Qaawa', li junaj chirib'il, li xtiklajik ut li xraqik.

⁵ Ex tenamit li wankatqex chire li palaw, ilomaq ut chexxiwaq; chesiksiki eerib', ex xnub'ajlil li ruuchich'och'. Jilonqex chaq ut chalqex.

⁶ Li junjunq naxtenq'a li ras riitz'in ut naxye re li rochb'een: “Kawaq aach'ool”.

⁷ Laj peech' naxkawub'resi xch'ool li nak'anjelank re li oor ut li plaat; ut li nat'ojok chi t'ojleb' naxk'e xkawub' xch'ool li yo chi tenok ch'iich', ut naxye re: “Chaab'il x'elk laak'anjel”, chan re. Ut chirix a'an naxt'oji chi klawx li jalam u re naq ink'a' taa'eek'anq sa' xna'aj.

Li Qaawa' wank rik'ineb' laj Israel

⁸ Ab'i, a Israel, aj k'anjelat chiwu; ab'i, a Jakob, insik'om chaq aawu, ex intenamit, ralal xk'ajolex laj Abrahán, li wamiiw:

⁹ Laa'in kin'isink chaq aawe toj sa' xmaril li ruuchich'och', katinb'oq chaq toj sa' li na'ajej jwal najt ut kinye aawe: “Laa'at aj k'anjel chiwu”. Laa'in insik'om chaq aawu ut ink'a' katintz'eqtaana.

¹⁰ Matxiwak, xb'aan naq wankin aawik'in; matk'oxlak xb'aan naq laa'in laaYos. Laa'in ninkawub'resink ut nintenq'ank aawe, kaw nakatinchap rik'in li wuq' li jwal kaw rib'.

¹¹ Chixjunileb' li xik' neke'ilok aawe te'kanaaq sa' xutaan ut te'kub'siiq xwankil; tik maak'a'eb' chik te'kanaaq eb' li neke'raj numtaak sa' aab'een.

¹² Taasik'eb' li xik' neke'ilok aawe ut ink'a' taataweb'; ut eb' li neke'raj yalok aawik'in chanchan tawi' naq maajun wa xe'wank.

¹³ Xb'aan naq laa'in li Qaawa', laaYos, chapchookat chawuq' inb'aan. Laa'in ninyehok aawe: “Matxiwak, laa'in nintenq'ank aawe”.

¹⁴ Matxiwak, a Jakob, mich'inank aach'ool, a Israel: us ta jwal kach'inat ut maak'a' aametz'ew, laa'in nintenq'ank aawe -chan li Qaawa'-. Laa'in, li xSant laj Israel, laj Kolol aawe.

¹⁵ K'e reetal, xatink'e chi xsachb'al ruheb' jo' li ak' pikleb' ch'och'; taaputz'iheb' li tzuul ut pojtz' taakanab'eb', chanchaneb' li k'im naq te'kanaaq li ninqi b'ool.

¹⁶ Taakuteb' chi najt ut li iq' taak'amoq reheb', te'cha'cha'iiq xb'aan li kaqsut-iq'; a'ut laa'at taasaho'q laach'ool rik'in li Qaawa', taanimob'resi aawib' sa' xk'ab'a' li xSant laj Israel.

¹⁷ Eb' li neb'a' ut li kub'enaqeb' xwankil neke'xsik' li ha', ab'an maak'a' neke'xtaw; xe'chaqik li ru'uj raq'eb' xb'aan li chaqi'eel. Ab'an laa'in li Qaawa' tintenq'aheb', laa'in li xYos laj Israel ink'a' tinkanab' xjuneseb'.

¹⁸ Tinyoob'tesiheb' li nima' sa'eb' li t'ojoch aj tzuul, ut eb' li yu'amha' te'wanje'q chiruheb' li taq'a. Tinsutq'isi li chaqich'och' cho'q k'anha', ut taayo'laaq ha' sa' li joxk' na'ajej.

¹⁹ Sa' li chaqich'och' tink'eheb' chi yo'laak li yaw, li akasya, li waa'uut ut eb' li oliiw. Tink'e chi k'iik eb' li saqichaj, li salche' ut li chaj sa'eb' li junesal na'ajej,

²⁰ re naq chixjunil li ruuchich'och' tixnaw, tixtaw ru ut tixnaw xyaalal naq laa'in li Qaawa' xinb'aanunk re a'in; laa'in li xSant laj Israel xinyoob'tesink re rik'in linwankil.

Ka'ajwi' li Qaawa' a'an Yos

²¹ Kimqex chi xkolb'al eerib', chan li Qaawa'. K'utomaq chiwu leeb'aanuhom, chan li x'Awab'ej laj Jakob.

²² Kimqex ut yehomaq qe k'aru taak'ulmanq. Ch'olob'omaq qe k'aru kik'ulmank junxil, ut laa'o took'oxlaq chirix a'an; yehomaq qe li chaalel chiqu re naq tqanaw k'aru toxkanaaq wi'.

²³ Yehomaq resil li toxk'ulmanq moqon, re tqanaw naq laa'ex yosex. B'aanuhomaq junaq k'a'aq re ru, a' yaal ma chaab'il malaj ut ink'a', re naq ak wan wi' k'aru taaqil ut tooxiwaq xb'aan.

²⁴ Ab'anan moko yosex ta ut maak'a' nekex'ok wi': maak'a' k'a' ru teeb'aanu. Tz'eqtaananb'ileb' chi junajwa eb' li neke'sik'ok eere.

²⁵ Xinsik' chaq ru sa' xjayal releb'l iq', ut yo chaq chi chalk; sa' xjayal releb'l li saq'e xinb'oq chaq rik'in li xk'ab'a'. A'an tixyeq'iheb' sa' roq eb' li awab'ej jo' li sulul, jo' naxb'aanu laj pak'onel naq naxyoq'le li seb' sa' roq.

²⁶ Ani xyehok resil a'in chalen chaq sa' xtiklajik re naq xqanaw chiqajunilo? Ani ta xyehok chaq xb'enwa re raj naq xqaye laa'o naq yaal li yo chi xyeeb'al? Maajun eere laa'ex xyehok a'an chi moko xwank ani xk'ehok chi ab'iik; maajun eere x'ab'ink junaq aatin.

²⁷ Laa'in xinyehok xb'enwa re Sión chalen chaq sa' xtiklajik; laa'in xintaqlank re jun aj yehol chaab'il esilal aran Jerusalén.

²⁸ Xin'ilok, ut maajun reheb' li jalanil yos xeb'intaw; xinpatz'ok chirix a k'a'aq re ru a'in, ab'an maajun aj k'ehol na'leb' xintaw, maajun xsumenk re linpatz'om.

²⁹ Relik chi yaal naq maak'a' neke'ok wi'; maak'a' neke'ruuk chi xb'aanunkil, yal pojpookeb' xsa' li jalanil yoseb'.