Isaías 4 - Q'eqchi Bible

¹ Sa' li kutan a'an wuqub' chi ixq te'xchap jun chi winq ut te'xye re: “Laa'o tqach'oolani qib' qajunes ut tqatiqib' qib' jo' chanru tooruuq; ka'ajwi' naqaj naq tatsumlaaq qik'in ut taamoy li qaxutaan”, cha'qeb'.

Li Yos tixkuy xmaakeb' laj Israel

² Sa' li kutan a'an li xTuxm li Qaawa' a'anaq li xloq'al ut li xsahil ruheb' laj Israel li te'kole'q; ut li Ru li ch'och' a'anaq li xwankilal ut li xnimal xloq'aleb'.

³ “Santil tenamit” te'xk'ab'a'in li te'kole'q aran Sión, jo'k'ihaleb' li ink'a' ke'sache'k ru sa' li tenamit Jerusalén ut tz'iib'anb'il xk'ab'a'eb' sa' xyanqeb' li yo'yookeb'.

⁴ Naq li Qaawa' taarisi li xmaa'usilaleb' laj Sión ut tixkuy xmaakeb' li ke'kamsink aran Jerusalén, naq akaq xch'ajob'resi xsa' li tenamit rik'in li xloq'laj musiq' ut li xxamlel li xjosq'il,

⁵ tixk'e jun li choql jwal q'oqyink ru chiru li kutan sa' xb'een li tzuul Sión ut sa' xb'een li xLoq'laj Ch'utam; ut chiru q'oqyink taalemtz'uno'q jun lochlookil xam. Ut sa' xb'een chixjunil a'an wanq li xloq'al li Qaawa',

⁶ re xkolb'aleb' chiru xtiqwal li saq'e ut xmuheelaqeb' chiru li hab' jo'wi' chiru li kaqsut-iq'.