Isaías 39 - Q'eqchi BibleEb' li xtaql li awab'ej re Babilonia ( 2 R 20,12-19 ; 2 Kr 32,27-31 ) 1 Sa'eb' li kutan a'an laj Merodak-Baladán, ralal laj Baladán, awab'ej re Babilonia, kirab'i resil naq kiyajerk laj Esekías ut ak xk'iraak chik. Toja' naq kixtaqla jun xhu jo'wi' jun xmaatan. 2 K'ajo' naq kisaho'k xch'ool laj Esekías naq kixk'ul a'an! Jo'kan naq kixk'ut chiruheb' li xtaql laj Merodak chixjunil li xb'ihomal, li plaat ut li oor, li sununkil b'an ut li chaab'il aseeyt, jo' ajwi' li k'a'aq re ru nak'anjelak re yalok. Laj Esekías kixk'ut li jo'ch'inal jo'nimal wank sa'eb' li xk'uuleb'aal jo'wi' sa' chixjunil li x'awab'ejihom. 3 Toja' naq li propeet Isaías kiwulak rik'in laj Esekías, li awab'ej, ut kixpatz' re: “K'aru xe'xye aawe eb' li winq a'an ut b'ar xe'chalk chaq?”, chan. Kichaq'ok laj Esekías ut kixye: “Xe'chalk chaq sa' jun najtil tenamit, Babilonia xk'ab'a'”, chan. 4 Laj Isaías kipatz'ok wi' chik re: “K'aruhatq xe'ril sa' laawochoch?”, chan re. Kixye laj Esekías: “Xe'ril chixjunil li k'a'aq re ru wank sa' li wochoch; maak'a' chik k'aru ink'a' ta xink'ut chiruheb'”. 5 Ut laj Isaías kixye re laj Esekías: “Ab'i li k'aru naxye li Nimajwal Yos: 6 «Taawulaq xkutankil naq te'xk'am aran Babilonia chixjunil li k'a'aq re ru wank sa' laawochoch, li jo'ch'inal jo'nimal ke'xk'uula laamama' aawixa'an chalen chaq junxil toj anaqwan. Maak'a' chik tkanaaq arin, chan li Qaawa'. 7 Wanqeb' aawalal, siyanb'ilaqeb' aab'aan, li te'k'ame'q ut te'k'ehe'q chi ilok rochoch li awab'ej re Babilonia»”. 8 Toja' naq laj Esekías kixye re laj Isaías: “Q'axal chaab'il li raatin li Qaawa' xaye we”. Kixye chi jo'kan xb'aan naq kixk'oxla sa' xch'ool: “A' yaal naq taawanq li tuqtuukilal ut li sahilal chiru linyu'am”, chan sa' xch'ool. |
Q'eqchi DC Bible © Bible Society in Guatemala, 2005.
Bible Society in Guatemala