Isaías 36 - Q'eqchi Bible

Laj Senakerib kireechani Judá

¹ Ak kaalaju chihab' rokik laj Esekías chi awab'ejink, naq laj Senakerib, awab'ej re Asiria, koho chi yalok rik'in chixjunileb' li tenamit sutsuukeb' chi tz'ak sa' xteepal Judá, ut kilajreechaniheb'.

² Laj Senakerib, awab'ej re Asiria, kixtaqla chaq toj Lakix jun xnimal ru aj k'anjel chiru, rochb'een naab'aleb' aj puub', re aatinak rik'in laj Esekías. Naq ke'wulak Jerusalén, koxe'kanaaq chi xk'atq li ha' li wank chi tzuul, sa' li b'e naxik sa' li Xna'aj laj Puch'unel.

³ Tikto ke'elk chaq laj Eliakín, ralal laj Jilkías, laj ilol re li rochoch li awab'ej, jo'wi' laj Sebná laj tz'iib' ut laj Johaj ralal laj Asaf, xjolomileb' laj k'anjel, chi xk'ulb'aleb'.

⁴ Toja' naq li xnimal ru aj k'anjel aj Asiria kixye reheb': “Yehomaq li esil a'in re laj Esekías: «Jo'ka'in xye chaq li xnimal ru awab'ej re Asiria: Ani nakakawu wi' laach'ool?

⁵ Ma nakak'oxla naq li aatinak chi chaab'il a'an jwal us chiru li na'leb'ak ut li kawilal sa' xhonalil li yalok? Ani nakak'ojob' wi' aach'ool naq nakaq'etq'eti aawib' chiwu?

⁶ Nink'e reetal naq kaw aach'ool rik'ineb' laj Ejiipt re naq tate'xtenq'a. Ab'an eb' a'an moko kaweb' ta rib', chanchaneb' b'an jun kaxlan'aj jorol li naxset ut naxpaynumi li ruq' li ani naxkuutu rib' chiru. Jo'kan naxb'aanu laj Parahón, awab'ej re Ejiipt, reheb' chixjunileb' li neke'xkawu xch'ooleb' rik'in.

⁷ Ut wi laa'ex nekeye we: Laa'o kaw qach'ool rik'in li Qaawa' li qaYos, chankex, ma ink'a' tab'i' laj Esekías kijuk'uk re chixjunileb' li tijob'aal ut eb' li artal, naq kixye reheb' laj Judá ut eb' laj Jerusalén: Jun ajwi' chi artal teewiq'ib' wi' eerib' chi loq'onink?

⁸ Us b'i', yalomaq eeru rik'in li awab'ej re Asiria, linwa'chin: tink'e oob' o'q'ob' (2,000) aakawaay, ma taataweb' tana oob' o'q'ob' (2,000) chi winq li te'b'eeq chirixeb'.

⁹ Ab'an laa'at moko kaw ta aawib' chi raanilasinkil junaq reheb' laj puub' re linwa'chin, us ta a'an q'axal toq'ob'aal ru. K'a'ut naq yookat chi royb'eninkileb' aab'eleb'aal ch'iich' ut aakawaay aran Ejiipt?

¹⁰ Ma nakak'oxla naq xinchalk chi xjuk'b'al li na'ajej a'in chi ink'a' ta xinxtaqla chaq li Qaawa'? A' li Qaawa' xyehok we: Ayu chi xsachb'al li tenamit a'an»”.

¹¹ Toja' naq laj Eliakín, laj Sebná ut laj Johaj ke'xye re li xnimal ru aj k'anjel aj Asiria: “B'aanu usilal, aatinaho sa' arameo, xb'aan naq naqataw ru. Moohaawaatina sa' hebreo, xb'aan naq chixjunileb' li wankeb' sa' xb'eeneb' li xsuttz'akil li tenamit yookeb' chi ab'ink”.

¹² Ab'an li xnimal ru aj k'anjel aj Asiria kixye reheb': “Meek'oxla naq li awab'ej re Asiria xinxtaqla chaq chi xyeeb'al a'in aawe chi moko re laj Esekías, laj eechal aawe. Xinxtaqla b'an chaq chi xyeeb'al reheb' li winq wankeb' chaq sa' xb'een li suttz'ak: xb'aan naq eb' a'an jo' ajwi' laa'ex tento teelow leek'ot ut teeruk' leechu'”.

¹³ Toja' naq li xnimal ru aj k'anjel aj Asiria kixaqliik ut ki'aatinak chi kaw xyaab' xkux sa' hebreo: “Ab'ihomaq li naxye chaq li xnimal ru awab'ej, a' li awab'ej re Asiria.

¹⁴ Jo'ka'in xye chaq li awab'ej: «Meek'e eerib' chixb'alaq'i laj Esekías, xb'aan naq a'an moko taaruuq ta chekolb'al».

¹⁵ Chi moko chepaab' wi tixye naq k'ojk'ooq eech'ool rik'in li Qaawa'. Meepaab' wi tixye eere: «Li Qaawa' taakoloq qe; li tenamit a'in maajoq'e taat'ane'q sa' ruq' li awab'ej re Asiria».

¹⁶ Meepaab' li raatin laj Esekías, xb'aan naq jo'ka'in xye chaq li awab'ej re Asiria: «K'amomaq eerib' sa' usilal wik'in ut q'axtesihomaq eerib' chiwu. Chi jo'kan li junjunq eere sa tixtzeka ru li x'uub' ut li x'iig, ut taaruk' li ha' wank sa' li xkumb'.

¹⁷ Chirix chik a'an tinwulaq laa'in ut texink'am sa' jun li na'ajej jo' leena'aj laa'ex, b'arwi' na'elk chi us li triiw, li uub', re naq taawanq leewa leeruk'a' chi yo'oon.

¹⁸ Laj Esekías yo cheb'alaq'inkil rik'in xyeeb'al naq li Qaawa' taakoloq eere. Ma wank tab'i' junaq tenamit li xkole'k sa' ruq' li awab'ej re Asiria xb'aaneb' li xyos?

¹⁹ B'ar wankeb' li xyoseb' laj Jamat ut li xyoseb' laj Arpad? B'ar xkoho li xyoseb' laj Separbáhin? Ma xe'ruuk tab'i' xkolb'al Samaria sa' wuq'?

²⁰ K'a' chi yosil, sa' xyanq chixjunileb' li xyoseb' li tenamit a'an, xkol ta li xtenamit sa' wuq' laa'in? Chan put ru naq li Qaawa' tixkol li tenamit Jerusalén sa' wuq'?»”.

²¹ Eb' li poyanam mem ke'kanaak ut maajun chik aatin ke'xye, xb'aan naq xyehom li awab'ej: “Maajun aatin te'xsume”.

²² Toja' naq laj Eliakín, laj ilol re li rochoch li awab'ej, ralal laj Jilkías, jo'wi' laj Sebná laj tz'iib' ut laj Johaj, ralal laj Asaf, xjolomileb' laj k'anjel, ke'wulak rik'in laj Esekías, chi q'ichilk chik li raq'eb', ut ke'xseeraq'i re li k'aru yeeb'il chaq xb'aan li xnimal ru aj k'anjel aj Asiria.