Isaías 34 - Q'eqchi Bible

Li Qaawa' tixsach ru Edom

¹ Jilonqex chaq, ex tenamit, ut ab'ihomaq; k'ehomaq reetal chi us, ex poyanam. Ab'in, at ruuchich'och' ut chixjunil li wank chisa'; k'e reetal, at choxach'och' jo'wi' chixjunil li nayo'laak chiru.

² K'ajo' xjosq'il li Qaawa' rik'in chixjunil li tenamit jo'wi' rik'in chixjunileb' laj puub'. Xteneb' li tojb'amaak sa' xb'eeneb' ut xq'axtesiheb' chi kamk.

³ Eb' li kamenaq te'jilixinq sa' b'e, k'ajo'aq xchuhil eb' li kamenaqeb'; chanchanaq roq nima' li kik' sa'atqeb' li tzuul!

⁴ Sachaamilaqeb' li chahim, li saq'e ut li po, li choxa tixmoch rib' jo' junaq hu; ut chixjunileb' li chahim li wankeb' chiru choxa te'chupq jo' naq natz'umaak li xtux li uub', kama' naq naq'ano'k li xxaq li xche'el li iig.

⁵ Xb'aan naq linq'esnal ch'iich' sa' choxa yo royb'eninkil jo'q'e tolxrahob'tesi Edom, jo'q'e taakub'eeq sa' xb'een li tenamit li xinq'axtesi chi sache'k ru.

⁶ Oso'jenaq li xq'esnal ch'iich' li Qaawa' sa' kik' ut xeeb', kama' naq neke'kamsiik eb' li karneer ut li chib'aat sa' xhonalil li mayejak. Li Qaawa' taamayejaq aran Bosrá, ut taawanq nimla kamsink sa' xteepal Edom.

⁷ Cho'q ruuchileb' li xninqal xul te'kamsiiq eb' li tenamit; jo' ruuchileb' li teelom wakax te'oso'q li jwal kaweb' rib'. Toja' naq li xna'ajeb' taanujaq chi kik', ut taaxeeb'o'q li pojtz'.

⁸ Xb'aan naq a'anaq xkutankil li eeqajunk cho'q re li Qaawa', a'anaq xchihab'il li q'axok u cho'q re laj kolol re Sión.

⁹ Eb' li nima' sa' xteepal Edom te'kanaaq cho'q raxkas, li xpojtz'il li na'ajej taasutq'iiq cho'q asuupr, ut li xch'och'el taakanaaq cho'q raxkas li yo xxamlel.

¹⁰ Maajoq'e taachupq chi q'eq ut chi kutan ut junelik yooq chi elk li xsib'el. Nakirirnak taakanaaq li na'ajej chi junajwa ut maajun chik taanume'q aran.

¹¹ Aran te'xyiib' xna'ajeb' li warom ut li k'uch, laj tak' ra' ut li tuntz'oq. Li Qaawa' tixsutq'isi Edom cho'q chaqich'och' ut junesal na'ajej.

¹² Maajun chik taaxaqab'aaq cho'q awab'ej, chixjunileb' li xninqal ru winq te'sachmanq ruheb'.

¹³ Pajl taak'iiq sa'eb' li xchaq'alil ru ochoch re Edom; warak'ix ut k'aamla te'yo'laaq sa'eb' li kawub'resinb'il ochoch. A'anaq chik xna'ajeb' laj xojb' ut rochocheb' laj tak' ra'.

¹⁴ Eb' li yak te'wanq rochb'eeneb' laj xojb' ut eb' li chib'aat te'xb'oqatq rib'; aran ajwi' taawanq li anum Lilit xk'ab'a'.

¹⁵ Sa' li na'ajej a'an te'wanq li k'anti'; aran te'molb'eq ut te'xtiqwa li xmoleb' toj reetal te'yo'laaq. Aran ajwi' te'xch'utub' rib' eb' li so'sol.

¹⁶ Tehomaq li xhu li Qaawa' ut yaab'asihomaq xsa': teek'e reetal naq maajun junaq reheb' li xul a'an ink'a' ta taatawmanq; maajun tixtz'eqtaana li rochb'een. Xb'aan naq a' ajwi' li Qaawa' kiyehok re ut a' ajwi' li xmusiq' taach'utub'anq reheb'.

¹⁷ Li Qaawa', a'an li kik'ehok reheb' sa' xna'ajeb' ut rik'in ruq' kixjek'i li xtenamit li junjunq. A'anaqeb' laj eechal re chi junajwa ut aran te'wanq chi junelik q'e kutan.