Isaías 40 - Q'eqchi Bible

ISAÍAS II Xk'ojob'ankil xch'ool Israel

¹ K'ojob'omaq xch'ool lintenamit, k'ojob'omaq xch'ool -chan li Qaawa' leeYos-.

² Aatinomaq Jerusalén sa' q'unil aatin ut yehomaq re chi yaal naq moko mun ta chik, ak xtoj rix chixjunil li xmaak, xb'aan naq ka'sut xrahob'tesiik xb'aan li Qaawa' chirix chixjunil li maa'usilal xb'aanu.

³ Jun xyaab' kuxej yo chi xyeeb'al: “Tuqub'omaq ru junaq b'e cho'q re li Qaawa' sa' li chaqich'och', helomaq ru junaq nimb'e cho'q re li qaYos sa' li joxk' na'ajej.

⁴ Chixjunil li taq'a chitaqsimanq ru, chixjunileb' li tzuul ut eb' li b'ool che'kub'simanq xteram; li yokos ru chitiikob'resimanq ut li b'uk'ux ru chituqub'amanq ru cho'q taq'a.

⁵ Toja' naq taak'utunq li xloq'al li Qaawa' ut chixjunileb' li poyanam te'ril ru. Xb'aan naq li Qaawa' xyehok re”.

⁶ Jun xyaab' kuxej yo chi xyeeb'al we: “Jap aawe chi aatinak”; ut laa'in kinchaq'ok: “K'aru tinye?”, chankin. “Ye naq chixjunileb' li poyanam chanchaneb' li pim, ut chixjunil li xloq'aleb' kama' xch'ina'usal li uutz'u'uj.

⁷ Natz'umaak li uutz'u'uj ut nachaqik li pim, naq li xmusiq' li Qaawa' na'apunk sa' xb'eeneb'.

⁸ Nachaqik li pim ut natz'umaak li uutz'u'uj, a'ut li raatin li qaYos wank chi junelik”.

⁹ Taqen sa' xb'een junaq tzuul najt xteram, at aj yehol esil re Sión; aatinan chi kaw xyaab' aakux ut chi maak'a'aq aaxiw, at aj yehol esil re Jerusalén. Ye reheb' li tenamit re Judá: “Arin wank leeYos”.

¹⁰ K'ehomaq reetal, yo chi chalk li Qaawa' rik'in xnimal xwankil: chixjunil wank rub'el roq rub'el ruq'! K'ehomaq reetal, rochb'een chaq li xtojb'al ut k'amol b'e chaq chiru li q'ajkamunk.

¹¹ Jo' junaq aj ilol ketomq, naxb'eresiheb' li xkarneer; naxq'alu eb' li xkok' karneer ut naxq'uneb', ut naxk'eheb' chi hilank li toja' xe'alank.

Jwal nim xloq'al li Qaawa' Yos

¹² Ani xb'isok re li palaw chi k'utub' malaj xb'is li xnimal ru li choxa rik'in ruq'? Ani xxokok re chixjunil li pojtz' sa' junaq uk'al malaj xb'is eb' li tzuul ut eb' li b'ool sa' junaq peex?

¹³ Ani xk'ehok xna'leb' li Qaawa' malaj ani xyehok re k'aru tixb'aanu?

¹⁴ Ani ta aj ik'in xpatz' xna'leb'? Ani xk'ehok xk'a'uxl chiraqoq aatin sa' tiikilal? Ani xk'utuk chiru li xnimal xnawom malaj xch'olob'ank re li choxahil na'leb'?

¹⁵ Chiru li Qaawa' eb' li tenamit chanchaneb' jun tz'uqul chi ha' sa' junaq sek', kama' wi' junaq ru li pojtz' sa' li peex; eb' li na'ajej sa' xyi li palaw jo' raalal li xk'aj li pek.

¹⁶ Chixjunil li si' li wank aran Líbano moko tz'aqal ta cho'q re li xam, ut eb' li xul li wankatqeb' aran moko te'tz'aqloq ta cho'q re li k'atok mayej.

¹⁷ Chiru li Qaawa' chixjunileb' li tenamit sa' ruuchich'och' chanchan naq maak'a'eb'; maak'a' neke'ok wi', tik maak'a'eb' aj e.

¹⁸ Ani teejuntaq'eeta wi' li Yos malaj k'aru teejalamuuchi wi'?

¹⁹ Ink'a' naru xjuntaq'eetankil rik'in li jalam u naxyiib' junaq aj tenol ch'iich', ut laj pak'onel naruutz'u'uji rik'in oor ut naxyiib'atq xkareen plaat re xk'eeb'al chi xkux.

²⁰ Naq junaq neb'a' namayejak, naxsik' junaq che' li ink'a' naq'aak, ut chirix a'an naxsik' junaq chaab'il aj peech' re naq tixyiib' junaq xjalam u li ink'a' taa'eek'anq sa' xna'aj.

²¹ Ma ink'a' tab'i' nekenaw laa'ex? Ma ink'a' eerab'ihom resil? Ma toj maji' naseeraq'imank eere chalen chaq junxil? Ma ink'a' eetawom ru chalen chaq sa' xk'ojlajik li ruuchich'och'?

²² K'ojk'o chaq li Yos sa' xb'een li ruuchich'och', ut eb' li poyanam li wankatqeb' chisa' kama'eb' laj saak'. A'an xhelok re li choxa jo' junaq t'ilkem, ut xkupu ru jo' junaq muheb'aal re hilank chisa'.

²³ Li Qaawa' naxjuk' xwankileb' li xninqal ru winq, ut eb' li neke'awab'ejink sa' ruuchich'och' naxsacheb' ru.

²⁴ Chanchaneb' li kok' che' li toje' xe'awmank malaj xe'ch'ike'k sa' ch'och', ut toja' xe'ok xchapb'al xxe'. Wi li Qaawa' na'apunk sa' xb'eeneb', te'chaqiq, ut kama' li pim naq te'k'ame'q xb'aan li kaqsut-iq'.

²⁵ “Ani ut nikineejuntaq'eeta wi' laa'ex malaj ani juntaq'eet wik'in?”, chan li Qaawa', li q'axal Sant.

²⁶ Taqsihomaq leerilob'aal sa' choxa ut ilomaq: ani xk'uub'ank re chixjunil a'an? A' li najek'ink reheb' li chahim chi tzol sa' xna'aj ut naxb'oqeb' li junjunq rik'in xk'ab'a'. Q'axal nim xwankil ut k'ajo' li xkawilal, ut maajun reheb' naxmuq rib' chiru.

²⁷ K'a'ut naq yookat chi aatinak, a Jakob? K'a'ut naq nakaye, a Israel: “Li Qaawa' ink'a' naxk'e reetal li k'aru yooko xk'ulb'al; maak'a' naraj re li Yos li k'aru ink'ulub'”?

²⁸ Ma ink'a' nakanaw laa'at? Ma ink'a' aawab'ihom resil? Li Qaawa' a'an li Yos wank chi junelik; A'an kixaqab'ank re li xnub'ajlil li ruuchich'och'. Ink'a' nalub'k chi moko natawaak, ut maajun natz'ilok rix li xseeb'al xk'a'uxl.

²⁹ A'an nak'ehok xkawilal li tawajenaq ut naxkawub'resi xch'ool li lub'lub' wank.

³⁰ Neke'tawaak ut neke'lub'k eb' li saaj winq, neke'lub'k ut neke't'ane'k eb' li kaweb' rib';

³¹ a'ut li neke'oyb'enink rik'in li Qaawa' junelik kawaqeb' rib' ut te'rupupiq jo'eb' li t'iw; te'aanilaq chi ink'a' te'lub'q, ut te'b'eeq chi ink'a' te'tawaaq.