Isaías 37 - Q'eqchi Bible

Eb' laj Judá ke'kole'k sa' ruq' laj Senakerib

¹ Naq laj Esekías li awab'ej kirab'i eb' li aatin a'in, kixq'ich li raq', kixtiqib' rib' rik'in q'es ruhil t'ikr ut koho sa' rochoch li Qaawa'.

² Tikto kixtaqla laj Eliakín, laj ilol re li rochoch, jo'wi' laj Sebná laj tz'iib' ut eb' li xtiixilaleb' laj tij, chi wank q'es ruhil t'ikr chirixeb',

³ re xyeeb'al re li propeet Isaías, ralal laj Amós: “Jo'ka'in xye chaq laj Esekías: «Li kutan a'in, a'an xkutankil li rahil ch'oolejil, li rahob'tesiik ut li xutaanal! Chanchano jun li ixq wank sa' yu'am, li maak'a' xmetz'ew chi alank.

⁴ Ma ink'a' tawi' xrab'i li Qaawa' laaYos li xyehom li xnimal ru aj k'anjel li xtaqlaak chaq xb'aan laj eechal re, a' li awab'ej re Asiria, re xhob'b'al li yo'yookil Yos? Jwal us raj naq li Qaawa' laaYos taarahob'tesinq re xb'aaneb' li raatin xye. Laa'at tijon chiru li Qaawa' chirixeb' laj Israel li toj yo'yookeb'!»”.

⁵ Naq eb' li xtaql laj Esekías ke'wulak rik'in laj Isaías,

⁶ kiyehe'k reheb': “Yehomaq re laj eechal eere chi jo'ka'in: «Jo'ka'in xye li Qaawa': Matxiwak xb'aaneb' li aatin xawab'i, a' linhob'b'al xe'xb'aanu laj k'anjel chiru li awab'ej re Asiria.

⁷ Ok we chi roksinkil rik'in laj Senakerib jun musiq'ej re xpo'b'al li xch'ool: taarab'i jun li esil taa'ok wi' xxiw ut taasutq'iiq sa' li xtenamit chi junpaat, ut aran toxkamsiiq chi ch'iich'»”.

⁸ Naq li xnimal ru aj k'anjel aj Asiria kirab'i resil naq li awab'ej re Asiria maa'ani chik sa' li tenamit Lakix, koho ut kixtaw li awab'ej chi yalok rik'ineb' laj Libná.

⁹ Aran laj Senakerib kirab'i resil naq laj Tirhaká, awab'ej re Etiopía, yo chi xik chi yalok rik'ineb' laj Asiria. Toja' naq kixtaqlaheb' wi' chik li xtaql rik'in laj Esekías ut kixye reheb':

¹⁰ “Jo'ka'in teeye re laj Esekías, awab'ej re Judá: «Matxb'alaq'i laaYos li q'axal nakakawu wi' laach'ool, rik'in xyeeb'al naq li tenamit Jerusalén ink'a' taat'ane'q sa' ruq' li awab'ej re Asiria.

¹¹ Laa'at nakanaw chi us chanru naq eb' li awab'ej re Asiria ke'xsach ruheb' chi junajwa chixjunileb' li tenamit. Ma tatkole'q laa'at naq nakak'oxla?

¹² Ma ke'kole'k tab'i' xb'aaneb' li xyos eb' li tenamit li ke'sache'k ru xb'aaneb' linxe'toonil yuwa': a' li tenamit Gosán, Harán, Résef ut eb' laj Eden li wankeb' sa' xteepal Telasar?

¹³ B'ar chik wankeb' li awab'ej re Jamat, li awab'ej re Arpad, li awab'ej re Lahir, jo' ajwi' li awab'ej re Separbáhin, li awab'ej re Hená ut li awab'ej re Abá?»”.

¹⁴ Laj Esekías kixk'ul li hu chi ruq'eb' li xtaql li awab'ej ut kiril xsa'. Chirix chik a'an koho sa' rochoch li Yos, kixte li hu chiru li Qaawa'

¹⁵ ut kitijok chi jo'ka'in:

¹⁶ “At Qaawa', at Nimajwal Yos, xYosat laj Israel, li wank laak'ojarib'aal sa' xb'eeneb' li kerubín! Ka'ajwi' laa'at li xYos chixjunileb' li tenamit sa' ruuchich'och'! Laa'at katk'uub'ank re li choxach'och'!

¹⁷ Ab'i, at Qaawa', ut chak'e reetal; chate xsa' laawu ut chawil li neke'xb'aanu. Ab'i li aatin li xtaqla chaq xyeeb'al laj Senakerib, re aamajewankil laa'at li yo'yookil Yos.

¹⁸ Relik chi yaal, at Qaawa', naq eb' li awab'ej re Asiria, ke'xsach ru chixjunileb' li tenamit,

¹⁹ ke'xk'ati li xyoseb' ut ke'xjuk'i, xb'aan naq moko yoseb' ta ajwi', yal yiib'anb'ileb' b'an rik'in ruq'eb' li winq, a'aneb' che' ut pek.

²⁰ A'ut anaqwan, at Qaawa', at qaYos, choohaakol chiruheb', xnawaqeb' chixjunileb' li tenamit sa' ruuchich'och' naq ka'ajwi' laa'at li Qaawa', li tz'aqal Yos”.

²¹ Toja' naq laj Isaías, ralal laj Amós, kixtaqla xyeeb'al re laj Esekías li aatin a'in: “Jo'ka'in xye li Qaawa', xYos laj Israel: «Ak xwab'i laatij chirix laj Senakerib, awab'ej re Asiria»”.

²² A'an a'in li aatin kixye li Qaawa' chirix li awab'ej re Asiria: “Nakate'xtz'eqtaana, nakate'xse'e eb' laj Sión jo' naxb'aanu junaq tuq'ixq; neke'xb'anb'ani li xjolomeb' li rixqilaleb' aj Jerusalén.

²³ Ani xahob' ut xak'e sa' xutaan? Ani xataqsi laawaatin sa' xb'een ut xakub'si xwankil? A' li xSantil Yos laj Israel!

²⁴ Chi xtz'uumal reheb' laataql xahob' li Qaawa' ut xaye sa' laach'ool: «Rik'ineb' link'iila b'eleb'aal ch'iich' xintaqe'k sa' xb'eeneb' li tzuul, toj sa' xb'een Líbano li ink'a' naru wi' wulak. Xint'aneb' li yaw najteb' xteram ut eb' li xchaq'alil ru saqichaj, xinwulak toj sa' xjolom li tzuul, sa' li raxraxil ru k'iche'.

²⁵ Laa'in xinb'ekok ha' ut xin'uk'ak ha' sa' jalanil tenamit; rub'el woq xe'chaqik chixjunileb' li nima' re Ejiipt».

²⁶ Ma xawab'i chi us? Ak ink'uub'ahom chaq a'in chalen junxil; chalen chaq q'e kutan inkawresihom chaq, ut anaqwan yookin chi xb'aanunkil. Jo'kan naq laa'at xatsachok ruheb' li tenamit ut po'lem xakanab'eb' li kaw sutinb'ileb' chi tz'ak.

²⁷ Eb' li xpoyanamil, maak'a'eb' xmetz'ew, neke'siksotk ut k'ajo'eb' xxiw, chanchaneb' li ichaj, li rax pim, malaj li pim nayo'laak sa' xb'een li ochoch ut nachaqik chi junpaat xb'aan xtiqwal li saq'e.

²⁸ Ninnaw chixjunil li nakab'aanu, naq nakat-elk ut nakat-ok sa' laawochoch, ut k'ajo' laajosq'il wik'in.

²⁹ Laa'at xatjosq'o'k wik'in ut xwil naq xatq'etq'eto'k chiwu; jo'kan naq tinram laab'e, tintz'ap laawe ut tatinsutq'isi sa' laab'e b'arwi' xatchalk chaq”. Chirix chik a'an laj Isaías kixye re laj Esekías:

³⁰ “A'an a'in li eetalil cho'q aawe, reetalil li k'aru taak'ulmanq. Chiru li chihab' a'in teetzeka ru li awimq teetaw chi ink'a' awb'il. Chiru li jun chik teetzeka li namoqk xjunes; ut sa' rox li chihab' tex'awq ut texq'oloq, awqex uub' ut teek'ux li ru.

³¹ Eb' li te'kole'q sa' xyanqeb' li ralal xk'ajol laj Judá ut ink'a' te'kamq, jo'kaqeb' li che': cham te'xe'enq ut taqe'q te'uuchinq.

³² Xb'aan naq sa' li tenamit Jerusalén wankeb' te'kole'q; toj wankeb' li te'kanaaq sa' li tzuul Sión. Li xnimal xrahom li Nimajwal Yos taab'aanunq re a'an.

³³ Xyehom li Qaawa' chirix li awab'ej re Asiria: «Ink'a' taa'ok sa' li tenamit a'in, ink'a' tixkut junaq ral simaj; ink'a' taaxik sa' li tenamit chi wanq xkolb'al rib', chi moko tixyiib' xtaqleb'aal re taa'ok sa' li tenamit.

³⁴ Taasutq'iiq b'an sa' li b'e xchalk wi', ink'a' taa'ok sa' li tenamit a'in -chan li Qaawa'-.

³⁵ Laa'in tinkoloq re li tenamit a'in, re naq ink'a' taasache'q, sa' xk'ab'a' linloq'al ut xb'aan xraab'al laj David laj k'anjel chiwu»”.

³⁶ Ut chiru ajwi' li q'oqyink a'an, li x'ánjel li Qaawa' kiwulak sa' li xmuheb'aaleb' laj Asiria ut kixkamsi oob' xlajeek'aal mil chi winq (185,000) ut naq kisaqewk, ak kamenaqeb' chik chixjunileb'.

³⁷ Toja' naq laj Senakerib, awab'ej re Asiria, kixmoch eb' li xmuheb'aal ut kisutq'iik sa' li tenamit Nínive, ut aran kikanaak.

³⁸ Ut naq wiq'wo chi loq'onink sa' rochoch li yos Nisrok, ke'wulak laj Adramélek ut laj Saréser, li ralaleb', ut ke'xkamsi chi ch'iich'. Tikto ke'elelik ut koheb' sa' li tenamit Ararat chi xkolb'aleb' rib'; ut a' chik laj Asaradón, li ralal, kikanaak chi awab'ejink sa' xna'aj.