Isaías 35 - Q'eqchi Bible

Li ak' Jerusalén

¹ Sahoqeb' li chaqich'och' ut li joxk' na'ajej! Chisaho'q li junesal na'ajej ut chinujaq chi uutz'u'uj;

² chi'atz'umaq jo' li saqihix ut chixjapaq re xb'aan xsahil xch'ool. Jwal taach'ina'uso'q jo' li tzuul Líbano, jo' li xchaq'alil ru li Karmeel ut li xtaq'ahil Sarón. Chixjunileb' te'ril li xnimal xloq'al li Qaawa' ut te'xk'e reetal li xwankil li qaYos.

³ Chikawuuq leeruq' laa'ex li lub'luukex, xaqab'omaq chi kaw li xb'een eeraq maak'a' xmetz'ew.

⁴ Yehomaq reheb' li yookeb' xxiw: “Kawaq eech'ool ut mexxiwak! Chalk re leeYos chekolb'al, we' chaq chi eeqajunk. Chalk re ut texxkol!”.

⁵ Toja' naq taatehonq xsa' ruheb' li mutz' ut eb' li tz'apxikeb' te'ab'inq chik.

⁶ Li yeq roq taapisk'oq jo' li yuk, ut eb' li mem te'xjap chik re xb'aan xsahil xch'ooleb'. Sa' li chaqich'och' taayo'laaq li yu'amha' ut k'ajo' li ha' taawulk'uq sa' li joxk' na'ajej.

⁷ Li chaqich'och' taakanaaq jo' li saab' ru ut li pojtz' ch'och' taasutq'iiq cho'q yo'leb'aal ha'. Sa' li na'ajej li xe'wank wi' li josq' aj xul taak'iiq chik li kaxlan'aj ut li kala'.

⁸ Ut taawanq jun nimb'e li tixk'ab'a'in: “Loq'laj B'e”. Ink'a' te'nume'q aran li ink'a' neke'xpaab' li Qaawa', chi moko eb' li maak'a' xna'leb' te'xb'eeni rib' chisa'.

⁹ Maak'a'aq chik aran li kaqkoj chi moko te'nume'q li josq' aj xul sa' li b'e a'an; ka'ajeb' wi' li kolb'ileb' te'b'eeq aran.

¹⁰ Eb' li kolb'ileb' xb'aan li Qaawa' te'sutq'iiq chaq, te'ok Sión yooqeb' chi b'ichank, ut chi xnaq' ruheb' taak'utunq li xsahilaleb' xch'ool chi junelik. Nimla sahilal taa'ochb'eeninq reheb' ut maak'a'aq chik li yaab'ak ut li rahil ch'oolej sa' xyanqeb'.